ABSTRACT

Pagpanaad ag pagpamaeandong sa Daean it Krus ni

Kristo Hesus

Restlesshiker

VIA CRUCIS
Inakeanon

Nahauna nga Estasyon Si Hesus hay Guinpamatbatan it Kamatayon

Lider (L) - Guinasimba ag guinadayaw ka namon, O Hesus,

Tanan (T) - Ay bangod ku imong balaan nga krus guintubos mo rong kalibutan.
Halin sa Ebangelyo suno kay Mateo (27:22-23, 26):
Si Pilato naghambae kanda, Anu baea ro akong obrahon kay Hesus nga guinatawag Kristo?
Sabat ku mga tawo, Ieansang imaw sa krus! Ham-an?" pangutana na, "Anu ro anang guinobra? Pero nagsinggit pa gid sanda sa mas mabaskog nga limog, Ieansang imaw sa krus!
Dayon guinbuhi-an na si Barabbas. Ana nga guinsugo nga hapguton anay si Hesus ag dayon
guintugyan kanda para ieansang sa krus.
Pamaeandong:
Si Pilato hay bukon gid man it maeain nga tawo. Sayod na nga si Hesus hay inosente. Pero owa
imaw it kaisog nga kontrahon rong popular nga opinion. Naaeang-aeangan imaw daea ku anang
ambisyon ag posisyon. Imaw man ratong mga tawo nga nagsinggit nga ieansang si Kristo sa
krus. Bukon gid man sanda rato it mga maeain nga tawo. Eaban kanda, sa adlaw it Pentecostes,
hay kabatyag nga naninahan sa taguipusoon(Acts 2:37), paghambae ni San Pedro kanda: Si
Hesus nga Nazareno hay sangka tawo nga guintugyan kinyo it Dios ag inyo imaw guinpaeansang
sa krus gwa sa Laye (Acts 2:22.). Sa ratong higayon sanda hay gasunod-sunoran sa kadagayaan.
Bangod karon, rong katarungan hay guintapakan ku kaeuya, kataeaw, daea ku kahadlok nga
kontrahon rong popular nga mentalidad. Ro mahinay nga limog it consensya hay owat a hibati-i
daea ku mabaskog nga singgit it kadagayaan.
Pangamuyo
Ginuo, rong pamatbat it imong kamatayon hay pamatbat man sa mga inosente nga guinatamay,
guinapigos, guinahusgahan ag dayon patyon daea ku paeu-ib ag kahadlok. Pila pang beses baea
nga amon nga pasueabihon rong kadaeag-an kay sa rong kamatuoran, rong amon nga
reputasyon kay sa rong katarungan? Itugot nga mangin maisog kami sa pagpanaksihon; nga
magkalimog it mabaskog rong amon nga consensya. Maabo nga beses sa kabuhi namon nga
amon ikaw nga guinpanginwala ag guintalikdan daea ku kahadlok namon nga hibaygan o
maduea sa pwesto. Maabo nga beses nga guinpahipos namon rong amon nga consensya sa
pihak kung mga inhustisya nga amon nga hakita sa amon nga palibot. Bisan pa, pareho nga
ratong nagsinggit ku Viernes Santo nga ikaw hay ieansang sa krus ag nga guintabing mo rong
andang taguipusoon sa adlaw it Pentecostes, kabay man nga sa pihak ku among kataeaw ag
pagkamaeu-ib, hilwayon mo rong amon nga taguipusoon sa kahadlok agud panestigusan
namon rong imong Kamatuoran.
Amay Namon.
Sa idaeum it krus, nagatindog rong nanay nga nagapangasubo,
nakapaeapit gid man kay Hesus bisan uli eon.

Ika-2 nga EstasyonSi Hesus Naghakwat ku Ana nga Krus

L- Guinasimba ag guinadayaw ka namon, O Hesus,

T - Ay bangod ku imong balaan nga krus guintubos mo rong kalibutan.
Halin sa Ebangelyo suno kay San Mateo (27:27-31):
Ro mga hangaway it gobernador hay nagdaea kay Hesus sa Praetorium kon siin anda imaw
guin-ubahan. Dayon guinpasuksok imaw nanda it granate nga kapa ag guin-obrahan it korona
nga nahimo sa tunok nga anda man nga guindasok sa anang ueo. Guinpabuytan kana sa anang
tuo nga alima rong isaeang ka pak-eang ag intremison imaw nanda, Bulahan ka, Hari it mga
Hudeo! Pagkatapos nga magduko kana, anda imaw nga guinpil-an ag guin-eugos kana kat pakeang ag isampok sa a ueo. Matapos rong pag-intremis kana, guin-uba nanda ro a kapa ag
guinsuksok nanda kana ro a eambong. Pagkatapos, guinguyod imaw nanda pagwa para
ieansang sa krus.
Pamaeandong
Masami nga rong pagdumaeahan it mga poderoso it kalibutan hay insulto sa kamatuoran, sa
katarungan ag sa dignidad it tawo! Masami nga rong andang mga ceremonias ag hinambae hay
sa pagkamatuod hay pinuril eamang mapatigayon rong andang opisyal nga trabaho bilang kuno
panerbisyo sa ikamayad kung kadagayaan. Si Hesus, imaw nga guin-intremis ag nagasuksuk it
korona it kasakit, hay bangod karon, imaw gid man rong minatuod nga hari. Ag matarung rong
ana nga pagdumaea ku anang guinharian (cf Ps 45:6). Ro haega it minatarung hay rong kasakit
riya sa kalibutan. Ro anang pamaagi hay rong Paghigugma ag Pagkabaeaka eabi eon gid sa mga
kubos bisan pa nga nagadaea ra it kasakit ag kamatayon para kana. Guinapas-an na rong krus,
rong krus it atong pag-ieigmanghuran kana. Ag imaw royon rong ehemplo nga guinpakita nana
katon nga sundan eamang nga makita naton rong daean it matuod nga pagserbisyo para sa
aton nga mga isigkatawo, eabi-eabi eon gid sa mga kubos.
Pangamuyo
Ginuo, guinbaton mo sa mapinaubuson ag mapinasinsyahon nga buot rong mga pag-insulto
kimo. Buligi kami nga indi makig-unong sa ratong naga yaguta sa maeuya. Buksi rong amon nga
mga mata para makilaea ka namon kanda nga guinpakahuy-an ag guintamay. Guinhakos mo ag
guinpas-an rong imong krus ag imo kami nga guinsampit sa magsunod kimo (cf. Mt 10:38).
Buligi kami nga batunon rong amon nga krus, ag indi nga magpaeayo karon, indi nga
magreklamo. Guiyahi kami sa amon nga pagpamanawon sa daean it paghigugma ag
pagkabaeaka sa tanan eabi eon gid sa mga pinakakubos kamon eamang nga madangat namon
rong himaya it amon nga pag-iegmanghuran kimo nga amon nga Ginuo.
Amay Namon...
Sa pakig-unong sa kasakit ku anang Unga,
ro anang panangison ag pag-antus guinbatyag man,
Sa ay Maria makaron nga taguipusoon rong espada nag-eapos gid a.

Ika-3 nga Estasyon Ro Nahauna nga Pagkadusmo ni Hesus

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Libro ni Propeta Isaias. 53:4-6
Sa pagkamatuod, imaw ro nagbatas it mga kasakit ag mga pag-antos nga para kunta katon. Pageaum naton guingabaan imaw it Dios bungod ku ana nga mga saea. Ro matuod, guinninahan
imaw bangod ku aton mga kasae-anan; guinbakoe imaw bangod sa aton mga kaeainan. Ro
kasakit nga anang guin-antos hay imaw rong nagbutang katon sa mayad nga kahimtangan ag
paagi sa ana nga mga nina nagmayad kita. Tanan kita pareho sa mga karnero nga nagtaeang;
kada isaea katon nagpagusto kon ano gusto obrahon. Pero imaw rong guinpaantos it GINUO ku
mga kasakit nga para kunta katon tanan.
Pamaeandong
Ro tawo hay pirmi imaw nga hadusmopirmi nga nagapakasaea. Maabo nga bes nga rong
anang kabubut-on rong anang guintuman ag bukon ku anang Dios. Ruyon hay pagpasipaea sa
Tagtuga. Ro pagkadusmo ni Hesus sa anang pagpas-an ku krus hay bukon eang rong
pagkadusmo it isaeang ka tawo nga binakoe eon ag ubos eon rong kasog daea ku kabug-at ku
anang guina-abaga. Kon kay San Pablo pa sa anang sueat sa mga taga-Filipo: Ro anang kina-iya
hay Diosnon, pero hay owa imaw nagsalig nga katupong nana ro Dios; sa baylo, nagpakanubo
imaw sa punto nga ana it ulipon rong anang kahimtangan, ag pareho sa mga tawo Nagpatiguboson hasta nga batunon na rong anang kamatayon, kamatayon sa krus (Phil 2:6-8). Rong
pagpakanubo ni Hesus hay rong pag-eabaw pa sa atong kabugaeon. Sa anang pagpaubos,
guinbatak nana kita. Isikwayt a rong aton nga pagkamakinaugalingon, rong atong nga huwad
nga bugae ag saea nga pagpati nga owa kita nagakinahang-ean it bulig. Si Hesus rong aton nga
sueondan, imaw nga nagpaubos. Sa aton nga pagpaubos ag pagkilaea sa Dios, makilaeat a man
rong haeaga ku mga kubos naton nga igmanghod.
Pangamuyo
Ginuo, rong bug-at it krus imaw rong nagtueod kimo agud madusmo ka sa eapok. Rong bug-at it
among mga saea, ku among kabugae, nagtik-eod kimo agud matumba ka. Pero rong imong
pagkadusmo hay bukon it timaan it kapierdihan; bukon ron it timaan it kaeuya ku ratong
guinatapakan. Buligi kami ay hadusmo eon man kami. Buligi kami nga aywayan rong amon
mahaliton nga kabugae ag nga sa pagsunod sa imong pagkamapinaubuson, bayawa kami halin
sa saea eamang magpadayon sa among pagpamanawon sa daean it kabuhi nga nagapas-an ku
krus it among pag-eigmanghuran.
Amay Namon.
O anu kagrabe rong pangasubo,
ku nanay nga bulahan sa tanan,
imaw nga ina ku bugtong nga Unga.

Ika-4 nga Estasyon Ro Pagkita ni Hesus ag ku Anang Ina

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Ebangelyo suno kay San Lukas (2: 34-35, 51):
Pagkatapos nga mabendisyunan sanda ni Simeon, naghambae imaw kay Maria nga ina it unga,
Ro unga ngara hay guinpili it Dios sa kapierdihan ag kaeuwasan it kaabuan sa Israel. Mangin
tanda imaw nga halin sa Dios. Maabo ro magahambae it maeain kontra kana. Ngani ikaw mismo
magabatyag it kasubo nga eapos sa imong tagipusoon. Ipakita man nana ro maeain nga mga
piniino it mga tawo.
Pamaeandong
Sa anang pagbantala ku Mayad nga Balita, nagpaiway si Maria eamang mataw-an it higayon
rong pagbaeay ni Hesus it anang bag-o nga panimaeay kaibahan rong anang mga guintutun-an.
Bisan pa ngani, hahambaean imaw ku anang unga: Sin-o ro akong Ina? ... Ratong mga nagaobra ag nagatuman ku kabubut-on ku akong Ama sa eangit, sanda rato rong akon nga mga
igmanghod ag guinikanan (Mt 12:48-50). Makaron, nakita naton nga imaw rong Nanay ni
Hesus. Bago pa man nana imaw guinpanamkon sa anang eawas, guinpanamkon na eon imaw sa
anang taguipusoonsaeamat sa anang pagkamasinueondon sa plano it Dios. Ro mga
guintutun-an hay nag-eap-eaag pero imaw hay nagpabilin. Ro anang kaisog daea ku anang
pagka-ina, daea rong pag-unong it isaeang ka ina, daea rong pagmahae it isaeang ka ina, daea
rong pag-tuo it isaeang ka tumueo-o: Bulahan imaw nga nagatu-o (Lk 1:45). Pero ro Unga it
Tawo, sa anang pag-abot, makakita baea imaw it pagtuo sa kalibutan? (Lk 18:8). Huo, sa ratong
higayon sayod ni Hesus: makakita imaw it pagtuo. Sa ratong oras, ruyon rong anang
consolacion.
Pangamuyo
Santa Maria, Ina it Dios, nagpadayon ka nga tampad bisan pa nga rong mga guintutun-an hay
nag-eap-eaag. Pareho nga guinpatihan mo sa ratong tiempo nga guinsugid kimo it angel rong
indi mapatihan nga balitanga ikaw rong mangin Nanay ku Pinakamataasnag-unong ka
guihapon kana sa oras it anang grabe nga kahuy-anan. Ngani nga, sa ratong tinion sa idaeum it
Krus, sa ratong oras it kadueom nga kagab-ihon it kalibutan, nahimo ikaw nga Nanay it tanan
nga tumueuo, ro Nanay it Simbahan. Nangapangamuyo kami paagi kimo: tur-i kami nga magtuo
ag buligi kami nga rong amon nga pagtuo hay mangin kaisog man namon sa pagpanerbisyo eabi
eon gid sa mga kubos ag sa mga nagaantus.
Amay Namon...
Si Kristo sa kasakit sa krus una nagakabit, / Si Maria sa ubos nagpamantaw
Ro a taguipusoon binuno it bangkaw, / Anang mata sa nagatagumatayon nga Unga
mahigugmaon nga nagatan-aw.

Ika-5 nga Estasyon Si Hesus hay Guinbuligan ni Simon nga Cireneo

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Ebangelyo suno kay San Mateo (27:32; 16:24)
Kat nagapaguwa pa eang sanda sa siyudad, may nasub-eang sanda nga tawo nga si Simon
nga taga-Cyrene. Guinpilit nanda imaw nga magpas-an it krus ni Hesus.
Dayon naghambae si Hesus sa ana nga mga sumueunod, Kon may tawo nga gusto
magsunod kakon, indi na dapat pagpasueabihon ro ana nga kaugalingon. Ag dapat haum imaw
sa pag-atubang sa kamatayon sa ana nga pagsunod kakon.
Pamaeandong
Hapilitan si Simon nga Cereneo nga maghakwat it krus. Si San Marcos nga Ebangelista ugaling
hay nagasugid nga kaibahan nana rong ana nga mga unga nga si Alexander ag Rufus, nga buot
hambaeon, hay kilaea man nga mga sumueonod ni Kristo (Mk 15:21). Kon aton nga padaeman,
sa rayang hitabo nga owa man ngani guinhungda, nagtubo rong pagtuo. Sa anang pag-unong
kay Hesus sa paghakwat it krus, nahangpan ni Simon nga grasyat a gali ratong higayon nga
mangin kabulig imaw ni Kristo sa pagpanikangon paadto sa pag-eansang kana sa krus. Ro
misterio ni Hesus, naga-antus ag mahipos, hay imaw rong nagtabing ku anang taguipusuon. Sa
kada higayon nga aton nga makaatubang nga may pagkabaeaka ratong mga naga-antus, ratong
mga guinapigos ag guinasika-sika, ratong mga maeuya ag imoe; sa aton nga pagpakig-unong sa
andang kalisud, nagabulig kita sa paghakwat ku krus ni Hesus kapareho ni Simon nga Cereneo.
Ag sa kara, napahayag rong misterio it Imoe, nga sa atong pagbulig kanda, anda man kita nga
guinabuligan nga madangat rong kaeuwasan sa Bag-ong Eangit ang Bag-ong Eugta.
Pangamuyo
Ginuo, guinbuksan mo ro panghuna-huna ag taguipusoon ni Simon nga Cireneo sa punto nga sa
anang pagbulig sa paghakwat it krus, natawo rong anang pagtuo. Buligi kami sa pagbalikid ag
pag-unong sa among kaeapit, eabi eon gid sa pinaka-kubos. Buksi rong among panghuna-huna
ag taguipusoon sa paghangop ag pagbaton kanda nga among mga igmanghod kay Kristo Hesus,
imong Unga ag among Ginuo bisan pa nga sa pagkamatuod, hamueain rayang pangamuyo sa
mga handum ag plano namon sa among kabuhi. Itugot nga mahangpan namon nga may kalipay
nga sa amon nga pag-ambitanay ku kasakit ni Kristo ag ku kasakit it sangkalibutan, kami man
hay nahimo nga aeagyan it imong bugay nga kaeuwasan pareho nga kami man hay kaibahan sa
pagbaeay it imong Simbahan.
Amay Namon...
Sin-o baea rong indi magtangis,
Sa kasubo daea ku pag-antus ni Hesus,
Kapin pa kon hipamantaw mo ro a Ina
A dughan, sa mataeum nga espada, puno it nina.

Ika-6 nga Estasyon Ro Uyahon ni Hesus hay Guinpahiran ni Veronica

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Libro ni Propeta Isaias 53:2-3
Kabubut-on it GINOO nga ro ana nga alagad mangin pareho sa tanom nga nagatubo, nga
nagapanggamot sa mamaea nga eapok. Owa imaw it mad-ayad o manaya-naya nga itsura agud
manamian kita it tueok kana. Guintamay imaw ag guinsikway it mga tawo. Maabo ro anang mga
kasakit ag mga pag-antos. Guintalikdan ta imaw, guintamay, ag guinbaliwala.
Pamaeandong
Ro imong uhahon, O Ginuo, ro akong nausoy. Indi igtago ro ing uyahon kakon (Ps 27:8-9). Si
Veronica ro nagtao it eawas sa rayang kahidlaw ag handum ku tanan nga tumueuo nga makita
rong uyahon it Dios. Owa si Veronica natahap sa mga mapintas nga nga soldado o abi nahadlok
pareho ku mga guintutun-an nga nag-aeap-eaag. Makita mo kana rong matarung nga baye, may
kaisog nga obrahon rong dapat obrahon sa pihak kung kinagulo ag kapintas it sitwasyon.
Bulahan ratong may putli nga taguipusoon, ay makita nanda ro Ginuo (Mt 5,8). Sa
taguipusoont a eamang makilaea si Hesus. Rong Gugma eamang una katon rong may gahum
nga ipakita katon rong kamatuoran ag makaobra katon nga putli. Rong Gugma eamang rong
makapakita katon sa Uyahon it Dios nga imaw man ngani hay Gugma.
Pangamuyo
Ginuo, taw-i kami it indi himayang nga taguipusoon, eamang nga usuyon namon rong imong
uyahon. Indi igtugot nga mapahamtang rong amon nga taguipusoon sa mga bagay-bagay nga
nagasab-eag sa pakilaea namon kimo. Bugayi kami it putli ag tampad nga taguipusoon eamang
nga may kapas kami sa makilaea rong imo nga presensya riya sa kalibutan, sa palibot ag eabi
eon gid sa kada isaea kamon, kapin pa sa ratong mga pinakakubos kamon. Ag kon pananglitan
nga kami mapaslawan sa among mga plano ag handum sa kabuhi, paisuga rong among buot ag
sa mapinauboson batunon namon rong limitasyon it amon nga ikasarang nga owat
pagsunggod. Buksi rong mga mata it amon nga taguipusoon agud makilaea ka sa kada higayon
it amon nga pagpamanawon sa daean it kabuhisa daean it krus paadto sa Bag-ong Eangit ag
Bag-ong Eugta.
Amay Namon...

Puede baea nga rong akong taguipusoon

Indi eon makig-unong sa anang panangison
Sa Ina nga ro a taguipusoon puno it nina bangod ku mataeom nga espada
Daea ku unga, duguan nga nagaantos, sa krus nagadupa?

Ika-7 nga Estasyon Ro Ikaywa nga Pagkadusmo ni Hesus

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Libro sang Panalambiton 3:1-2,9,16
Isaea ako nga nakaeksperiensya it pagsilot it GINOO tungod ku ana nga kaakig. Guintabog na ako
paeayo ag guinpabaktas sa kadueom imbes nga sa kapawa.
Guin-abangan na it tinumpok nga mga bato ro akon nga daean, kag guinpaliko-liko na na rong
akon guinaagyan.
Nagkaeabingaw ro akon nga mga ngipon bangod guinpakaon na ako it mga bato, ag guin-eapak
na ako sa eapok.
Pamaeandong
Ro kinaandan nga tatlong beses nga pagkadusmo ni Hesus ag rong kabug-at it krus hay
nagapadumdum katon ku pagpakasaea ni Adanrong aton nga tawohanon nga kaeuyaag
rong misteryo ku ay Hesus nga parte sa aton nga pagkadusmo. Sa Nauhang Sueat ni San Juan,
nakasaysay runa rong tatlong pagpakasaea it tawo: ro kaueag it eawas, ro kaueag it mata ag
rong kabugae it kabuhi. Sa handum it tawo nga mangin dios, nangin biktima imaw mismo it
anang syensya ag technologiya ag nagdis-og kana sa bibi it kahalitan it kalibutan nga anang
guin-estaran. Hadusmo eon man rong tawo. Ro Ginuo imaw kara ro padayon nga gaantus ag
padayon nga nagakadusmo man daea ku bug-at it krus nga anang guinapas-an. Guinatueok
nanan kita eamang nga himugtaw rong aton nga taguipusoon. Nagakadusmo imaw agud sa rato
ana kita nga mabatak halin sa eapok nga atong guinahap-an.
Pangamuyo
Ginuong Hesu-Kristo, baylohi rong matinaastaason namon nga taguipusoon ag himua kami nga
mapinaubusoon ag mainampuon kimo. Buksi rong amon nga mga mata agud makita namon una
sa mga kubos rong ehemplo it mapinaubuson ag mainampuon nga panimuot. Ikaw gid lang
rong andang manggad ag kusog; ikaw rong andang pag-eaum ag kapag-on. Gub-a rong
mapinakunu-kunuhon namon nga kaaeam daea ku idelogiya it kapurilan. Kalisa rong bugaeon
namon nga taguipusoon nga nagasalig sa abilidad it tawohanon nga kaaeam ag gahum eabaw
sa pagsalig ku imong kaalwan. Tawga kami it uman, ag sa amon nga daean it krus, mangin
igmanghod kami ku ratong mga napaslawan, ku mga mapinauboson, ku mga putli it
taguipusoon, ku mga kubos nga nagakilaea kimo nga Mang-eueuwas. Ag pareho sa mga imoe,
himu-a nga kubos man rong amon nga taguipusoon eamang adlaw-adlaw, oras-oras, minutominuto kami maga-ampu kimo ag magapangamuyo
Amay Namon...
Binakoe, guinpakahuy-an, / Guinsika-sika, guin-ubahan,
Imaw eon lang maulo-ulo / Ro Ina sa anang sabak ro unga
Gahamyangon, ro a kabuhi guinhaead / Sa aton nga mga utang guinbayad.

Ika-8 nga Estasyon Ro Pagkita ni Hesus ag ku Nagapanangison nga mga

Bayi nga Taga-Herusalem

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Ebangelyo suno kay San Lukas 23:28-31
Pero guinbalikid sanda ni Hesus ag guinhambaean, Kamo nga mga bayi nga taga-Herusalem,
indi kamo magtangis bangod kakon. Tangisi ninyo ro inyong kaugalingon ag ro inyo nga mga
unga. Bangod nga magaabot ro mga inadlaw nga magahambae ro mga tawo, Bulahan ro mga
bayi nga baw-as ag owa it guinabatiti. Sa ruyon nga tiempo magahambae ro mga tawo sa mga
bukid, Tiphagi kami ag tabuni! Ay kon guinaobra nanda ra kakon nga owa man ngani it saea,
man-o pa baea rong obrahon nanda sa ratong may mga saea?
Pamaeandong
Ro mensahe it dayang estacion hay nga dapat seryusohon ta rong saea daea man ku
kaseryusohon it paghukom katon. Baea hay masyado kitang kumpanti daea ku pag-intiende
naton nga rong Dios ag si Hesus hay maeueuy-on ag nga anda eon lang nga lipatan rong aton
nga mga saea. Pero pamaeandungi baea it mayad rong kasakit nga guin-agyan ni Hesus eamang
nga mahilway kita sa saea. Sa Daean it Krus, mahangpan naton kon mauno ka seryuso rong
saea. Ngani katon makaron, ana nga guinahambae: Bukon it ako rong inyong tangisan, tangisi
rong inyong kaugalingonay kon makara ngani sanda kakon magtratar nga owa it saea, ayhan
mauno sanda kinyo magtratar nga makasasaea?
Pangamuyo
Ginuo, sa mga bayi nga nagpanangison, naghambae ka hanungod sa paghinuesoe, nahanungod
sa Adlaw it Paghusgar kon siin kami una sa ing atubang nagatindog ag nagatan-aw sa uyahon
ku Jues it kalibutan. Guintawag mo kami agud pukawon rong amon nga mga taguipusoon nga
kibuean eon sa eap-eaag nga kaeain. Guin-esturbo mo rong among kumpanti nga pangabuhi sa
pihak kung patuyang nga kapurilan it mga idelogiya it kalibutan eamang nga seryusohon namon
rong realidad it saea ag rong amon nga mga responsibilidad sa among mga pagbuot sa Daan it
Krus. Itugot nga indi eang kami hasta sa pagpanangison sa ratong mga tiempo nga hipan-uhan
ka namon sa daean nga nagaantus ag nagabatas ku bug-at it krus. Kundi nga bag-oha, lisua rong
amon nga direksyon paadto sa bag-ong kabuhi kaibahan sa mga kubos nga puno it pagtuo ag
pagsalig kimo. Maangot kunta kami kimo agud rong amon nga mga mamaea nga sanga hay
mabuhi, magdabong, magpamueak ag magpamunga it dayon nga kabuhi (cf Jn 15:1-10).
Amay namon...
Eamang nga kita sa saea mahilway / Guinbatas na rong kapintas it mga hangaway
Guinlipatan a kaugalingon, / Kaeuwansan it sangkatawohan guinpanambiton
Rito sa krus nga anang guindupahan. / Ro a kabuhi anang binuhian.

Ika-9 nga Estasyon Ro Ika-tatlo nga Pagkadusmo ni Hesus

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Libro sang Panalambiton 3:27-32

Mayad para sa sangka tawo nga magpadisiplina samtang bata pa imaw. Kon guinadisiplina kita
it GINOO magpungko kita nga isaeahanon ag mamaeandong. Magpaubos kita ku aton
kaugalingon sa atubangan it GINUO ag indi madueaan it pageaom. Kon may magsampae kimo,
itaya ro imong uyahon. Ag batuna ro pag-insulto it imo nga kaaway. Ay ro Ginuo indi magsikway
katon hasta san-o. Bisan matuod nagatao imaw it kalisod, guinapakita na guihapon ro kaeuoy
bangod ku ana nga mabahoe nga gugma nga owa it katapusan.
Pamaeandong

Pamaeandungant a kon man-o pa ay Kristo nga pag-antus para sa anang Simbahan ag bangod
ku Simbahan. Ku mga higayon nga rong pagselebrar o pagbaton it mga sacramento hay nahimo
nga instrumento sa padayon nga pagpakanubo sa dignidad it mga kubos ag ku ratong mga
guinasika-sika ag guinadis-og rona sa comunidad. Man-o kita pirmi nagatik-eod sa mga
igmanghud naton nga hadusmo eon ag dayon tapakan pa gid daea ku andang kaeuya ag ku
atong kahadlok nga makita man rong atong pagpakuno-kuno nga bukon kita it makanda! Man-o
kita pirmi naga-amulit it grasya eabi eon gid rong grasya it pagkangay katon nga magbaton kung
Sakramento it Pagpangumpisar eamang nga makatindog eon man kita sa atong pagkadusmo!
Rong pagtalikod kana, ro pagbaton ku anang Eawas ag Dugo nga owa it kapahauman, ro
pagtamay sa pinakakubos nana nga igmanghodtanan ron hay mataeom nga espada nga
nagatuslok sa anang taguipusoon. Pero, pareho kay Pedro, sa mapinaubuson nga paghinuesoe,
una sa kaibuturan it atong taguipusoon, ihambae ta kana: Kristo, maeuoy kaGinuo, euwasa
kami (cf Mt 8: 25).
Pangamuyo
Ginuo, ro imong Simbahan hay maku baroto nga guinsueod eong it tubi ay abong gabut. Ruyon
tanan ay among obra sa kada higayon nga kami hay madusmo sa daean. Kami rong baeasueon
kon ham-an nga mawron eon rong itsura it imong Simbahan. Sa kada bes nga guinatalikdan ka
namon daea ku among kabugaeon ag pagkamaiya-iyahon, amon nga guinasamad rong uyahon
it imong Simbahan. Kaeuy-i rong Simbahan, kaeuy-i kami sa kada higayon nga madusmo kami sa
among pagpamanawon. Sa imong gugma, padayon ka mat ing nga mabangon, bisan pilang
beses pa nga madusmo. Sa imong gugma, may kabaskog ag kakusog ka guihapon sa pagpas-an
kamon ag ku imong Simbahan. Euwasa ag pasantosa rong imong Simbahan. Euwasa ag
pasantosa kami ku imong padayon nga Gugma.
Amay Namon...
O Inang Maria! / Tuburan it Gugma! / Pukawa rong akon nga handum
Si Hesus, imong unga, akong sundon / Ro Daean it Krus akong baktason.

Ika-10 nga Estasyon Guinbahan si Hesus it Anang Eambong

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Ebangelyo suno kay San Mateo (27:33-36)

Pag-abot nanda sa lugar nga guinatawag Golgota (nga kon sayuron, lugar it bagoe), guintaw-an
nanda si Hesus it bino nga may simbog nga mapait. Pero pagkatini nana, owa na rato pag imna.
Dayon guineansang nanda imaw sa krus, ag guinpartida nanda rong anang mga eambong paagi
sa pagpagabot-gabot. Pagkatapos kato nagpungko sanda ag nagbantay kana.
Pamaeandong
Sa pag-uba kay Hesus rito sa mata it kadagayaan, guinapatimaan nga guin-ubahan man imaw it
anang dignidad ag pagkatawo. Para kanda, si Hesus hay maku-sapat, owa eon it poder rona sa
comunidad, mas manubo pa kay sa ratong pinakakubos rona sa anang katilingban ag
guinakangil-aran kung tanan. Rayang pag-uba hay nagapadumdum man katon ro pagsuboe sa
tawo rito sa paraiso. Hub-eas si Adan ag Eva ag ngani nga nanago ay nahuya sa Dios. Hub-eas,
guinapadumdum na kita nga guin-ubahan kita ku hauna natong eambong nga imaw ngani
rong pagkasadyaan it Dios. Guinpagabot-gabutan ku mga soldado rong inubang eambong, runa
sa idaeum it krus. Ro mga Evangelista hay pareho nga naggamit it dayang mga tinaga pareho
man sa ana ku Salmista (cf. Psalm 22:19); Buot hambaeon kara hay nga rong tanan ngara hay
nagakahanabo suno sa Kasueatan. Ro tanan hay suno sa plano it Dios. Pagaagihan ku Ginuo
rong tanan pareho ku guin-agihan it tawo, umpisa sa anang pagkadusmo, sa anang pagkahubeas, sa anang kahuy-anan, sa anang kamatayon, sa anang paghipos, sa anang pagkabanhaw,
hasta sa anang kaeuwasan. Ngani nga guin-aywanan na rong 99 para usuyong rong sambilog
nga naduea sa anang panong. Haum imaw nga ihaead rong anang kabuhi para sa tanan, para sa
bisan sambilog eang nana nga igmanghod nga una sa kataeagman! Owa eon it masubra pa
karang gugma nga ihaead mo rong imong kaugalingon para sa kaeuwasan it imong isigkatawo.
Pangamuyo
Ginuo, guin-ubahan ka it imong mga eambong, sa bagay nga guinsuksuk mo rong kahuy-anan ni
Adan. Guin-antus mo ag guinbatas rong kasakit it mga kubos, rong mga guinasika-sika riya sa
sociodad. Sa rayang paagi, guintaw-an mo it katumanan rong mga guinpanghambae it mga
propeta. Buksi rong amon nga mga mata para makilaea ka sa hub-eas nga eawas it kada isaea,
sa mga imoe, sa mga kababayin-an, sa mga kaunga-an, sa hamueain it panan-aw, sa mga
maeuya. Dayon, pasuksuka kami ku eambong it imong kapawa eamang makahigugma kami sa
tanan pareho nga guinhigugma mo kami it dayon bisan pa ag eabaw sa kamatayon.
Amay Namon ...
Ipabatyag kakon rong guinbatyag mo / Padabdaba rong akong gugma /Indi makuntento sa
imong mga tinuga / Usuyon ka kara makaron hasta hin-aga / Indi makapahuway, indi himayang
Sa imong sabak gid lang mapahamtang.

Ika-11 nga Estasyon Si Hesus hay Guineansang sa Krus

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Ebangelyo suno kay San Mateo (27:37-42)
Sa uehan na nagbutang sanda it karatula. Guinsulat nanda idto ro kaso kontra kana nga
nagahambae, Imaw ra si Hesus nga Hari it mga Hudio. May daywa man idto ka tulisan nga
guineansang sa krus kaibahan kay Hesus. Ro sambilog hay sa anang tuo ag ro isaea hay sa anang
waea. Ro mga tawo nga nagaaeagi idto hay nagalingo-lingo nga nagainsulto ag nagayaguta kay
Hesus. Hambae nanda, Ikaw nga nagahambae nga gub-on mo ro templo ag sa sueod it tatlong
adlaw hay patindugon mo it uman, euwasa rong imo kaugalingon! Kon ikaw ro Unga it Dios, panaog
ka sa krus! Pareho man karon ro intremis ku manugdumaea nga mga pari, mga maestro it
Kasuguan, ag mga manugdumaea it mga Hudio. Naghambae sanda, Guineuwas nana ro iba, pero
indi nana masalva a kaugalingon! Bukon baeat hari kuno imaw ron it Israel? Kon makapanaog imaw
sa krus, matuo kita kana.

Pamaeandung
Mamaeandong anay kita sa atubang it imahen ngara it kasakit, sa atubang it nagaantus nga
Unga it Dios. Tan-awont a si Hesus sa mga uyahon it mga guinakangil-aran naton nga mga
tawo, sa mga kubos, sa mga masakiton, sa mga hamueain katon, sa atong kaaway, sa mga priso,
sa mga makasasaea. Sa atong pagtindog sa atubang ku guincondenar nga Dios, nga owa
magpakita ku a gahum agud makapanaog sa krus, nga owa magsalvar ku a kaugalingon, ag sa
baylo hay nagbatas ku kasakit hasta sa katapusan, aton man nga pamaeandungan rong realidad
it pagsunod kay Hesus bukon eang sa Daean it Krus, kundi nga pati man sa anang pagdupa sa
krus. Kita man, ieansangt a man rong atong kaugalingon kaibahan kay Hesus, eamang nga indi
kita kana mapahieayo ag may kaunong kita sa mga oras it kapiot, kalisud, pagtilaw ag
mahipaeayo sa pagsueay nga mag-intremis ag magsika-sika kay Hesus ag sa anang kubos nga
mga igmanghod.
Pangamuyo
Ginuo kung Hesus,guintugyan mo ro imong kaugalingon sa kapintas it krus ag owa guid
magpaeagyo papanaog halin karon. Kabay nga indi man kami magdaeagan paeayo sa among
mga responsibilidad kapin eon gid sa among pagpas-an ku krus it pag-ieigmanhuran bisan pa
nga magdaea ra ku among kasamaran ag kamatayon. Buligi kami nga mangin tampad kimo,
maunongon sa imong mga kubos nga igmanghod. Buligi kami nga indi matip-eang ku kapurilan
it kahilwayan nga kalibutanon nga owa naangot sa responsable nga pag-ulikid sa epekto kara sa
sangkatawohan ag sa palibot.
Amay Namon...
O Ina kong Maria, / Kisiwa ro akong taguipusoon nga maila / Ieansang sa krus ku Manunubos
Sa mahikaw nga gugma ana nga guintubos.
.

Ika-12 nga Estasyon Si Hesus hay Namatay sa Krus

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Ebangelyo Suno kay San Mateo (27:45-50,54)
Umpisa it alas dose it udtroadlaw, nagdueom ro kalibutan sa sueod it tatlong oras. Pag-alas tres
it hapon nagsinggit si Hesus it mabaskog, Eli, Eli, lema sabactani? nga kon sayuron, Dios ko,
Dios ko, ham-an guinpabay-an mo ako? Pagkabati ku iba nga nagatieindog idto naghambae
sanda, Guinatawag na si Elias! May sambilog idto nga tawo nga nagdaeagan kag nagbuoe it
espongha. Guintusmog na ra sa maaslom nga bino kag guintakod sa punta it tukon ag
guintunghoe sa baba ni Hesus agod supsupon na. Pero ro iba hay nahambae, Pabay-i eang
imaw! Tan-awon ta kon maabot si Elias sa pageuwas kana. Eunman nagsinggit it mabaskog si
Hesus kag nabugto ro anang guinhawa. Ro kapitan ag ro mga soldado nga nagabantay kay
Hesus hay kinuebaan gid pagkayag nanda ku paglinog ag pagkakita nanda ku mga nagkaeatabo.
Naghambae sanda, Matuod gid nga imaw hay Unga it Dios!
Pamaeandong
Ro anang pagkahari, ro anang pagkamangeueuwas hay owa nasandig sa poder ag politika. Pero
sa ratong oras it pagdupa na sa krus, ro titulo hay hayag nga nakaplastar ag makit-an it tanan.
Ro Guineansang nga Kristo. Makaron, guintuman na, guintaw-an it katumanan rong Laye it
Gugma. Guinhaead na ro anang kaugalingon ag ngani nga sa pagbayaw kana sa krus, guinpakita,
guinpabutyag it Dios rong anang minatuod nga kinaiya, ro Dios hay Gugma. Guinpangamuyo ni
Hesus ro Salmo 22:Dios ko, Dios ko, ham-an nga guinpabay-an mo ako? (Ps 22:2). Guin-ako na
rong tanan nga kasakit ku sangkalibutan, guinsueod na rong kadudueman eamang magsiga rito
rong kapawa it Dios. Ro kalibutan hay nalikopan it kadueum kat ro Unga it Dios hay una sa krus
nagadupa, nagatagumatayon. Naglinog rong palibot. Ag sa Krus, ro Simbahan it mga Hentil hay
baeay. Sa krus kon siin imaw nagadupa, nagdaog eon man imaw contra sa kadudueman.
Pangamuyo
Ginuong Hesus, amon ka eon man nga guineansang sa krus. Sa rayang oras imong guinabatyag
rung Kadueom it Dios. Daea ku imong kasakit ag ku kaeain namon nga mga tawo, ro uyahon it
Dios, ro imong itsura, hay indi namon masanaawan, indi ka namon makilaea. Ngani nga una sa
krus, guinpabutyag mo kamon rong imong minatuod nga kinaiya. Una sa ibabaw it krus nagdaog
ka. Guinbuligan mo kami nga makilaea ka sa oras ngara it kadueum ag katub-eag. Buligi kami
nga makilaea ka sa among isigkatawo eabi eon gid sa ratong mga una nagapanikangon sa
madueom nga parti it among sociodad. Ipakita kamon rong imong kinaiya sa kada higayon.
Ipakita kamon rong imong pageuwas kamon tanan halin sa kaeainan.
Amay Namon ...
Gugma rong tawag kara / Una ka sa krus nagdupa / Rong among bug-at imong guin-abaga
Sa gahum it kaeainan imo kami nga guinsalva / Kabuhi mo rong bayad sa among pagkaprenda.

Ika-13 nga Estasyon Ro Eawas ni Hesus hay Guintaetae sa Krus

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Ebangelyo Suno kay San Mateo (27:54-55)
Ro kapitan ag ro mga soldado nga nagabantay kay Hesus hay kinuebaan gid pagkayag nanda ku
paglinog ag pagkakita nanda ku mga nagkaeatabo. Naghambae sanda, Matuod gid nga imaw
hay Unga it Dios! Sa unahan maabi nga mga kababayin-an nga nagatan-aw sa
nagakahaeanabo. Sanda ra ro nagsunod ag nagbulig kay Jesus halin pa sa Galilea.
Pamaeandong
Halin sa anang taguipusoon nga guintuhog it sumbiling ku soldado nagtubod rong dugo ag tubi:
isaeang ka misteryuso nga imagen ku tuburan it mga sacramento it Pagbunyag ag Pagkalawat.
Ag makaron, sa katapusan ku anang kasakit, nangin klaro sa tanan nga sa pihak kung gahum it
kadumot ag katal-it, si Hesus hay bukon gid man it nagaisaeahanon. Nakig-unong sanda hasta
sa kamatayon ni Hesussi Maria hay nagatindog sa idaeum it krus, ro igmanghog ni Maria ag si
Maria Magdalena ag si Juan nga pinalangga nga guintutun-an ni Hesus. Sa rayang takna it pageaeaw, sa rayang kadueom, ro kapawa it pag-eaum hay nagsiga. Ro mahipos nga Dios hay
padayon nga ro Dios it Kabuhi, nagapabatyag ku anang presensya nga nagakupkup katon. Bisan
sa kahanagbon it kamatayon, ro Ginuo hay padayon mat a nga atong Ginuo ag Mangeueuwas.
Ro Simbahan ni Kristo Hesus, ro anang bag-o nga pamilya, hay nagtubo, nabaeay.
Pangamuyo
Ginuo, nanaog ka sa kadudueman it kamatayon. Nagkatueog ka sa baroto ag natub-eag ro ay
Pedro nga pagtuo. Namatay ka ag nang-euyahan rong mga guintutun-an pauli sa Emaus.
Maeuya gid man kami ag rong amon nga pagtuo hay hukas-hukas. Sa among taguipusoon,
nahambae namon: Patay ro Dios. Ipabutyag kamon nga una ka ag guinakoekoe mo kami sa
mapiot nga daean. Taw-i kami it kapag-on sa pag-atubang sa mga pagsueay ag paghigugma nga
haum magkupkup kimo ag sa imong mga kubos nga igmanghod pareho sa paghakos kimo ku
imong Ina, si Virgen Maria. Sa imong gugma, mangin isaea kami, kubos man o manggaran,
maeuya man o maabilidad, mahinay man o maabtik, kueang it ihibaeo o may sangkoe nga
aeam. Sa oras it kalisud ag sa tiempo ngara it pag-eaeaw, buksi rong among mga mata sa
pagkilaea ku minatuod nga kinaiya it kada isaea kamon, eamang nga sa pihak ku among
mascara, matapos nga hiubahan kami ku eambong it kahadlok ag pagduda, mangin pareho
kami kay Jose it Arematea ag Nicodemo, makay Juan ag Maria Magdalena, kaibahan ag kabulig
nimo sa pagbaeay ku hardin it Pagkabanhaw.
Amay Namon ...
Tipunon ko ro akong euha / Ihugas ko sa dugung alima / Sa eawas nga patay gapang-eaeaw
Ro a uyahon nga puno it kamingaw / Ibhan ko imaw sa idaeum it krus, si Inang Maria ko
Kay Kristo, nangin unga na man ako

Ika-14 nga Estasyon Ro Pag-eubong kay Hesus

Guinasimba ag guinadayaw ka namon, O Hesus,

Ay bangod sa imo balaan nga krus guintubos mo rong kalibutan.
Halin sa Ebangelyo suno kay San Mateo 27:59-61
Guinbuoe ni Jose ro eawas ni Hesus ag ginsamburan na it bag-o nga tela nga linen. May bag-o
nga eueubngan si Jose nga guinguhab sa bato nga ana nga guinobra para kunta kana. Rikato na
guineubong ro eawas ni Hesus. Dayon guinpaligid na kat mabahoe nga bato sa pagtakop ku
puwertahan it eueubngan. Pagkatapos nagpanaw imaw. Nagpabilin idto si Maria nga tagaMagdala kag kat isaea pa gid ka Maria. Nagapungko sanda nga nagaatubang sa eueubngan.
Pamaeandong
Si Hesus, guintamay sa ulihing inoras it anang kabuhi, hay guineubong nga dungganon sa bag-o
nga eueubngan. Kaibahan ni Jose si Nicodemo nga nagdaea it maabo ag hinalo nga mira ag aloe,
nga nagtao it kahumot rito sa palibot it eueubngan sa hardin. Sa paghaead ku anang
kaugalingon sa kamatayon, pareho man ku pagpahid kana it pahumot rito sa Betania,
mataeupangdant a ro kasubrahan nga nagaturo katon ku kaalwan it Dios ag ku anang
tayuyon nga gugma. Subra-sobra kon ro Dios magpalangga. Rayang maalwang gugma it Dios
hay dapat man nga makita katon. Kita rong kapawa it kalibutan. Sa ay San Pablo mat a nga
panan-awan nga ro Dios hay hay nagasabwag ku kahumot ni Kristo paagi katon. Kita rong
kahumot ni Kristo (2 Cor 2:14ff.). Kita nga mga Pilipino hay guinhangkat ku Santo Papa nga
mangin humot ni Kristo riya sa Asya. Guintawag kita sa pagbantala ku Mayad nga Balita sa mga
lugar ag sitwasyon kon siin kita nahamutang. Rong aton nga pagtuo sa pihak kung mga kasakit
ag kalisud nga atong guinagihan hay kapawa ag kahumot para sa madueom ag mabaho nga
kalibutan. Paagi sa krus ag pagkabanhaw, ro Pulong it Dios hay nangin Tinapay it Kabuhi para
katon. Sa rayang pag-eubong kay Kristo, masanaawt a eon rong misteryo it kung Eukaristiya.
Pangamuyo
Ginuo, sa pag-eubong kimo amon nga nasanaaw rong binhi nga nahueog sa eapok. Sa imong
pagkahueog, nagtubo rong amon nga pagtuo agud amon rang isabwag sa eapok nga owa pa
kakilaea kimo. Halin sa imong eueubngan nag-utbong rong bag-ong tubo nga magadaea it
tayuyon nga grasya para sa guinagutom ku imong Mayad nga Balita. Sa amon nga pagbangon
halin sa eapok, mangin testigo man kunta kami sa pagpamihak-pihak ku Tinapay it Kabuhi
eamang nga rong amon nga pag-ieigmanghuran kimo hay mangin kapawa ag kahumot sa
madueom ag mabaho nga kalibutan. Mangin iya ka kamon pareho nga Mayad nga
Manugbantay nga naga-iba kamon bisan pa sa bibi it kamatayon. Guiyahi kami sa madueom nga
daean hasta nga masanaaw namon rong Bag-ong Adlaw it imong Pagkabanhaw.
Amay Namon ...
Itugot nga una ako sa imong euyo / Sa kilid ku imong eueubngan nga bato
Eamang nga kaibahan ku taga-Magdala / Sa Adlaw it Pagkabanhaw ikaw akong makilaea.