Aki pa sana, dakulaon nang maray an saiyang ngangalasan sa mga lugad.
Dara naman kan magkapirang beses niyang pagrampaog asin pagsukamang sa daga. Mala ngani kan siya minundag, nabutasan daa siya kan partira nabarian tulang sa daghan. Nakilagan daa kaya ini kan mahiling na bukas na an mata kan omboy asin kan madangog ining magtaram. Iyo daa ini an inot na beses na siya makahiling. "Ipanangaki gayod ako tanganing danason an gabos na lugad kan kinaban." Magpuon sa tirab, salugsog, tiunay, rungas, bari, asin, lapo, hasta makatungtong pako, makasabit sa alambre, malayugan nin sim, matusok dagom, mahulog sa jeep, asin mabudalan kotse. Gabos niya na ini inagihan. Alagad may kun anong misteryong nagbubutong saiya pasiring digdi. Kaya pinu'nan niya ining adalan. Kinitkit an kagan asin nasiraman sa gatol asin siram kaining dara. "Saun da,w hali an gatol asin siram?" Garo arkeologong nagkakalkal nin mga sibilisayon na natambunan na kan mga nakaaging panahon, luhay-luhay asin metikuloso niyang pigbubukas giraray an mga nagrahay na. Muya niyang aramon; muya niyang masabotan an pinaghalian kan lugad, an rason kun tano yaon an mga ini. Binanga niya an mga ini sa tolong kategorya: a. hababaw, b. hararom, asin c. lagbas. Piglaag niya sa hababaw an lapo, rungas asin salugsog. Sa hararom an tirab, tiunay, bari, sa'bit, asin gurot. Asin an saiyang pinakanginangalasan sa gabos, lagbas, an sa makatumak pako, matuhog nin tubo, mabadil. Nagtapos siyang Biology sa kolehiyo dangan nagpadagos tulos sa medisina. Sa pagdugang kan mga aldaw, nagdugang man an saiyang an saiyang naaraman. "Alagad pagkaaram asin pagkanuod lain." Burobanggi siyang dai pinaturog kan saiyang mga iniisip. May kulang. Labi kadakula, labi ka kahiwas. May kulang. Hasta mag-abot na bangging pigdurog siya nin sarong pangiturugan. Yaon siya kaibahan an onseng disipulo; sa atubangan niya yaon an Kristo. Dai siya makatubod; haloy na siyang dai nagtutubod ta sagkod dai sagkod dai niya nahihiling an labot kan mga pako sa Saiyang mga kamot asin ikalaog sa saiyang muro, dai siya matubod. Dangan nagtaram an Kristo, "Mapasaindo an katoninongan." Nagrani ini
saiya asin nagsabi: "Hilinga an sakong kamot asin bugtakan digdi an
saimong muro. Dai ka magduwa duwa asin magt..." Asin biglang siya napabungakaras na garo pighahapag an saiyang hinangos. "Gikan ako sa lugad; mauli ako sa lugad." Nakua niya na an simbag. Kuminua siya nin tubo asin paigtalsok sa wala niyang kamot; nagburulos an dugo hali sa labot. Pigsirip niya ini. Napano nin kaogmahan an saiyang lawog. May nahiling siya sa ibong. Asin siya nagtagbang.