Nipi Sawm Sung America Ngam Mission Khualhawhna

Thupatna:
Tunung nipi sawm [tha nih le lang] June, July, August sung America ngam sungah Sizang kampau
missionary khat mission trip khualhawhna hun hong bo zo a, tu in Kawlngam Zangkung khuapi hong
theng kik zo ahi hi. Sizang u-le-nau a kuamahpo ii thu ih ngetpuina tawh cidam ludam le lawhcing tak in
hong ciakik thei ahi hi. Amah khualhawh hun lam a he man ngawl zongh a khom khat a om bang mah, a
heakpui zongh a khom khat mah ki om ahi hi. Bangbangpo ahizong Sizang u-le-nau nu-le-pa te in ki
lungdampui le ki thukimpui tek ci in ih mu a, ih biak Pathian Min ih pok hi. America khualhawhna thu le
muna pawlkhat ih ki hawmsawn kik nuam hi.

1. Ngam-sung-ngam-pua Kilenglet Zo
Tuhun ciang in leitungbup sia khuano pui khat bang in ki ngaihsun tek zo ahi hi. Sim leitung bup
[Zo leitung cibang om tuan sap ngawl...] sia tui bang hi le luan khat, thingkhua bang hi le kuan'
khat, thau bang hi le lawng khat cibang in tuiton theina tu ngaihsutna tawh ki globalized laitak
ahi hi. Globalization Sim leitung kipeina sungah ngam khat le ngam khat, nisuakna le nitumna,
sak le thang dei bang in olno tak kikawm hun hong theng zo ta ahi hi. Pilna khangto mahmah a
thukizakna information le kizopna communication technology manlang mahmah zo ahiman
leitung bo tu zongh nai vasat zo ci in ki ngaihsun tek hi. Tua thu tawh kizui in, Jesu Christ hong
pai kik tu hun nai vasat zo ki ci tek a, America ngam ah ei mi te sung zongh ah rapture mi
thiangtho laktona le second coming nihvei hong paina hun nai vasat zo ahi lam a uang son zongh
ki om ahi hi. Tua ahi le sangmang mission nasepna sia tuhun in sep kul lai tu mah ziam? Ahi bua
le kul nawn ngawl a, vangtung ngam thengna tu ei ma pumpi le thin sung thingthotak kinging
khol tu bek mah thupi zaw ziam, ci in dokna zong om ahi hi. Hi dokna ki zo paih le'ang sepkul lai
leilam ahi hi. Banghang ziam ci le minam tuamtuam te in Jesu sia ngumpa le Topa in hong sang
thei tek phot tu kisam ahi hi. Tua ahikom tuhun globalization hun sungah 'Jesu in Christ ahi hi' ci
in tanglai nungzuite in a tangko bangmah tu hun leitungmi million 7,000 te tungah ngupna
lungdamna thu tangko tu kisam ahi hi. Minam theampo in Jesu' ngupna thu a bil uh tawh za tek
in, a thin sungah a um tu sia Pathian deina ahi hi. Mission ih ci sia in ei a hi ngawl zaw a, Pathian
a ahi zaw hi: Pathian' mission ahi hi. Latin kam in missio dei kici hi.
Lungdamna thu tangkona ah a tamzaw in ei mah' pawlpi thubulphuh khawng teng veu bang mah
tel meal ngawl lai te tung ah ih tangko bel thei luilam hi. Tasia in Christ Ngumpa mihing te ii a
muna tu pan lia in musak ngawl ahi hi. John chapter 4 sungah Jesu in Samaritan numei tawh a
kimu lai in, Christ ahi hunlam direct in kison paih zaw a, Jewish pawlpi thukhun, thukham, ngeina,
etc. khat zong son ngawl hi. Christo-centric mission Christ ngumpa bulphuh sangmang nasepna
ahi hi. Ei mah pawlpi bulphuh mission nasepna sia ekklisio-centric mission hi a, Jesu in zangh
ngei dek ngawl hi. Colonial hun lai ngamkeakte in pawlpi bulphuh sangmang nasepna hong
zangh ahi hi. Tua hu in Kawlngam Zongam bangah ABM kici American Baptist Mission te hong
thahat ahihu in Kawlngam bup sia Baptist Kingdom hong suak hi. Tuni dong ciang Kawlngam
sungah a tam zaw in Baptist bekmah pawlpi ngina le thupi ih sa tek lai hi. Pawl dang te in zongh
ei mah pawlpi bek thupi in ih ngaihsun tek hi. Tua in Kawlngam sungah Christ Ngumpa kilangh
thei ngawlna tu a phualseal tawntung khat ahi nginge hi. Tuni in nang le kei in koisia zaw tawh ih
kalsuan ziam? Christ bulphuh maw, Pawlpi bulphuh?

2. Mission Khawmpi & Ameri-Sizang U-le-nau tawh Kimu Ka'kawina
ASM [American Society of Missiology] ci-in America ngambup sangmang pilna tawh kisai scholar
mipilte kipawlna pan kumsim khawmpi khat veu nei uh a, leitungbup pan kisiim in ki pai tek bul
ahi hi. American te mah sia leitungah pilbel veve thong hi. Tua kipawlna sung ah APM
[Association of Professors of Mission] ci-in professor teng kipawlna khat om tuam lai ahi hi. Tua
APM te ii American professor teng bek kikhoptuamna khawmpi ah lecturer 16 ?? sung pan ei
Sizang kampau khat Kawlngam pan kihel lei ih hi man ih angtang tek hi. Ih scholar pa Topa
Pathian in tangzaitak hong zaksakna tu thungetna ah ih phawk tawntung tu hi.
Tutung APM, ASM khawmpi sia Minnesota ngam St. Paul khuapi ah ki vawt ahi hi. Nidang sia
kum sim in Chicago ah ki vawt ahi hi. Mailam ah St. Paul ah vawt suak thei tha tu ahi hi: mihing
te ii vote tung tawn in ki khensat tu ahi hi. St. Paul khuapi sia a nuam mahmah khuapi no khat hi
a, mihingte zong nunneam in dik thei peuhmah ahikom ei a pa bang a lungkim in nuamsa
peuhmah ahi hi. St. Paul khua ah eimah Sizang kampau innkuan khat bek mah om a, Cinpui te
innkuan ahi hi. Ei a pa St. Paul khua a theng ciang zintunna Northwestern University campus
sungah hawh in US ngam sung om lai teng zak thei tu cell phone thak khat leisak in prepaid card
thunsa in vaidawn paih ahikom ei a pa in mun tuamtuam pan Sizang u le nau tawh nuamtak
kizom thei paih ahi hi. Topa' Pathian in suapui Cinpui te innkuan tungah thupha tampi hong
piaksak tahen! Inn nuam lo nuam tawh om tu in hong siam sak ta hen!
Conference sung sia, transforming mission....

St. Paul khuapi sia Minnesota ngam ii khuapi hi a, Meneapolis khua tawh kizom ahiman khua
peang twin city kici hi. A kilaklaw ah Mississippi ngun luang ahi hi. Tedim khua ah hong om
sangmang Nelson topa luang kiphumna khua hi tuak nginge hi. Tunung in Nelson tonu in hong
nusiat lai ka pasal luang kiphumna mah ah hong phum ta un, ci in vaithakna om bang in St. Paul
khua than ah kiphum hi tuak hi. Ei a pa in tel meal man ngawl hi bua le missionary Nelson topa le
tonu than vil thei lei tu ve maw. St. Paul pan mundang a zuan zawk ciang he paih valiak hi tuak.
Greenbelt, MD, Maryland ah Mission Headquarters Busatna
St. Paul & Minneapolis Twin Cities pan Washington DC ah Kikhinna
West Virginia Hawhna
Sizang Picnic 2014: U-le-nau tawh Kimuhna
Columbus, Ohio ah Zomi Ministers' Conference paina
Frederick Khua ah Nipikal Khat
Texas Ngam Khualhawhna
Indiana Ngam Mission Trip
Indianapolis Sizang U-le-nau
Fort Wayne Khua Zo Suapuite kung Mission Trip
A Khatveina [a tawpkhakbel ahi ngawl] Ameri-Sizang U-le-nau tawh Thusonna
Sizang u-le-nau nu-le-pa sung pan mual hong liamsan sa teng:
Pu Vum Khaw Tual
Pu Vum Son
Pu Ngo Nang
Pu Ngaw Khup