Is lusto sunu

1. Is sayct : « Sem wir hat dwo sunus.

2. Yuner sayct ei pater:
“Pater, dah mi id smyehr parwarisch quod bayght me.”
Is ibs dayt id opnos.
3. Pauk diens serter, yuner sammelt hol ed fortrehct kyun piern land.
Is oisweindt ter sieno mirath gwivend-ye foll-ye.
4. Quan is hat masraft hol, est un akster famine in tod land.
Is inkapt ses in chiong.
5. Is gwaht supostahtum oin im civs ios land,
qui yeist iom do sien aghers paskeihtum sien swins.
6. Eiskwt satasce med ia haroubs i swins edde;
bet nimen ei daht sems.
7. Bad, gwehmend in se, sib sayct:
“Tant salarieits miens pater hant plukwid dvan,
ed ego nehco ob hungher her.
8. Stahsiem ghi ub, gwahsiem kye mien pater ed ei saycsiem:
Pater, ho fault protiev id waurn ed ant tien faces.
9. Neti ghehldo dar ses kalt tien son.
Kwehr me kam oin tienen salarieits. »
10. Staht ub ed gwaht kye sien pater. Stahndo dar dalg, eys pater vidt iom.
Sien inster taraght, is currt se xubhes kyeys coll
ed, se clihnend, kunt iom.
11. Is sunu ei sayct: “Pater, ho fault protiev id waurn ed ant tien faces.
Neti ghehldo ses dar kalen tien son.”
12. Bet is pater sayct ad sien slougs :
“Bringhte hirs-ye id bellst ghiton ed endute iom tosmed.
Dahte ei un ring pro eys hand, sandals pro eys peds.
13. Bringhte iom piwer vicel, gvehnte iom, smad meje ed dapane !
14. En mien son eet mohrt, ed is regwivt;
eet lusen, ed est retrohft ! »
Bidapanent.
15. Eyso sener sunu eet in ia aghers.
Gwirlaynd-ye prosch, aurt music ed khors,
16. kalt oino iom argats ed istifsart : “Quod ghi est ?”
17. So ei sayct: “Tien brater hat gwohmt. Tien pater hat gvehniht iom piwer vicel,
ob is hat iom retrohven wal.”
18. Bet grasbanasct ed refuset entre.
Eys pater salct ed iltijet iom.
19. Is antwehrdt ed sayct sieni pater: “Te slougneum pon tant yars,
ed naiwo missehkwneum oin wehlen ex te.
Bet mi has naiwo daht un eribh dapantum con mien prients.
20. Ed en tien son regwehmt. Is hat guraghen tien bayga con loktongs,
ed mauls ei iom piwer vicel !”
21. Is ei sayct: “Purt, tu es semper con me.
Quantum est mien est tien.
22. Bet tehrbmos dapane ed ghawde, ob en tien brater eet mohrt, ed is
oiscrehsct ; eet lusen, ed is est retrohven. »