PAULS EPISTEL IM GALATS 1.

1° Paul, apostel, neter nami i menscens, ni per un mensc, sontern per Jesus Christ ed Dieuspater, qui hat scricen iom ex i mortus, 2° ed vasyi swesgens qui sont con me, ibs Kyrks os Galatia : 3° grace ed pace vos sontu dahn nami Dieuspater ed nies Poti Jesus Christ, 4° qui hat daht seswo ob noster synts, kay rehve nos ex id present khak aiwo, sekwent id vol nosters Dieuspater, 5° quei estu id klewos in aiwa iom aiwa ! Amen ! 6° Daumo ob yu disvolcte tem prompt-ye ud tom qui vos hat kalt per id grace os Christ, kay passe alyi Euanghelyi. 7° Ne ob est alyum Euanghelio, sontern sont leuds qui vos troublent, ed qui volveihskwnt id Euanghelium os Christ. 8° Bet, quan weyswo, quan un waurnangel mehldiet alyum Euanghelio quem quod vos hams prechen, estu anathema ! 9° Habmos sayct to prever, ed to repeteihm ye tod saat : sei semanghen vos mehldt alyum Euanghelio quem quod yu habte daken, estu ananthema ! 10° Ed nun, kwe eiskwo id favor im menscen, we tod os Div ? Kwe plaisskwo i menscens ? Sei dar plaisiem i menscens, ne esiem sloug os Christ. 11° Io vos declare, swesgens, od id Euanghelio quod hat est mohldt ab me ne est ex el mensc ; 12° hoghi neter dact ni uct id ud un mensc, sontern per un revelation os Jesus Christ. 13° Yughi habte woiden quod eet prevst conduct in yahadut, kam extermeid persecutim ed ravagim Divs Kyrk, 14° ed kam perodher eem in yahadut quem maungs om mien oumer ed nation, esend animen ab un excessive yatunia dia ia traditions mienen paters. 15° Bet, kun plaisit tom qui me hieb dehn seni yant id inster as mienu mater, ed qui me hat kalt per sien grace, 16° revele in me sien Sunu, kay io mohld iom bayna i pagans, fauran, consultim neter krewos ni aserng, 17° ed io nel-ye lud ad Jerusalem kye tens quoy buir apostels pre me, sontern io fortrohc do Arabia. Dind, io rik iter Dimaschk.

18° Tri wetsa serter, ludim do Jerusalem kay bignohe Cephas, ed io bieytel bei penkdem diens. 19° Bet io vis niom alyum apostel, ploisko Jacob, iom brater ios Poti. 20° In quo vos oiscribo, en, ant Div, nel-ye leugho. 21° Gwahsim dind ia gaivias Suria ed Kilikia . 22° Api, eem negnoht lige-ye ab ia kyrks Iudayas qua sont in Christ; 23° tik, ia hieb klut : Qui prevst nos persecutit mehldt nun id Fid quod is se strohng tun ad destruge. 24° Ed klewosdehr Div de me. 2. 1° Quardem yars poskwo, io lud iter do Jerusalem con Barnabas, ghendus iomschi Titus con me; 2° ed ludim tetro yeji un revelation. Io ibs expos id Euanghelio quod io preche bayna i pagans, io expos id besonters im prominents, mae drahe we drahvs in vain. 3° Bet ad Titus, qui eet con me, ne buit hatta dwighen se khatnihes. 4° Et to, ob i fals swesgens qui hieb nin-ye introduct-se ed snohct bayna nos, kay luure id lure wey hieb in Jesus Christ, persclavskwnd-ye nos. 5° Wey im cess neid khvil ed resistam ir keupens, kay id druve ios Euanghelio buit mantint bayna vos. 6° I prominents, - quikwe buir xiawngja, to ne importet : Div ne lambhent menscprotiokwo, - i prominents mi impos neid. 7° Punor, vidend od id Euanghelio mi hieb esen betrusen pro iens rhayr mukhatnas, kamad Peter pro iens mukhatnas, 8° - quighi hat kwohrt ex Peter iom apostel iom mukhatnas hat yaschi kwohrt ex me iom apostel im pagans; 9° ed recogneihvs id grace quod mi hieb est ijapt, Jacob, Cephas ed Iohannes, quoy sont ayn colunns, mi dahr, ad me ed ad Barnabas, dexter communitats kay gwahsam, wey men kyi pagans, ies de kyens mukhatnas. 10° Nos recommandeer tik mehme i orms, de quo ho suakaurn. 11° Bet kun Cephas gwohm do Antakya, resistim iom face-ye, ob is eet dusgnohim. 12° Preghi id arriven oiken leuds yisen ab Jacob, is mejit con i pagans; ed, quando hiebeer gwohmt, is abvic ed mien apo, bayndo iens mukhatnas.

13° Con iom alter Yudis useer yaschi lughieve, tem quem hatta Barnabas buit dribhen ab ir hypocrisis. 14° Vidend od ne ghiengeer seid sekwent id veria ios Euanghliios, io sieyg ad Cephas, in presence quanten : Sei tu qui es Yudi, gwivs swod i pagans, ed ne swod i Yudis, ma dwinghs tu im pagans yudie ? 15° Wey smos Yudis ex gnahsa, ed ne synters ex i pagans. 16° Lakin, woidend od ne per ia wehrgs ios loy est el mensc justifiet, sontern per id fid in Jesus Christ, weyschi hams crediht in Jesus Christ, kay ses justifiet per id fid in Christ, ed ne per ia wehrgs ios loy, ob neid krewos sessiet justifiet per ia wehrgs ios loy. 17° Bet, menxu eiskwos ses justifiet per Christ, sei weyswo esiems pohnden synters, esiet Christ un diaken os synt ? Mae to bihtu ! 18° Seighi restrugo ia jects ho destruct, meswo skeipo transgressor. 19° Ego ghi per id loy som mortu dia id loy, kay gwivsiem pro Div. 20° Buim crucifixo con Christ; ed sei gwivo, ego men neti gwivo, Christo de gwivt in me; sei gwivo nun in id krewos, gwivo in id fido dia Divssunu, qui me hat kamt ed hat seswo prodaht pro me. 21° Ne rejeco id grace os Div; sei nu justice biht dact med id loy, Christo de mohr in vain. 3. 1° O aunsense Galats ! Quel vos ge hat fascinet, ant quim okwi Jesus Christ hat esto descript ka crucifix ? 2° Eno tik volo manthes ud vos : kweter per ia wehrgs ios loy habte yu daken id Spirit, we per id predication ios fid ? 3° Ste yu tem aunsense ? Pos inkapus med id Spirit, fineihskwte yu nunkye med id krewos ? 4° Habte yu tant payss in vain ? sei yed to est in vain. 5° Qui vos ijapt id Spirit ed qui tyeict miracles bayna is, kwehrt is to per ia wehrgs ios loy, au per id predication ios fid ? 6° Kam Abraham credihsit in Div, ed od to ei buit imputet dik-ye, 7° recogneihte ghi od sont sunus os Abraham yoy hant id fid. 8° Also id Scripture, previdend od Div justificiet i pagans med id fid, hat in avance mohlden tod sell khabar ad Abraham : vasya nations sessient blaghen in te !

9° kay qui credeihnt sont blaghen con Abraham iom fider. 10° Quanti ghi se attachent ibs wehrgs ios loy sessient sub id balstehmen ; est ghi scriben : Balstohmt est quelgvonc ne dyeit quantum est oiscriben in id buk os loy, ni empraxiset id. 11° Ed od nimen sia justifiet ant Div per id loy, to est evident, chunke est saygen : el prabh gwivsiet per id fid. 12° Api, id loy ne proceddt ex id fid; sontern id sayct : Quel siet emmpraxise ta jects gwivsiet per ia. 13° Christ nos hat redempt ex id balstehmen ios loy, bihvs balstehmen pro nos, - est ghi scriben : balstohmen est quelgvonchangen kata id dreu, 14° kay id blaghen os Abraham hiebit pro i pagans sien riawdals in Jesus Christ, ed kay wey diek med id fidum id Spirit quod hieb esen promitten. 15° Swesgens (bahm swod i menscens), un testament in dohbro forme, quayque kwohrt ab un mensc, est bataliht ab nimen, ed nimen ei addeiht. 16° Api ia promiss hant est kwohrt ad Abraham ed eysi semen. Ne est sayct : ed ibs nassels, kamsei leitiet de plurs, sontern ka oini : ed tieni nassel, yani ad Christ. 17° Eno auro : un testament, quod Div hat confirmet prever, ne poitt ses bataliht, ni katha id promiss vainiht, per id loy ubgwohmen quarcent trigim wetsa serter. 18° Seighi id loikwn gwehmiet ex id loy, neti gwehmiet ex id promiss ; api, med id promiss hat Div kwohrn ad Abraham tod don siens grace. 19° Ma tar id loy ? Id hat esen dahn dind ob ia transgressions, hina gwohm id nassel quei id promiss hieb esen kwohrn; id hat est promulget ab angels, med un ambact. 20° Api, is ambact ne est ambact oinios, menxu Div est oin. 21° Kwetar est id loy contra Divs promissa ? Mae to bihtu ! Sei hieb esen dahn sem loy quod hieb ghohdt procure gwit, justice gwehmiet druv-ye ex id loy. 22° Bet id Scripture hat arohcto quanto sub id synt, kay quo hieb esen promitten buit dahn per id fid in Jesus Christ ad qui credeihnt. 23° Pre id fid gwohm, eems loybohnden, pro id fid quod dohlg ses revelet. 24° It id loy hat esen kam un pedagog pro nos duce ad Christ, kay buam justifiet per id fid. 25° Gwehmus id fid, neti smos sub tod pedagog. 26° Ste ghi quanti sunus os Div per id fid in Jesus Christ;

27° yu quanti, qui habte esen baptisen in Christ, yu habte endut Christ. 28° Est neti Yudi ni Hellen, est neti sclav ni leur, est neti wir ni gwen; quanti ghi yu ste oin in Jesus Christ. 29° Ednu sei ste Christios, ste de id nassel os Abraham, hereds sekwent id promiss. 4. 1° Api, tan el hered est magv, saygo el differt nel-ye ud un sclav, quayque el est mayster os quant ; 2° bet est sub kaurers ed economs tiel id tid marct ab iom pater. 3° Weyschi, sam-ye, quan eemos magvi, eemos sub id sclaverie iom rudiments ios mund ; 4° bet, kun id completion ios wakt hat gwohmt, Div hat yisen sien gwengnaht Sunu, gnaht sub id loy, 5° kay is redempsit qui eent sub id loy, kay wey diek id adoption. 6° Ed ob ste sunus, Div hat yisen do nies kerds id Spirit os sien Sunu, yo criet : Abba ! Pater ! 7° It neti es sclav, sontern sunu; ed sei es sunu, es yaschi hered per Divs grace. 8° Prevst, ne gnohnd Div, servat Divs qui ne sont it ex ir buhsa; 9° bet taiper gegnohsat Div, we anter ste gegnohmen ab Div, kam reicte yu ta slab ed orma rudiments, quibs iter yu dar vos persclavskwte ? 10° Yu dyeite diens, munts, tids ed yars. 11° Baym inutil-ye wehrgus pro vos. 12° Ste men kam ego, ioschi de som kam yu. Swesgens, io vos iltije. 13° Yu ne mi habte kwohrt neid zulm. Yu woid to buit bi-sabab un krewossakiete od vos ho ye id prest ker docen id Euanghelium. 14° Mi ordilen ab mien krewos, yu habte schahiden neter honno ni marz; yu punor me habte primen kam un angel os Div, kam Jesus Christ. 15° Quer tar est id wekwos vosters noroc ? Ioghi vos schahide od, sei to habiet est possible, yu habiete rohfto vies okwi kay dahe ia mi. 16° Ho io biht ir peind saygend-ye druve ? 17° Id yatunia quod hant pro vos ne est pur, bet leuskwnt vos ud nos, kay yu yatte pro i.

18° Bell est yate pro quod est sell ed ye cada tid, ed ne tik quando som present bayna vos. 19° Mien purts, pro qui spreuvo iter ia gvols os gehnen, hina Christ hat wardhen in vos, 20° eiskwo ses nun bi vos, ed mutabahe, sweurgho ghi de vos. 21° Saycte mi, yu qui volte ses sub id loy, nekwe aurte yu id loy ? 22° Est ghi script od Abraham hieb dwo sons, uter ex iam sclav gwen, ed alter ex iam leur gwen. 23° Bet so ias sclav gnahsit sekwent id krewos, ed so ias leur gwen gnahsit in virtut ios promiss. 24° Ta jects sont allegoric; tasghi gwens sont dwo alliances. Utra ex mont Sinay, gehnend pro sclavdem, est Agar. 25° - Agar ghi, est mont Sinay in Arabia, - ed ia correspondt id actual Jerusalem, quel est in sclavdem con sien purts. 26° Bet id Jerusalem ter ub est leur, est nies mater ; 27° est ghi script : Ghawd, mando, tu qua nel-ye gehns ! Sprehng ed emitt cries, tu qua ne has oispruven ia gvols os gehnen ! Ighi purts ias ablikwn sessient kathirer Quem ti as qua eet wohdt. 28° Pro vos, swesgens, kam Isaac, ste purts ios promiss ; 29° ed sam-ye quem kun qui hieb gnaht sekwent id krewos persecutit tom qui hieb gnaht sekwent id Spirit, it est dar nun. 30° Bet quod sayct id Scripture ? Chasse iam sclav ed aysum son, isghi son ias sclav niet herite con iom son ias leur gwen. 31° Itak, swesgens, ne smos sons ias sclav, sontern ias leur gwen. 5. 1° Pro lure nos hat Div asadhihn. Remante ghi darm, ed mae sinte vos iter dehe sub id yug os sclavdem. 2° en me Paul, vos saygo od, sei yu vos khatneihte, Christ vos deulcsiet neid. 3° ed io schahide iter quanti wir qui se khatneiht, od is oiskeult kwehre id hol loy. 4° Ste separet ud Christ, yu qui eiskwte justification in id loy ; ste decheen ud id grace.

5° Pro nos, ud id fid intizarmos, per id Spirit, id speh os justice. 6° Inghi Jesus Christ, neter khatna ni rhayr khatna hat wirt, sontern id fid quod est agend per charitat. 7° Suadrahsat : quel vos hat halt, kay vos oistambhes obedihes vertat ? 8° Tod influence ne gwehmt ex tom qui vos kalt. 9° Lyt yum ftaseiht id hol doigh. 10° Ho tod trust in vos, in iom Poti, od yu niete mehne als. Bet quelkwe vos troublet behrsiet id pein ex to. 11° Pro me, swesgens, sei io dar preche khatna, ma som io dar persecuten ? Idghi scandal ios cruce hat dispariht ! 12° Sontu kastert qui dehnt id trouble bayna vos ! 13° Swesgens, yu men habte est kyucti do lure, mae nu kwehrte ex tod lure un pretexte os gwive sekwent id krewos ; sontern de, per id charitat, slougeihte vos dia mutu. 14° Idghi hol loy est parkwohrn in oin wekwos, in tod : Kamsies tienem niebst kam teswo. 15° Bet sei yu dehncte ed praeddte mutu, warte mae ses destruct ob mutu. 16° Saygo ghi : Greddte sekwent id Spirit, ed yu niete parkwehre ia wehnsa ios krewos. 17° Idghi krewos hat wehnsa anti tibs ios Spirit, ed id Spirit hat sem antis tibs ios krewos; sont witer ad mutu, mae yu kwehrte quodlibt. 18° Sei ste niht ab id Spirit, ste nel-ye sub id loy. 19° Api, ia wehrgs os krewos sont aschikar, sont bescharamia, duskweitert, dissolution, 20° idolatrie, magia, ghieterts, faydhs, jalousias, animositats, disputes, divisions, sectes, 21° hassadias, piordrehnken, piormejen, ed samliks. Vos saygo in avance, kam ho ja sayct, od qui committe solg jects nient herite Divrig. 22° Bet id fruit ios Spirit, est liubh, joy, pace, patience, karam, suamenos, dervia, mliieke, temperance ; 23° Id loy ne est contra ta jects.

24° Qui sont ad Jesus Christ hant crucificten id krewos con ids passions ed ids wehnsa. 25° Sei gwivmos per id Spirit, smadschi ghange sekwent id Spirit. 26° Mae smad iskwes un vain klewos, provoquend-ye mutu, jalouseihnd-ye mutu. 6. 1° Swesgens, sei unis menscis gwehmt ad ses surpris in cada fault, yu qui ste spiritual, rogyet el med swadh menos. War teswo, maeschi sias tenten. 2° Behrte mutus behrmens, ed yu parkwehrsiete it id loy os Christ. 3° Sei semanghen mehnt ses semject, quayque el est neid, el seswo abuset. 4° Ielg chehxtu sien wi wehrgs, ed tun al sessiet zaruri se klewosdehe pro se mon, ed ne nisbatan alyem ; 5° ielgis ghi behrsiet sien wi behrmen. 6° Tel qual est doct id wekwos bayantu sien quant wesus ad quel al doct. 7° Mae smad rhalte ter : Div ne est goilen. Quo unis mensc habsiet seht, toschi el ghiensiet. 8° Quel seht pro sien krewos ghiensiet ex krewos corruption ; bet quel seht pro id Spirit ghiensiet ex id Spirit abadic gwit. 9° Mae smad nos malale de kwehre id sell ; ghiensiems ghi ye dohbro tid, sei ne relaxems. 10° Itghi, menxu hams id waurmen pro, smad practie sell dia quantens, ed hassa dia i swesgens in id fid. 11. Vidte med kam mier buksteivs vos ho script swoghesor. 12. Quanti se amateihskwnt sekwent id krewos vos dwinghe vos khatnihes, wahid-ye mae siant persecut ob id cruce os Christ. 13. Ar iesswo mukhatnas nel-ye dyeint id loy; bet eiskwnt ke ste khatnen, kay se klewosdehe in vies krewos. 14. Mae de ego me klewosdehm ob alyo quem id cruce os nies Poti Jesus Christ, per quom id mund est crucificten pro me, kam som it pro id mund ! 15. Neidghi est ses khatnen we rhayr khatnen; quo est semject est ses unis nov tyict. 16. Pace ed rahimia ep quantens qui sehkwsient tod reul, ed ep Divs Israel ! 17. Mae anghen mi kwehrtu pein, behro ghi ep mien corpos ia marks os Jesus.

18. Swesgens, id grace os nies Poti Jesus Christ estu con voster spirit ! Amen !