MUMUNANG PAMAMASA: 1Ari 19: 4-8

Pamangan kabang dalan

Kilub ning metung a aldo pamaglakbe linakad yang papunta king ilang y Elias.
Tinuknang ya at linukluk lalam ning tanaman a retama at pignasan na ing mate ne
sana. Nganang menalangin, O GINU, magkasya na; kuwanan mu na ing bie ku, e ku
migit karing pipumpunan ku.
Kaybat na nita migkera at mipatudtud. Kabud-abud ating angel a tinagkil keta at
ngana, Migising n aka at mangan. Inyang linawe ya, ikit ne king kabuntukan na
ing metung a tinape melutu karing babo ring mapaling batu at metung a bangang
danum. Mengan ya at minum, at kaybat mipatudtud yang pasibayu. Pasibayu yang
dinatang ing angel ning GINU; tigkil ne at ngana, Elias mibangun ka at mangan,
uling makaba pa ing lakaran mu. Mibangun ya; mengan at minum. Uli niti, mibawi
ing sikanan na ban makalakad ya kilub ning apat apulung aldo papunta king Bunduk
ning Horeb, ing sagradung bunduk.
DALIT A PAKIBAT : Dalit 34:1-2,3-4,5-6,7-8 Pak-9
Pilasan yu at akit ing kayapan ning GINU.
L-Pasalamatan ke ing GINU kapilan man; labi ku e la tuknang pupuri keya; ing GINU
yang pagmaragul ku; makiramdam kayu at tumula ikong mayayalipusta.
L-Parangalan ye kambe ku ing GINU; miyabe abe ta yang puryan ing keyang lagyu.
Menigapu ku king GINUat pekibatan na ku; karing sablang katakutan ku linigtas na
ku.
L- Lumawe kayu keya at tumula kayu, at e kayu mipakarine. Ing taung maliligalig
king GINU minawus ya, at ya pekiramdaman ne; kinabus ne king sablang dusa na..
L-Ing angel ning GINU babanten no retang makitakut at gagalang keya; Pilasan yu at
subukan ing keyang kayapan! Tumula ya ing taung keya magsantungan.

KADWANG PAMAMASA: Efeso 4:30 -5-2

Tukyan ye ing dalan ning lugud nang Kristo
E ye sa palunkutan ing Banal a Espiritu ning Dios, ulng ya ing minye tatak kekayu,
at ya ing katibayan nin kekayung pangayatbus potang dating ne ing aldo mituldu.
Ilako yu na ing nanu mang mapayit king lub yu, mua at kasbu, tuknang na kayung
magsalitang magaspang, maglibak, at mipapasyag marawak. Nune maging
maganaka ko sana at mapaglimus king metung at metung, at mipapamatawad kayu
antimo ing pamamatawad ne kakayu ning Dios kapamalitatan nang Kristo.

Anti na ning anak na kayung pakamalan ning Dios, tularan ye.

Mibye-bie kayung mitmung lugud antimo y Kristo; uli na ning kaluguran ma katamu,
dinaun na ing bie na bilang masayung ayin, at sakripisyung makaligaya king Dios.
ALLELUYA: Juan 6:51
Alleluya, alleluia!
Aku ing mabie tinape a tinipa ibat banwa, ngana ning Ginu, ing ninumang mangan
kaniti mie ya kapilan man Alleluya!

EBANGHELYU: Juan 6:41-51

Tinape para king ikabie ning yatu
Mibubulungan la ring Judio uling sinabi na, Aku ing tinape a tinipa ibat banwa.
Sinabi ra, Aliwa iti y Jesus a anak nang Jose? Balu ta ya y tata na at ima na!
Makananu nang asabing tinipa yang ibat banwa?
Mekibat ya y Jesus, E na kayu mibububulungan.
Alang makalaput kanaku subali mu nung ilapit ne ning Ibpang mitubud kanaku; at
pasublyan keng mie king tawling aldo.
Makasulat karing libru da ring propeta,At ding sablang tawu turwanan na la ning
Dios.
Ding sablang mekaramdam at mebyasa king turu nin Ibpa lumapi la kanaku. Iti e
mangabaldugan king atin nang menakit king Ibpa; Ita mung ibat king Dios ya ing
bukud menakit na king Ibpa. INg katutwan sasabyan ku kekayu: ing maniwala atin
yang bie lang angga. Aku ing Tinape ning Bie. Mengan lang manna king desyertu
ring pipumpunan yu, makanyan man mengamate la. Dapot iti ya ing tinape a ibat
banwa; ing ninumang mangan kaniti e ya mate.
Aku ing mabie tinape a tinipa ibat banwa. Ing ninuman mangan kaniti mie ya
kapilan man.
At ing laman ku yang tinape a ibye ku ban mie ya ing yatu.
Ginu, ibye mu kekami ing kakanan mi king aldo ngeni.
L- Para karing magdulap keka king karelang kabengyan, ibye me ing tinape ning
kasalpantayanan; nung ali ing dalan ning katutwan maging bina yang makaba para
karela. Inya ngaming manalangen:

L-Para karing sablang mabibie lalam ning kaligaigan, ibye me ing tinape ning
kapanisyan; nung ali ing dalan ning kapatawaran maging bina yang maralumdum
para karela. Inya ngaming manalangen:
L- Para karing mabibe king pamisalang-sangan, ibye me ing tinape ning
pamikasundu; nung ali ing dalan ning kapatawaran magin bina yang maralumdu
para karela . Inya ngaming manalangen.
L- Para karing mabibie magdili-dili para mu king karelang sarili, ibye me ing tinape
ning pamaki-damayan; nung ali ing dalan payinturu king lugud maging bina yang
malungkut para karela. Inya ngaming manalangen: