Ultimi sprazzi di lucidità

L’AUTORE

SULL’AUTORE SUI RAPPORTI CON LA MOGLIE

Na passione irresistibile

Chesta passione ardente.. ‘e scrivere poesie

è nu sfogo naturale pe’ sprigiunà ‘e fantasie

e..sta passione st’addiventanne inarrestabile

ogne ghiuorne ca passa è sempe cchiù irresistibbile

Io resto avviluppato da chesta nobil’arte

passo iurnate intere ‘a ‘nguacchià ccarte

tanta vvote faccio ‘o cuso e pure ‘o scuso

e d’ogne cosa ca veco o sento divento curiuso

Ma V’assicuro sò stroppole scritte cù sincerità

e m’arraccumanno ‘o lettore nun s’adda scuraggià

se tratta e ricorde d’o ppassato o cchiù recente

storielle vissute o immaginate sulamente

Nu poco ‘e politichese, n’ato ‘e banchitaliese

fattarielle cuntate in modo affabile e curtese

rricorde ‘e giuventù o d’a famiglia antica

‘e quacc’amorettino.. però solo ‘a mullica

d’’a primma ‘nnammurata..d’’e primme vase

sultanto chilli rricorde ca me sò rummase

‘Nzomma ‘a scelta è veramente variegata

nu fattariello comico oppure drammatico

nun me ‘mporta..‘a finalità è unica

truvà nu sfogo a chesta mia vena poetica

Mò si sti vierze mieie scritte ‘mmiez’’a via

‘int’a nu treno oppure dint’’a na tratturia

nun ve piaceno e nun ve ne ‘mporta niente

lassate stà ‘e cummento..so’ ‘e mieie sulamente

Giustamente penzate ‘e rrobba ‘e ppoco, modesta

se ‘a cunfrantamme cu’ ‘o cchiù celebre cuntesto

Murolo, Viviani, Di Giacomo, De Mura e Postiglione

tanto per citarne alcuni dello storico scaglione

Ma io nun demordo,vaco ‘nnante,faccio a faccia tosta

nun m’illudo c’a poesia mia ‘a chisti mostri s’accosta

ma prupongo serate, cumpongo, leggo, sturio, me do da fà

speranno che almeno ‘e pariente ‘a putessero nu poco apprezzà

Ave ragione l’amico Alfredo.. ca me guarda stuorto

ca dice ngiro "chisto s’arrennerà sultanto doppo muorto"

Eredità dallo zio materno

Che v’aggia dì? Cumm’è nata sta mania?

‘e scrivere sunette e poesie su Napule

forse proviene da un mio vecchio zio

ch’è all’epuca era n’amico ‘e Di Giacomo e Murolo

Se chiammava Ettore De Mura, zio materno

Ll’accanuscette quann’abitavo a Salerno

era nu pueta molt’apprezzato, straordinario

cu’ opere inserite nel prestigioso campionario

Certo, facenne ‘o cunfronto,io sò na scurzetella

ma mme sento cuntento ‘e essere na piccola mullechella

pecchè sultanto ‘o cunfronto me stimola, me fà inorgoglì

e spisso a notte su paragone… nun me fa…addurmì

Ma chi e’ stu poeta?

Attuorno a me stasera anema ‘e core

ll’amice cchiù affettuose d’’a città

se sò strignute e cù nu vero ammore

‘nzieme m’hanno vuluto festeggià

VVe vulesse parlà ‘e me, d’’o munno sano

ma penzo,ahimé,che sarebbe tutto… invano

Ve vulesse cuntà ‘e ccose.. d’’o passato

chello c’aggio fatto e chello ca sò stato

Accummencianne ‘a quanne guagliunciello

ievo passiano a Salierno.. cù ll’amice

senza tené penziere, libbero e felice

‘mpezzannece dint’o ciardino e donn’Aniello

pe’farce ‘nzieme ‘na partitella ‘a pallone

addò io me divertivo e facevo ‘o caporione

Po’ vve vulesse ddì ca sturiavo poco o niente

a licenza liceale.. fuje giustamente rimandato

pateme diceva..mah! sta cosa nun sarrà frequente

e accussì all’Università me songo laureato

Vincette nu concorso dint’a na banca

quarant’anne eppò me ne iette stanco

po’ ll’anne me facettero.. attempato

nu vicchiariello semprice e aggarbato

Ma quanno ‘a fantasia me piglia e se sceta

perdunateme, amice, me vene ‘e fà ‘o pueta

pe’ dà nu significato a chesta vita mia

me presento cu’ stu libro pe farve cumpagnia

E quanne ‘o cielo, po’‘nzieme cù ll’anne

pe’ legge naturale,me mannarrà pene e malanne

io.. d’int’o lietto.. senza ddà fastirio

mm’hò leggo chianu chianu stu volumetto mio

‘A primma vota... me diciste no!

Ancora sto penzanno a chillu atroce affronto

ogge me voglio sfucà, percio ve lo racconto

sto parlanno ‘e Marisa……. ca po’ l’aggio spusata

st’offesa me ll’hà fatta primma d’essere fidanzato

T’accanuscette in una sala da ballo a Coroglio

stevemo tutt’’e dduie ‘a guardà nu scoglio

e me piaciste subbeto, ti ‘nvitaie ‘a ballà

e me rispunniste no, scùsame, ora non mi và!

Capevo ch’ev’aspettà…e cù pacienzia aspettaje

na mezzoretta appena… e po’ ‘nce ripruvaje

Te chiedette se me rive nappuntamento int’’a semmana

tu pigliaste tiempo e me rispunniste poi vediamo

t’addumannaje d’’telefono, ma tu me lo negasti

in giro pé tantu tiempe,scucciandote,me purtaste

Pé furtuna nu iuorno a Piazza Dante te‘ncuntraie

Russo nfaccia,timidamente, doppo nu cafè, t’addummanaie

se ci potevamo ttant’ate vvote frequentare

pecché tu me piacevi e mi volevo fidanzare

Imbarazzata, quase scurnosa me diciste

no, non è il caso, non mi sento pronta

songh’impegnata p’’e lavoro..fingiste

restaie scucciato per il grave affronto

Tiempo n’nce vò, ma ‘o ddoce arriverà

me dicette na zingara ca pe caso steva llà

ed ì me mettette a ridere si insisterò

e st’augurio sincero mi tranquillizzò

Chella smurfiosa, pensaie, me pare è prevenuta

e ogne vote ca me vede.. fà a sostenuta

ma che se crere ch’io abbandono ‘a partita?

‘e chella ‘a donna ca m’accumpagnerà nella vita

Pirciò faccio finta ‘e restare tranquillo

ma già tenco p’essa appriparato ’o mastrillo

poche iuorne ancora e cadrà mbraccia ‘a mme

nun po’ reggere cchiù…è fritta! Aadda carè!

Quacche ghiurno me telefonaste e me diciste

e sta proposta onesta cunvinta me faciste

va buò…pruvamme..vedimmece dummeneca

nce sentimme ‘nzieme ‘a santa messa

E va bbuono..sò..pronto accumminciamme

na vota sola ‘a semmana ‘nce putiveme ‘ncuntrà

O doppo dduje mmise..io me l’aspettavo

mm’obbligò ‘a canoscere papà e mammà

‘E cunziglie d’a mamma

‘A mamma ‘e tuttequante quase maje s’apprezza

e invece ‘o bbene ‘e essa è na vera furtezza

nun sempe ‘e sentimme ‘e cunziglie d’a mamma

e ‘nvece ‘a ttanti ccose raramente ‘nce penzamme

Quanne durante ’a vita quaccosa t’avvilisce

è essa ca te stà vicina e sùbbeta te capisce

si s’arraggia e t’allucca è pe’ te fà ‘mparà

ca pe’ cierti scelte mille vvote nc’ìà penzà

O’ mumento cchiù difficile è quanno te vaje ‘a ‘nzurà

é allora ch’essa nun te po’ fa ammeno ‘e cunziglià

e sottovoce te piglia chianu chiano, appartata

e te ffà amorevolmente st’affettuosa.. parlata

"Figlio mio nunn’è facile ‘a scelta d‘o partito

quanne te sciglie ‘a ffemmena p’’a vita

nun t’hà’ piglia scicca, né ‘ncannaccata

accertate po’ ca nunn’è ancora spusata

sta scelta s’addà passà… p’’o setaccio

altrimenti p’’a vita toia s’arape nu crepaccio

Mammina mia sti cunziglie nun m’hè putette ddà

pecchè murette diece anne primma ca me spusasse

però è comme se l’avesse fatto, mentre facevo ‘o passe

sottovoce me dicette staie facenne bbuone Marisa ti hà spusà

Nu risveglio nervoso

Marisé, Marò, ma stammatina che t’hé capitato?

lassame stà Robbe.. tengo ‘o naso appilato

‘e d’aieressera mannaggia a morte, stò accussì

e va buò Marì ma cu stu male nun se po’ murì

Stanotte ‘nfino ‘a ‘e 3, ‘ll’ummeto fore ‘o ciardino

a discutere quanno se sposano Allegra e Robertino

è lla ca me song’ammalata, me sò raffredadata

emmò vavattenne,me sento nervosa e stralunata

E ghiamme, fatte na bella passiata ‘nfarmacia

nu pillolo, na serenga e tutto torna in armunia

Vvì che bella iurnata ca ‘è accumminciata

songo neppure ‘e sette e già stamme ‘ncazzata

Quanne sarranno ll’unnece, che succedarrà?

sultanto ‘a Pataterno, mu putarrà..salvà

ogne ghiuorne na sceneggiata nun ne pozzo cchiù

mò me ne vaco a Fiumicino, me ne parto p’’o Perù

Ogge nu naso appilato, dimane nu dulore ‘e mola

ogge lle piace ‘e stà ‘a casa, dimane vò ì ‘a Nola

crèdetemi amice sta fémmena ‘e na bomma atomica

tene n’energia, na salute, na vivacità overo uniche

Io m’allamento, ma stu lamiento nunn’è na cosa onesta

pecché quann’essa nun stà cù mme scoppia na tempesta

‘a vaco cercanno inutilmente p’’a casa, ma essa è asciuta

allora me pento, senza Marisa a vita mia sarebbe scena muta

e me rimpiango ‘o naso appilato, ‘o ppoco ‘e raffreddore

pecchè alla fine, vince, anzi stravince, sempe l’ammore

‘A finta sordità

Si tu me sì overamente amico

seguilo stu proverbio antico

chello ca nun vuò sentì

fà vedè ca nun ‘o siente

Tutt’’e ssere se ripete ‘a stessa a sceneggiata

muglierema a bassavoce me vene ‘a sussurrà

‘nce ne iamme ‘a ffà na bella passiggiata

io hà sento ma ne và ‘a chest’ora ‘a cammenà

Cuntinuo ‘a farme ‘e ffatte mieie, ma essa insiste

ma nun siente? Dimane jamme ‘a nu specialista

a sta recchia me dici sempe tu nun nce siente

quanne t’aggia dicere na cosa? Che turmiente!

Secondo mme tu ffaie orecchie ‘e mercante

si na ccosa nun te piace nce vulesse l’altoparlante

‘a pròssema vota hàggio capito c’aggià ffà

si nun siente.. per forze me mett’àlluccà

Io faccio overo ‘o surdo, ma pé furberia

‘a surdità è utile comma ‘all’amnistia

te libbera è sentì gguaie e tanta scemità

e truove nu poco e pace ..na tranquillità

Nun te piace? Nun’hà vuò senti chella cosa

ffà ‘o surdo.. overamente è na bella scusa

che m’hé dditto Marì? Nunn’aggio sentuto

nun me fà fesso cchiù! Me sò fatto astuto

‘A cura dimagrante

Nunn’è comm’a na vota….. la mia presenza

è ‘o specchio ca me lo dice senza clemenza

a panza è grossa e cazune e tante rappetelle

so chiari ‘e segnali ca me sò fatto vecchiariello

Me sento appesantuto, sò addiventato tunno

ma nunn’è ‘o caso ancora ‘e chiammà ‘a Bellumunno

ma allora nun hè capito proprio niente?

truneggia muglierema cù nu tono pungente

D’’a matina ‘a sera me mette ‘ncroce

dicenneme ca magno tanta rrobba doce

nunn’ave tuorto,ma che ‘nce pozzo ffà?

Si me piace ‘o gelato, a crema, o babbà!

Ccierti ccanuscenti m’hanno cunzigliato

e accummincià na bella cura dimagrante

pecchè me so ‘ngrassato areto e annante

rispetto a tantu tiempo fa, pare proprio n’ato

Certo te ll’ì’à scurdà ‘o raù’ int’’a tiana

a rrobba ca può magnà è tutta rrobba vegetariana

na corota, na lattuga quacche vota ‘o pesciolino

duje anne appena e diventarraje nu figurino

Chesto dice ‘a ricetta e chesta t’attocca

me vvonne fà murì..a rraggia mia trabocca

Marisa m’hà accattato pure na bilancella

‘e .. notte quatto quatto ‘a chetichella

me ne vaco in cucina, essa stà facenne ‘o sunnellino

e m’afferro salame, prosciutto e nu furmaggino

Me mmagno tutto chello ca trovo..‘a casaccio

pirciò, amici miei, sta cura.. nunn’hà faccio

Marisa e a poesia mia

‘O rapporto tra muglierema e a puesia

nunn’è idilliaco forse pure pe’ colpa mia

nun voglio dì ca è cuntraria.. ‘a st’arte

ma quanne me metto‘a declamà se mette da parte

Voglio ddì ch’è una donna ca nun dà ‘mpicce

ca nun fà maje sciccheria, nè capricce

comme cumpagna d’’a vita.. na vera rarità

n’idea assaje felice quanne ma jette a spusà

Essa è a reggina quanne se mette ‘ncucina

e lle piace assaje ll’ordine e ‘a disciplina

trase sempe cù’ discrezione mentre stò compunenno

ma spisso me chiamme quanne stò penzanno

Te siente ‘e ddì..staje ancora cumpunenno?

se vede proprio ca un tiene a che penzà!

Vvì che allerezza! Io me ne sto..ascenno!

ò ssaje ca nce stò pur’io ‘e ccasa ccà?

Stu strazzio dura senza sosta.. cuntinuamente

staie cunzumanno ‘a vista ll’udito e a currente

jurnate ssane ch’io stò sempe sola sola

senza avè manco ‘o tiempo ‘e scagnà na parola

E chesta secondo te è na sana vita coniugale?

ma famme ‘o piacere!Nunn’è nu buono accordo musicale

Marisè, scusame, nun te voglio mancà ‘e rispetto

mu nu iuorno capirraje pecchè me piace ‘o dialetto

io trascuro ‘a tte, ‘a ‘e ffiglie, ‘a e’ nepute

me vveneno ‘a truvà, io nun me n’accorgo,manco‘e salute

Sta passione mia è addiventata ormaje travolgente

rinunzianne a fa ‘o pueta sento ch’esisto pe’ ’niente

‘e iuorne ‘a notte quanne sboccia nu penziere

ca se ‘mpizza dint’o cerviello chianu chiano

ll’aggio acchiappà subbeto primma ca se ne và luntano

ll’acchiappo ‘a volo comme se pigliasse nu bicchiere

Io tenco stà passione, Marìsè, capìsceme

nunn’hà pozzo ‘a ntrasatta..distruggere!

E mentre perdo tiempo pe’ sta specie ‘e mania

scrivenno vierze semplice pure ‘nmiez’’a via

tu pienze ‘e ccose serie.. d’a vita quotidiana

‘e tassa, ò pesone,‘o mutuo e na bella parmiggiana

Dimane ‘nce ne jamme ‘a serapo

Stammatina a iurnata storta è accumminciata

Marisa sta nervosa..da quanne s’é scetata

va cammennando p’’a casa niente lle và iusto

p’ogne cosa che io faccio, dimostra disgusto

Robbè…guarda fore! Vire.. che bella ghiurnata!

dimane, si è accussì hà facimmo na scappata?

‘nce ne jamme..finalmente..a Serapo

c’è poca gente, ‘o viaggio sarrà comodo

No Marì dimane nunn’è cosa, ‘nce stà ‘a partita

na partita ‘mpurtante ’a Champion, è na finale

Marì, scusame, capisce! è a partita d’a vita

p’’e tifosi sta finale ‘e anche un fatto culturale

Io hò ssapevo, a musica ‘e sempe ‘a stessa

d’’a na vita facimmo sulo ccose ca vuò tu

tu putisse vivere bbuono sulo miez’e zulù

ed io me sò scucciato ‘e fà ‘o ‘cuopp’allessa

Pirciò tu non vuò veni, a mme che me ne ‘mporta?

dimane mattina verso sette io arapo ‘a porta

e me ne vaco felicemente in quel di Serapo

vedimmo sta volta chi s’hà nghiotta stà pillola

Risponco cu’ na santa pacienzia nunn’è ò caso

essa me rimprovera ca me piace ‘e sta ‘a casa

e cuntinua a ffà pe’ tutt’a iurnata ‘a scuntrosa

e ccierti vvote pure a sustenuta e puntigliosa

sino ‘ a quanno nun me stanco d’a sentì

e lle dico sottovoce jamme l’hà fernì

già te ll’aggio ditto aiere ca stevemo ‘npace

a Serapo, nun nce pozzo venì? Fatte capace

SUI RICORDI DEL PASSATO

Ricorde ‘e giuventù

Amico mio carissimo,stamm’a ssentì n’istante

nu poco ‘e pacienza..nunn’essere assillante

cuncèdeme sultanto poco cchiù ‘e mezzoretta

e io te conto ‘e fatte mentre te fuma na sicaretta

Sò rricorde ‘e giuventù, d’amice e d’ammore

ca me metteno tanta pucundria dint’’o core

rricorde belle e