1

Identidadi Kultural
By Dr. Azágua

Kultura ê alma nos identidadi,

Kultura ê tenpra nos katxupa,

Kultura ê môdju nos boka,

Kultura ê gostu kêl k’ê nos;

Kultura ê azágua, mar y mórna;

Ê onti, ôji y manhã;

Ê sinónimu di kaprixu y speransa;

Ê sínbulu nos rezistênsia;

Ê sangi y luta pa nos liberdadi;

Kultura ê txôru na kantu kaza,

Ê fésta na rua,

Ê badju na mei-di-sala;

Ê briu na pêli-korpu,

Na konpásu kavakin,

Na monzada viola,

Na ritmu violãu,

Na txôru violino;

Na vibrason di férru,

Na sarridja di gaita,
 2

Na melodia di sinboa,

Na rapikada di txabéta,

Na son di tanbôr;

Kultura ê Sporting,

Ê Benfica,

Ê Porto;

Ê Nélson, Miguel y Jorge Andrade,

Ê Henry Larssen, y Patrick Vieira,

Ê Nani, Manuel Fernandes, Pelé...

Ê kanpionatu zóna,

Ê futubol federadu;

Ê selésãu di Kabu Verdi;

Kultura ê Nelson Évora

ku medlaha d’oru;

Ê Nuno Delgado

ku medalha di bronzi,

Ê Wania Monteiro

na Jogus Olínpikus;
 3

Kultura ê luta di dia-dia;

Ê luta pa ganha,

Ê luta kontra tenpu,

Ê luta kontra tudu kêl ki ben!

Kultura ê diskorda na prasa públika,

Ê konsénsu na parlamentu;

Ê zanga ôji, konpo manhã;

Ê almusa teoria,

Ê djanta prátika;

Kultura ê portôn

di Ribêra Grandi-Santiagu,

Txôn di nh’amigu Marsianu Moreira;

Kultura ê língua di térra;

Ê ratxa gramátika

di kriolista Manuel Veiga,

di Dulce Pereira y ôtus,

ladu-a-ladu ku di Tomás de Barros

y José Maria Relvas;

Kultura ê trapítxi ta pila kana

na Paúl y na Santiagu;
 4

Ê batuku Txan-di-Tanki;

Ê tabanka Txada-Grandi;

Ê funaná di Férru Gaita;

Ê Bulimundu

di Zéka nha Renalda;

Ê vós di Zé Casimiro,

Frank Mimita,

y Norberto Tavares;

Kultura ê batuku y finason

di raínha Násia Gomi,

di nha Gida Mendi;

di nha Bibinha Kabral,

di Séma Lópi,

di Kodé di Dóna;

Ê puezia pupular di Anu Nobu;

Ê puezia di Jorge Barbosa,

di Káká Barbosa,

di Arménio Vieira,

di Kauberdianu Danbara,

di José Luís Tavares;

 5

Kultura ê literatura na língua di Camões,

ben rafugadu,

tenpradu ku matêga-terra,

di José Luís Hopffer Almada,

di Filinto Silva,

di Daniel Spínola;

Kultura ê stória ben kontadu

di Daniel Pereira,

di António Correia e Silva,

di Tomé Varela y ôtus;

Kultura ê revulusãu di Orlando Pantéra;

Ê violãu di Katxás

y di Ntóni Denti d’Oru;

Ê puezia y árti di Mário Lúcio.

Ê kumédias di Nastási Lopi

y nhô Puxin;

Kultura ê rabóita di Rubon Manel,

Ê balentia y ónra di

Padri António Duarte da Graça;

Ê korason di rabeladu Spinhu Branku;

Ê korason di rabeladu Pónta-Belén;

Ê luta pa unidadi y dimokrasia

 6

ku spíritu di Máika Lobo,

na tenpu di liseu;

Kultura ê

bandêra, banderóna,

di Bórta-Bórta

tê dâ DjârFogu bórta;

Ê fésta nho San Filipe

tê ki korpu nega;

Ê kurrida di kabalu

pa panha argorinha;

Ê paravanti na sala suadjadu,

Ê talaia-báxu na txon simentadu,

Ê kanizádi na rua;

Ê gaita di Minó di Mamá

Ê stória ki pô-nu na mapa

di António Carreira;

Ê manduku di puéta-kriolista

Pedro Cardoso;

Ê Ilhéu das Contendas

di Teixeira de Sousa;

Ê prende kriolu y gramátika

ku Manuel Gonçalves

y Nézi Brito...
 7

Kultura ê mangasan,

Ê karkutisan,

Ê dibinhasan,

Ê rafôdju,

Ê pidi-praga,

Ê bota-sórti,

Ê konta-stória

di Tubin ku nho Lobu;

Ê trâ fatisêra;

Ê ramédi-terra;

Ê obi Peléti ku Bodóna

konta-párti di-sés manêra;

Si bu ka konkorda,

pergunta kêl-ôtu;

Ê obi stórias y más stórias

sábi di Juzinu soldador;

Ê kantigas di Ana nho Prukópiu,

di Prínspi di Ximentu;

Ê konbérsu sábi ku rafôdju

di Vina Nhánhá,

fidja Brankin di nho Prukópiu;

Ê konta-stória ki ka-ten-fin,

di Djonzin di Katrina Luzia

 8

na nôti lua-nóba;

Ê ba kontra ku terral tóki riska

na Lagoínha ku kuskus ku lêti,

na tenpu fijon furadu;

Ê korré ku bruxa y fatisêra

di nôti na krus y na rubêra;

Ê berbunkadu-fatuzés;

Ê pidi Nho Mane-Santu bensôn

na kamin di skola,

pa po-nu juís

y pa tra-nu di prigu;

Kultura ê mórna ku valsa,

Ê paravanti ku mazurka

na salónas di DjaBraba;

Ê festeja nho San Djon

di Furna tê Nova Sintra;

Ê prusisãu kunpridu

sima muradja di Xina pa bá misa,

Ê kabalêru ta leba bandêra;

Ê pilon na kaza di festêru,

Ê tanbôr ta rupika,

Ê koletxa kuátu pó na pilon;

 9

Ê mundjês ta badja,

y ta kotxí mindju;

Ê fogêti ta baza na séu,

Ê salta lumi três bês

pa dâ sórti,

pa trâ azar,

pa dâ saúdi na korpu;

Ê kebra óbu na kopu

pa mostra distinu di kada un:

s’ê viáji, mórti ó kazamentu;

Ê sinza ku pedra-sal

pa dâ sinal d’azágua;

Ê fésta di xerên ku fejuada y kárni;

Ê enfetâ Mástru na Kutel Grandi;

Ê dixê Mástru pa trâ oferta;

Ê puemas d’amor

di Eugénio Tavares;

Ê dibáti sobri identidadi

ku Viriato Barros;

Ê diskubri língua y kultura

ku Donaldo Macedo;

Ê konxe sosiedadi y valôris

ku Hélder Varela;
 10

Ê kistiona múzika y tradisãu

ku Vuca Pinheiro;

Ê obi konbérsu sábi y konsêdju

di João “Van” Pereira;

Ê konxe DjaBraba

na puezia y pintura

di Cajuca Pereira;

Kultura ê korta kêju

na DjarMai;

Ê provâ kel atun

ku kel grógu sábi

báxu naris;

Ê fésta ti manxi

Dia 8 di Setenbru,

Dia di Munisípiu

y No’Sióra da Lus

báxu sabura;

Ê resebe-u kontenti

Na Lagoa y na Calheta,

Na Morro y na Barreiro,

Na Pedro Vaz y na vila Port’Inglês;

 11

Kultura ê kolá San Jon na Sant’Anton;

Na Ribêra di Paúl,

Ku grógu ta bai, grógu ta ben;

Ken ki konporta, ta torna volta,

Pa badja koladêra

Na Ritmo dos Cabo-Verdianos

di Ti Goy e Djosa Marques;

Na konpásu di Frank Kavakinhu;

Ê puezia y konpuzisãu

sen otr’igual di Manuel d’Novas;

Kultura ê mazurka na San Nikulau;

na Vila di Ribêra Grandi,

na stória Capitão Ambrósio

na txôn di Gabriel Mariano;

Ê stória di Chiquinho,

Ê txon di Caleijão,

Bérsu di Baltasar Lopes da Silva;

Kultura ê festival na Baía das Gatas,

Ê koladêra na Maderalzin,

Ê konpuzisãu di B. Léza,

Ê puezias di Vera Duarte

Y Ovídio Martins;
 12

Ê Bana y Cesária Évora,

Ê Titina y Celina Pereira,

Ê Tito Paris y Paulino Vieira

Ê Bau y Vasco Martins;

Ê instrumentu di Luís Rendall;

Ê gitarra di Bius;

Ê klarinêti di Luis Morais

Na vós di Djozinha;

Ê puezia di Sérgio Frusoni,

Ê románsi di Manuel Lopes

Os Flagelados do Vento Leste;

Chuba Brava;

O Galo Que Cantou na Baía;

Ê puema di Quem Que Fica;

Ê pintura di Txalé Figueira,

Ê tiátru Mindelact,

Na txon di Claridade.

Kultura ê tudu ki tâ festejadu,

badjadu y kantadu na Djâ-d’Sal;

Ê morna y koladêra

na vós di Ildo Lobo

y família Lobo;
 13

Ê kel pedra-sal

ki ta tenpra tudu pratu;

Ê sinti kalor di mudjês bunitas

na praia-mar di Santa Maria,

ilha porta-fuzãu ku ôtu mundu;

Kultura ê tudu ki tâ festejadu,

tokadu, kantadu y badjadu

na bérsu-mórna, Boavista,

na violãu di Tazinhu;

Ê kanta y badja landú

na noti di kazamentu;

na terra di marinhêrus y kapitons;

Ê literatura y filmi na

Testamento do Senhor Napumoceno

na txon di Germano Almeida;

Ê Voz do Império y puezia

di Daniel Felipe;

Kultura é azágua na padjigal,

Ê burru nos karru;

Ê lêti nos koka-kóla;

É spiga asadu, nos gaita;

 14

Ê txêa na rubêra,

Ê fonti intxidu tê bóka;

Ê pêxi na fundu mar,

Ê bóti ban d’atun,

Ê txitxárru ku palonbéta

ta nada na praia-mar;

Kultura é sodádi di

ken ki bai pa terra lonji;

Ê tristéza pa ken ki fika;

Ê sodádi y tristéza

pa ken ki volta,

S’el perde ken k’el t’ama.

Kultura ê dósi sima mel,

Ê salgadu sima asúkra...

Kultura ê sér kabu-verdianu

Kultura ê tudu kel

ki Déus dixa-nu;

Ê tudu kel

ki nu faze ku nos mon,

y nu konpartilha-l ku otus;

Kultura ê nos;

Na korpu,

Na alma,
 15

Na menti

Y korasãu;

Kultura ê onti, oji y manhã.