An Official Organ of The Bangalore Mizo Association Registered Under Societies Act of Karnataka No.

: BLU-S188-2007-08 Date 7 May 2007

Vol. XVIII Issue No.33 Bangalore Mizo Association Pathian Nitin Chhuak Chanchinbu Date: 25th Nov., 2012 Phek khatna

TUALCHHUNG

BMA AW Sp

SEPTEMBER THLA MEICHHERA THUZIAK

-Lalhmingliana Saiawi

*MSA Day: Thla thar December ni 8 hian MSA Day hman tur ani a, Bangalore-a zirlai awm zawng zawng te he hun hmang tur hian sawm vek in ni e. He hunah hian MSA President ni lai lehkhabu ziah, Zoram Khawthlir tih chu tlangzarh ani bawk dawn ani. *Chhuanawm: Kan Member Samuel Lalrozama Hmar chuan Karnataka State aiawha SFL-a khel turin kum thum chhung contract a sign fel ta. Ani hi India rama Mixed Martial Arts (MMA) a hma la tute zinga mi in, kickboxing-a world No.3 tepawh l ni tawh ani. Tunah hian Fighter anih mai bakah National Official leh Judge ani bawk ani. A khelh chhoh zel naturah duhsakna kan hlan nghal bawk e. *Lawmpuina: Bangalore a kan mizo footballer leh BMA League a Chingsui team Captain ni thin Samuel Lalhruaitluanga leh Lalrinmawii techu November 22 khan Pathian hriatpuina in tluang takin an innei a, an kal zel natur ah BMA chuan lawmpuina leh duhsakna kan hlan e. *Scholarship form: Scholarship form Group 1 tlem a la awma, a duh chuan Sunday inkhawm banah BMCF leh BMK lamah leh MSA hruaitute hnenah a ngaihven theih e. A man hi Rs.20 a ni e. *Tawngtaipui ngai: Kan member Pi Rita I damlo alo dam chhoh zel theihnan tawngtaina ah I hre reng angu.

Meichher chanchinbu tichhuaktu leh tipuitlinga kum tam tak chhung tlin taka chhuah zeltu Pu R. Lalrawnan Meichher Vangin tih thu a ziah September Meichhera chhuah kha a ngaihnawm ngawt mai. Amaherawhchu thuziak thawh thintute a fak chiam chiam a, amah a indah tlawm angreng kha chu a ti zialo deuh: ani kha awm lo se chuan he chanchinbu tha leh pawimawh hi kan nei lo mai thei si a. Ani hi Meichher chanchinbu founder tih theih a ni si a. A fak zingah ka tel ve a, ka lawm hle a, mahse ka infak lohna tak pahnihah min fak tel tih ka sawi duh. Pakhat chu ram buai lai pawha sipaiho ngam loh min ti kha a ni. Ram buai hlauhawm vanglai kha ka tawng ve lo: sahimin Maharashtra-ah IAS hna thawkin ka awm a, 1969 November thla chawhnu lamah Zoramah chuan ka chhuak ve ta chauh a, chung lai chuan buai zualpuiin zia lam a pan tawh. Buai vanglaia ka haw loh chhuanlam chu ka nei ve. Ka patea (PSL Hlunsanga) Kawlkulh MNF unit president a ni a, MNF-in independence an puanna lehkhaah a hming a sign ve a, ram hnuaia a rawl bo dawnin lehkha min rawn thawn a, Shillong-a i naute lehkhazir pawisa ka thawn thei dawn tawh si lo va, i lo ngaihtuah a tul ta, a ti a. IAS probationer ka la ni a, ka hlawh la tam lo khawp mai si a, theih tawpa ka ren chung pawhin ka thawn tam thei ngang lo va, Zoram buai vanglaia hawna tur pawisa pawh ka nei lo a ni. Ka haw tum chuan ka fimkhur loh vangin Kawlkulhah sipai kut tuar an awm ta nghe nghe a, tun thleng pawh hian ka inthiam lo em em. IAS officer ve meuh chuan sipai biak that ka hlawh a, an captain-in zanriah min eipui a. Zep nak emaw, total prohibition state Maharashtra atanga haw tihtakah ka lem tam ve lu deuh a, captain chu sual deuh mai a lo ni a, ka haw hnuah a sipaite kan khaw nula pakhat a lak tir a, khawih a tum ta. Nula chu a huaisen hlauh a, atang ngam a, a khawih tak tak thei bik lo va. A thinur chu a tukah ka hnenah a lo kal a, a hekna lehkha ziahsak turin min ti a. Nula chu ka chhuang a, keimah vanga sipai officer sualin a tihbuai a ni si a, ka zah rilru a, ka inhaw hle. Nula hming chu sawi ka duh a, ka la hmu leh ta si lo va, a duh loh takin ka sawi rih lo vang. A hnenah chuan, Mizo tawngin lehkha chu ziak la, Aizawlah Bawrhsap ka pe ang a, i sawi duh chu tawngkamin ka hrilh zawk ang e, ka ti a. Kawlkulh AO office-a thawk pa huaisen Pu Hrangdailovan English-in a ziah sak a, chu chu Aizawla ka kir hnuin Bawrhsap Palit-a ka pe a, nula thil tawn chu ka hrilh a. Ani chuan, Mizo tawnga ziah ni se a tha tur. English-a ziah chuan enquiry tih hunah tang ngam lo ta se tihngaihna a awm dawn lo asin, a ti a. (phek thumna ah chhunzawmna)

Vol. XVIII Issue No.33 Bangalore Mizo Association Pathian Nitin Chhuak Chanchinbu Date: 25th Nov., 2012 Phek hnihna
Editor Dr. Lalhmingmuana Sailo Joint Editors Tv. Lalmuanzuala Tv. MC Zirsangzela Circulation Managers Nl. R. Lalnuntluangi Nl. Laltlankimi Hmar Tv. Samuel Khawlhring Nl. Vanlalnghaki BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

BMA Hruaitute
BMA AW chhuak hmasaa kan tarlan tawh angin BMA hruaitute chanchin tawi chhiar chhunzawm ila. Chhungkaw mamawhna avanga BMA Vice President nihna chelh mektu, Tv. Emanuel Lawmkiman Bangalore a chhuahsan tak avangin leh a aiawh rut/thlan a la nih loh avangin BMA Secretary chanchin kan rawn tarlang e. President chanchin kan hre tawh a, a thawhpuite hi eng ang mi nge an lo nih ve reng reng le? Jt. Editor

E-mail: bmanews@gmail.com Website: www.bangaloremizo.info

Editorial
Tunlai chu tu a te mai pawh hi internet khawvel ah kan cheng tam a, kalna apiangah leh thiltih laklawh lai thlengin mobile phone atangin Social Networking Sites te kan tlawh reng thei tawh a. Hei hian kan nun kawng tam takin a ti hlima, mahni a awm pawhin kan khua a har tawh meuh lo chu ani ber e. Hmun hran daih ah pawh awm ila chhungte nen leh thiante nen kan inkawm in kan inbe reng thei tehi changkanna in malsawmna a rawn thlen anih rualin kan hun tamtak awmze nei em em lova kan hman ralna ani thei tih kan hre tlang vek awm e. Hetiang kawngah hian a chin tawk kan hriat tlan a, a tangkai tawka kan hman thiam a tul hle in a lang. Chu mai piah lamah, hmel in hmu ngailo leh hriat ngailoh tenena kan inbiak kawngah, kan tawngkam hman ten mi rilru a ti na in rilru nuamlo takin mi kan siam thei ani tih hre tlang bawk ila. Ral khata kan thil sawi liam mai ang hian mi hian an lo dawng sawng lo fo tih kan hriat tlan a kan tawngkam tepawh kan fimkhur angi tih I hre thar leh ang u.

Secretary
Tv. Dr. Lalhmingmuana Sailo
Pian leh murna: Lunglei atanga 20km vela hla, Thehlep khuaa piang leh seilian a ni a. Kum 1998 atangin Lungleiah lehkha zira awm tanin, kum 2001 khan Rahsiveng Lungleiah chhungkuain an pem a tun thlengin an chhungkua a an inpui awmna ala ni zui ta zel ani. Hobbies: Mahminga hian zai a ngainain, thiante zinga hlim taka nuih hi nuam a ti ber. Tin, thuziak a tuiin, infiamna pawh a tui, a palen angin Valleyball khelh nuam a ti ber. Tin, facebook vengtu zingah a inziak lut tep tawh niin thu kan dawng. Khawtlang leh Kohhran: Lehkhazir leh hna avangin hmun hrang hrangah awm kualin buai thin hle mahse a theih ang angin Kohhran leh khawtlangah a in hmang thin ani. BVSc&AH a zirlaiin, Mizo zirlai pawl (AMVMSA) weekly BulletinLersia leh 1st Annual Magazine Raltiang Ram Editor a ni a. Tin, tunah hian kan BMA General secretary leh BMA AW Editor a ni mek bawk. Baptist Higher Secondary School Serkawnah, Evangeilcal Union Secretry hmasa ber niin, Veterinary College Christian Fellowship (VCCF) Secretary tum hnih chelh tawhin, UESI RT Nagar area Secretary nihna a chelh tawh bawk. Tunah hian BMCF Music subcommittee secretary a ni. Hetianga khawtlang leh kohhrana in hmang leh mi tlawmngai Bangalore mizo ten kan nei hi vannei kan in ti hle a, nakin zelah pawh keini Bangalore khawtlang tana in pe zo taka a in hman leh zel kan beisei bawk ani. (Jt.Editor) Bangalore Mizo te tana a thuchah: Kan zirna leh hnathawhna theuhah rinawm leh rintlak takin awm theuh ila. Mi rama cheng kan nih hre rengin fimkhur taka nungin, inthuam ila khawsa ila. Midangte rel mai lova infuihtawn zawkin, kristian kan nihna kawng engkima lantir zelin, zonunmawi vawn nun zel tum theuh ang u.

Vol. XVIII Issue No. 33 Bangalore Mizo Association Pathianni Nitin Chhuak Chanchinbu Date: 25th Nov., 2012 Phek thumna

Article chhunzawmna Nula lehkha chu a nghawng a na ta viau. Assam Rifles hotute Kawlkulhah an kal thuai a, enquiry an han ti a. Misualpa khan nula chu pawi thamin a khawih hman si lo va, hrem lohin a fihlim dawn niin a lang ta a. An haw leh hnu chuan captain sual chu Khawkulh khawtlang chungah a che ta. Nula lehkha ziahsaktu kha a man a, kah a tum a, kah zawng a kap ta em lo. Ka nau pawh a sawisa deuh. Chu chu ADM VS Jaffa hnenah ka sawi a. Misualpa chet dan chu a han zawt chhuak a, a thin a ur nasa ta. Ka hnenah, He misual hi hrem lohin a chhuak lo vang, a ti a. Chumi hnu lawk chuan AR motor-a chu pa chuang chu khawlaiah ka hmu a, min melh rum hle. Nupui neih tuma tul ve ka ni a, engtin nge ni ta tih hre hman lovin Bombay-ah ka haw san a, a hnua ka hriat leh dan chuan chu pa chu ban a ni. Ram buai vanglaiin vairam hlaah sawrkar hna thawkin sa himin ka awm a, Zorama buaina tuartu Mizote khawngaihthlak zia ka hmelhriat vaiho hnenah ka sawi ve thin a, mahse ka lo hre tawk lo tawp. Buaina a zia tawh hnuah mah khatiang khan sipai sual tihduhdaha sawisak tuar an la awm si. Mizo mipui vantlang ei tur tha hmu lovin, sipaite hlau reng rengin, pasalthate kut pawh tuar hlauin an awm a, kei chuan ka lo hrethiam phak lo a ni tih ka hrethiam ta deuh a ni lek si. Mizo mipui an khawngaihthlak a, kan hmeichhiate sipai tihluih tuar an awm a, vai lo ngaizawng tawk an awm bawk. Chutiang vek chu an ni lo tawp a, kha Kawlkulh nula ang kha khaw dangah pawh an awm ngei ang. Kawlkulh AO office-a Pu Hrangdailovan sipai hotu sual hekna nula huaisen a ziahsak mai pawh kha a thih phah thelh a, Mizoram sawrkar hnathawk sipai sual hrawnte tana huaisen a harsat tur zia pawh ka hmu thiam ta deuh. Novel ziak thin ka ni a, Lungrang Hmangaihna, Keimah Unionliana leh Nukawki Fanu novel-ahte a changtuten ram buai lai an tuar thu ka sawi a, C. Lalawmpuia Vanchiauan kumin May-June Zolife-ah tihian min sawi: Ram buai laia a fictional character-te a hum bik tlat zel hi a fair lo, tiin. Ram buai kha a na em mai a, thawnthua a changtu ber pawngsual tawh tir emaw, thil tir emaw mai pawh ka ngam lo a ni ber e.

IAS officer-in sawrkar hna dang Administrative Tribunal member hna ka thawk ta daih kha chhuan tur ka ni emaw Pu Rawna sawi danah khan tih theih a ni ang a, chutiang ka ni si lo. IAS hna kum 28 ka thawk tawh tihin Maharashtra sawrkarin hna fere deuh min thawh tir leh thin tawh a, sawrkar tan tangkai ka inti tawh lo va, Bombay khawpui veng tha lai bera flat zau nuam athlawn deuhthawa min luah tir leh ka hlawh tam ve fu tawh ka phu lo tih ka hria a, kum nga aia rei la thawk zel thei ka nih laiin Maharashtra Administrative Tribunal member hna thawk duh IAS officer senior Central Government-in an zawng a, ka duh tih ka sawi a, IAS voluntary pension-a chawlhsanin chu hna chu ka thawk ta a ni. Ka vai IAS thian thenkhat chuan, Duh suh. I pension a tlem zawk dawn asin, min ti. IAS kha ka pension hun thlengin thawk tluan ta ila chuan tuna ka pension ai hian ka la tam deuh zawk ang: mahse ka inchhir map lo. IAS hna kha thawk tha ka inti lo va, Tribunal hna kha chu ka thawk tha a, ka hlim a, ka pension hnua ka ngaihtuah chhuah chang pawhin ka hlim. Sawrkar hnathawk tangkaina nei lo, sawrkar ti huatak mai mai an tam. Kei anga inthlahrunga pension hun hmaa chawlhsan ngam hi an vang. Chu chu ka inchhuan vena a ni. Sawrkar officer an pension tawh hnua la thawk tung tungte hi Mizo hian kan sawi duh viau a, ngaisang tawk pawh an awm. Kei pawh chutiang chu emaw min ti an awm a, min fak nana sawi pawh an awm. Chutianga thawk ka ni awkawng lo. Tribunal hna thawk tur chuan hna dang thawh nei lo nih a ngai a, ka pension hun hma daihin voluntary retirement-in ka la thawh zel duh IAS ka chhuahsan a, chu hna chu thawk ta ka ni zawk. Sawrkar officer-te hi an pension a hun tawh chuan tha takin an chawl tawh tur a ni. An pension hnu pawha la thawkte hian an hna thawk ve duh thangthar an dang a ni a, chu chu kei ka tih ve duh loh zawng a ni. Sawrkar hna atangin ka pension a, Zalen ka ni lo vem ni? tih rilru puin sawrkar thil tih dan dik lo a ruh langin ka sawi thei a, minister leh sawrkar hnathawk sawisel tul tih ka hriat chu ka sawisel a, chief minister meuh pawh ka sawisel thei. Sawrkar hna la thawk ila chuan ka thei lo vang. Pension hnua sawrkar hna la thawkte pawh an ngawi duk mai a nih hi. (Pu Hminga, thu ngaihnawm leh tha tak i rawn ziah avangin kan lawm e. Jt. Editor) ******************************************* *

Vol. XVIII Issue No.33 Bangalore Mizo Association Pathianni Tin Chhuak Chanchinbu Date: 25th Nov., 2012 Phek lina

Angela Merkel
-Lal Muanzuala Tun tum chu Khawvela hmeichhe thiltithei ber leh khawvel mihring dam lai zingah pawh US president, Russian prime minister leh China president te dawta thiltithei ber palina hauh mek tu, German chancellor, Angela Merkel-i chanchin tlem I han tarlang mai mai teh ang. Anni ho hi khawvel economy sawi nghing lawih thei thutlukna siam theitu leh khawvel politics vei vir tute ti ila kan ti sual awm love. Tunah pawh Burma ah chuan Super power pahnih an in tlan siak mek a, US in democracy chawi nun tumin Aung San Suu Kyi an support a, China in comunist duhin an General an suport ve thunga. Hetiang vel vang hian Burma economy pawh hi a la rawn than chhoh awk a rinawm reng ani. Hetiang khawpa power nei te zinga Angela Merkel a rawn tel thei hi nu ngaihsan awm tak chu ani ve reng reng a. A pian leh murnate leh a pian kum te sawi duah aiin politics a alo hlawhtlin dan lam hi a pawimawh zawka, I han thlir thuak thuak dawn teh ang. German an in zawm leha Berlin Wall an tih chhiat hma lawk khan politics ah zuang lut ve in a tir ah chuan deputy spokesperson a tang te te a, politics a a luh hun kha a fuh ve bawk nitur ani German an han inzawm khan an Lower house (Lok Sabha ve ang) ah thlan tlin ni in Helmut Kohl a Chancellorna hnuaiah Minister a ni chho zui ta a ani.

A leh pek inthlan ah pawh Helmut Kohl a hnung zuiin minister ani chho ta zela, khatia 1998 a Kohl a sawrkar an tlak khan an party, Christian Democratic Union (CDU), General Secretary hlan kai ani chho ta ani. Hetih hun lai hian Angela Merkel I tan hun tha a rawn in her chho a, an party hruaitu lu ho kha Scandal thubuai ah an in ti hnawk chho ta a, kum rei tak a hnung a lo zui tawh leh amah duhsak em em thin tu, Helmut Kohl pawh chu a in hnamhnawih avangin, dikna tanin nasa takin a do chho ta a, a hnu pheichuan an an party chairman nilai Kohl a thlak tu aiin part hruaitu turin mipuiin an thlang chho ta ani Hun alo kal zel a 2005 a rawn in her chhuah meuh chuan Hmeichhe German Chancellor hmasa ber atana thlan alo ni ta a. Hemi bakah British nu ropui Iron Lady an tih, Margaret Thatcher tih loh ah chuan G8 chair ni thei awmchhun alo ni chho ta ani. *******************************************

Thuphachawina
BMA Directory chungchangah, a buatsaihtuten uluk taka an ti chungin khawl lam chiangkuanloh avangin tihsual a awm ta nual thova. Print vek tawh ani a siamthat leh mai theih ani tawh silo a. Chuvangin BMA chuan in mi hriatthiamna a dil tak meuh meuh ani. ******************************************* OPERATIONS CHRISTMAS RICE BAG PROJECT MORNING STAR Donation pe duh tan Pi Nicole I hnenah a pek theih reng e.

Pics of the Week!

(Chawngkhum Dan Tlang Huat loh)

BMA Sr. adviser Pu Ramdinsanga Saiawi (Mapuia Saiawi) hi Bangalore Mizo zinga hre lo kan awm a nih hlauh chuan Mizo thiltihnaah kan lang tam lem lo a ni ngei ang. Pu Mapuia hi Mizo zinga IAS leh thuziaktu lar Pu Lalhmingliana Saiawi fapa upa ber niin, IIM-Kolkata chhuak a ni. Zai a ngaina, a zaithiam bawk. BMA Freshers day leh Vangpui Kut Cultural exchange Nite-a kal kha chuan kan hre vek awm e. Pu Mapuia hi mi sipisial kan hriat tawh zinga mahnia honeymoon hmang thei awm chhun a ni mai thei, a chhuanawm dangdai kan ti. Tlangval sum inren deuh tan chuan Pu Mapuia honeymoon hman dan hi a entawn tlak viau mai thei. Sumsen a tlem dawn a Honeymoon special hre duh tan Editor a zawh fiah theih reng e.