Uguhura N’Imana Kuzima Kwa Misi Yose

UGUHURA N’IMANA KUZIMA KWA MISI YOSE

na

Zacharias Tanee Fomum

©1987, Z.T. FOMUM

Casohowe na

the ePublishing unit of the Book Ministry of CMFI

http://www.cmfionline.org | ztfbooks@cmfionline.org

Uko citwa mu Gifaransa: Rencontres Dynamiques Quotidiennes Avec Dieu

©1987, Z.T. FOMUM.

Ivyanditswe muri iki gitabo vyo muri Bibiliya biri hagati ya twamugina vyakuwe muri Bibiliya Yera, societé Biblique du Burundi, 1967.

IBIRIMWO IBIRIMWO

Intangamarara

Umwami Yesu N’uguhura N’imana Kuzima Kwa Misi Yose

Bibiliya N’uguhura N’imana Kuzima Kwa Misi Yose - 1

Bibiliya N’uguhura N’imana Kuzima Kwa Misi Yose - 2

Bibiliya N’uguhura N’imana Kuzima Kwa Misi Yose - 3

Bibiliya N’uguhura N’imana Kuzima Kwa Misi Yose - 4

Ugusenga N’uguhura N’imana Kuzima Kwa Misi Yose - 1

Isengesho N’ Uguhura N’imana Kuzima Kwa Misi Yose - 2

Uguhura N’imana Kuzima Kwa Misi Yose Umurango Wose

INTANGAMARARA

Iki gitabo Uguhura N’imana Kuzima Kwa Misi Yose ni ica kane mu rukurikirane "Imfashanyo mu buryo bugaragara zagenewe Abanesha". Ibitabo bikurikira ni bimwe mu bigize urwo rukurikirane:

Igitabo 01: Ikoreshwa Ry’umwanya

Igitabo 02: Ukwiherera Kubw’ugutera Imbere Mu Buryo Bw’impwemu

Igitabo 03: Ikanguro Ryo Mu Buryo Bw’impwemu Ku Giti C’umuntu

Igitabo 04: Uguhura N’imana Kuzima Kwa Misi Yose

Igitabo 05: Ishule Ryo Kuvuga Ukuri

Igitabo 06: Ni Gute Baroranirwa Mu Buzima Bwa Gikristo

Igitabo 07: Umukristo N’amafaranga

Igitabo 08: Ukubohoka Icaha C’ubunebwe

Igitabo 09: Ubuhinga Bwo Gutama

Igitabo 10: Kumenya Imana (icankenerwa Gusumba Ibindi Kw’iyi Saha)

Igitabo 11: Ugusubiza: Ubutumwa Buhambaye Ku Banesha

Igitabo 12: Uguhishurirwa: Icankenerwa

Igitabo 13: Ukwihana Nyakuri

Igitabo 14: Urashobora Kuronka Umutima Utunganye Uyu Musi

Muri iki gitabo, ibishoboka vyarahawe uwunesha, biciye mu kurimbura Bibiliya, mu gusenga no mu kwumvira, kugira azigame uguhura n’Imana kwa misi yose, kuzohindura igisata kimwe kimwe cose c’ukugendana n’Imana kwiwe. Birashoboka cane kwumva no guhura n’Imana imisi yose, mbere na kenshi ku musi. Irarindiriye kwumvirizwa. Iripfuza cane kuvugana n’abana bayo, kubumviriza no kubishura. Nticereje. Urashobora guhura nayo uyu musi kandi nayo irashobora guhura nawe, kandi ntuzosubira kuba wa wundi ukundi.

Dushize ku mugaragaro iki gitabo dusenga ngo gikoreshwe n’Umwami mu guhezagira abana biwe, kwinjira i bwina mu kugendana kwabo nawe, no gushitsa imigambi y’Imana ku muntu ari yo: kuyimenya, kuba muri yo, no kuronkera umunezero muri Yo ibihe vyose!

Yaoundé, 7 Ruheshi 1987

Zacharias TANÉE FOMUM

B.P. 6090 Yaoundé

CAMEROUN

IKIGABANE CA 1

UMWAMI YESU N’UGUHURA N’IMANA KUZIMA KWA MISI YOSE

Mw’ijoro rishira ubuca aravyuka, arasohoka, aja mu gahinga asengerayo (Mariko 1:35).

Ndaguhimbaza, Data, Mwami w’ijuru n’isi kuko ivyo wabihishije abanyabwenge n’abahanga ukabihishurira inzoya (Matayo 11:25).

Data, ndagushima ko wanyumvirije. Jewe nari nsanzwe nzi ko unyumviriza ubudasiba (Yohana 11:41-42).

Nagushimagije mw’isi, nonosoye igikorwa wampaye gukora. Na none Data unshimagizanye nawe, unshimagirishije bwa bwiza nahoranye ndi kumwe nawe isi itararemwa(Yohana 17:5).

Ku kagoroba, ku kirengazuba, bamuzanira abarwaye bose n’abinjiwemwo n’abadayimoni. Igisagara cose gikoranira kw’irembo. Akiza benshi bari barwaye indwara zitari zimwe, asenda abadayimoni benshi, ntiyakundira abo badayimoni ko bavuga, kuko bari bamuzi. Mw’ijoro rishira ubuca aravyuka arasohoka, aja mu gahinga asengerayo. Simoni n’abandi bari kumwe nawe baramukurikira: bamubonye baramubwira, bati bose bariko barakurondera. Arabishura ati tuje ahandi mu bisagara biri hafi, naho nyene nigisheyo, kuko ari co canzanye. Yinjira mu masinagogi yabo i Galilaya hose avuga ijambo ry’Imana, asenda abadayimoni (Mariko1:32-39).

INTUMBERO Y’UBUZIMA

Kugira ubuzima buroranirwe imbere y’Imana, butegerezwa kuba bwerekeje ku ntumbero. Ni yaba intumbero yawe ari ubusa uzoyishitsa, ni ukuvuga ko ata na kimwe uzoshitsa! Ukubura intumbero ni icago. Igituma ca mbere abantu benshi bananirwa mu buzima bwabo nuko badafise intumbero itomoye y’ubuzima bwabo.

Kubera rero ata ntumbero itomoye ihari, ntibafise ubuhinga canke integuro itomoye yizwe neza kugira bashitse intumbero yabo. Kubw’ivyo ntibashobora kugendera ku rutonde rukenewe kugira bashobore gushitsa intumbero yabo.

Intumbero itegerezwa gushiraho ubuhinga bwokoreshwa no gushinga urutonde rukenewe kugira iyo ntumbero ishitswe.

Intumbero ni ntasubirizwa.

Umuntu ntashobora gushitsa ibiri kubiri n’intumbero ziwe.

Intumbero z’ umuntu zimugira ico aherukira kuba.

Ibi bikurikira ni ibiranga intumbero :

Intumbero zitegerezwa kuba izitomoye.

Intumbero zitegerezwa kuba zifise ivyo zerekeye.

Intumbero zitegerezwa kuba izigerwa.

Intumbero zitegerezwa kugira umwanya ntarengwa zirangurirwamwo.

Ubuhinga bukoreshwa butegerezwa gusuzumwa, kandi ubusumba ubundi bugacagurwa kugira intumbero ikurikiranwa ishitswe.

Intumbero zisaba ivy’umuntu vyose kugira zishitswe. Hagize ico yiziganiriza ku ntumbero yiwe aba yahisemwo kutayishitsa. Aha niho uguhitamwo kuba mu rutonde canke kuba mu kajagari bigaragarira.

Abaroranirwa gusumba abandi baba bafise intumbero imwe badashobora gukurwamwo.

Intumbero zitegerezwa kuba izagutse canke niniya bihagije kugira zirotse utundi twipfuzo dutoduto. Zitegerezwa kuba, igihe zashikijwe, izisiga ingaruka muri kahise.

Intumbero y’uwizera itegerezwa kuba nini cane ku buryo ata kintu na kimwe kindi comukiza kunanirwa kuyishitsa uretse ugutabarwa n’Imana gufatanije no gushiramwo ivyiwe vyose. Itegerezwa kuba niniya bihagije kugira isabe umuntu ivyiwe vyose, yisunze amategeko.

Umwami Yesu yari afise intumbero. Yari intumbero itomoye. Yarashikije intumbero yiwe imbere yo gutaha mw’ijuru. Abivuga artya :

Jewe naragushimagije mw’isi, nonosoye igikorwa wampaye gukora (Yohana 17 :4).

Intumbero ya Kristo kwari ugushimagiza Data mw’isi. Yarashimagije Data mu kunonosora (guheza) igikorwa Data yari yamubwiye gukora. Imbere yaho gato, yari yabiseruye ati:

Indya zanje ni ugukora ico uwantumye agomba no guheraheza igikorwa ciwe (Yohana 4:34).

Ikintu cose cari ubugombe bwa Data vy’ukuri caraterera mu buryo butomoye kugira igikorwa ciwe kinonosorwe. Igikorwa ciwe n’ubugombe bwa Data ntivyatandukanywa. Akoze ubugombe bwa Data ku musegonda umwe umwe wose mu buzima bwiwe, yaba ashikije intumbero yiwe, kuko intumbero yiwe yaba ishikijwe mu gukora ubugombe bwa Data umusegonda ku musegonda. Ico yakora cose rero caba ari igihimba ca vyose.

Umuntu yogira umugambi wo kwubaka igorofa igeretse incuro mirongo itanu. Bimusaba kwiyumvira iyo nzu yose no kuyishushanya. Birakenewe ko ‘‘abona’’ iyo gorofa yanonosowe muri kimwe kimwe cose mu biyigize. Muri ico gihe rero niho ashobora gukora. Kugira iyo nzu ibe vy’ukuri nk’ uko yari yariyumviriwe, agace kose k’inyubakwa gategerezwa gukorwa neza. Umushinge, impome, ibisakazo, n’ibindi, bitegerezwa gukorwa neza vyose. Itafari ryose ritegerezwa gushirwako mu bwitonzi. Ugushirako ibuye rimwe rimwe turashobora kubigereranya n’igikorwa ca buri mwanya mu buzima bw’umuntu. Nimba itafari rimwe rimwe ryose ryashizweko neza, inzu izoba neza na neza uko yari yiyumviriwe. Itafari ryose rizoba ryashizweko nabi rizoteza ivyago uwo mugambi. Nta woshobora kuvuga ko ashizeko nabi itafari rimwe gusa mu muliyoni w’amatafari ngo kazima ayandi yagiyeko neza. Ikintu cubatswe neza gisaba ko akantu kamwe kamwe kose mu tukigize kamera neza. Bene Data ico ni ngombwa. Ivyo bisigura ko kugira nshitse intumbero y’Imana kubw’ubuzima bwanje, ntegerezwa kuba ntunganye imbere y’Imana buri musegonda wose w’ubuzima bwanje. Ivyo bisigura ko ntegerezwa kuba ndiko ndakora ico ishaka ko mba ndiko ndakora kuri uwo musegonda; kandi ntegerezwa kuba ndiko ndagikora mu buryo ishaka ko ndagikoramwo, kandi kubw’inyanduruko nziza. Igihe cose ndi mu kibanza kibi canke ndiko ndakora ikintu kibi, canke nkaba ndiko ndakora ikintu ciza, ariko mu buryo bubi, canke ndiko ndakora ikintu ciza mu mwanya mwiza, no mu buryo bwiza, ariko kubw’intumbero mbi, mba mbereye igisika Imana.

Nuko rero, kugira bikunde, integuro y’inzu yose hamwe itegerezwa kuba ishushanijwe, kandi inzu inonosowe itegerezwa kuboneka. Hanyuma kimwe kimwe cose kijanye n’iyo inzu gitegerezwa gushirwaho bivanye n’uko umwubakisha yabitegekanije.

Imana ni umwubakisha mukuru. Irafise intumbero nyamukuru ku buzima bw’umwe umwe wese. Dutegerezwa guhabwa nayo iyo ntumbero, hanyuma tugakora cane, nk’uko inzira y’Imana iri, kandi tukayishitsa. Dutegerezwa kuba mu kibanza ciza buri kanya, kandi turiko turakora ikintu ciza.