THUNGETNA Hi Bangin Thu Ih Ngen Khawm Diam?

A LAMDANG TOPA JESU Kote ading singlamteh ah thahna a thuak, a thokik, van a kah, Kumpi tokhum ah a tu Gumpa aw kong bia uh a, zahtakna kong pia uh hi. Kote Hong thuum sak Kumpi, tawntung itna tawh a siangtho Na pumpi Nang le Nang leitung ading le kote khempeuh ading Nong kipia hi. Topa Jesu aw, Na tokhum pen hehpihna tokhum ahih manin nuam ung. Pa ziat lam ah kote mawhna Hong thuum sak na hih man in ka nuam uh hi. Hih zah a lian a lamdang Nong hehpihna sang dingin kilawm kei lua ung Topa! Pasian nei lo, lametna nei loin ka om uh laitakin Nong zong hi. A lamdang gupkhiatna lianpi ka saan thei nading un, kote tang ding nong si hi. Pasian Tapa le Mihing Tapa aw, kong bia uh a, zahtakna kong pia uh hi! Bangci in hi zahta kote Hong it thei na hi hiam? Bangci in vantung na gei ah a tu dingin Hong koih thei na hi hiam? Bang ci bangin kote Nang tawh a thuum khawm ding, thungetna ah Nang tawh pang khawm dingin Hong bawl thei na hi hiam? Aw Topa, ko kiphu kilawm kei lua ung! Thungetna in gualzo hi cih thusim a telsiam dingin a zekai lua kote mawhna hong mai sak in. Tavuan thupite gen lo, a thupi khol lo te nangawn in, Nang tawh thunget khop ding ka hunte uh sut sak zel, sukha sak zel, buai sak zel ka hih uh man in Hong mai sak ta in! Thungetna thupi zia masa sak in, ka kip sak ka kho sak thei nang Hong hilh in! Ko le ko kidek, kidamin, thungetna ama mundik ah ka koih thei nang un Hong hilh in! A gualzo thungetna ABC hong hilh in! Tua hi leh, Na hehpihna hangin, a thuk zaw, a thuk zaw lai, vanglian, a thahat, agualzo thungetna ah Nong makai thei ding hi. Na itna mit in midangte le hih leitung a mu bangin ka mu thei nading uh mittang hong pia in! Mawhna hang a dahhuai tuaksiatna, mihing tate mangthang ahih na, Satan in hih leitung galmat in man a, sila suak sak in, a thongkhiat koltang silate a phawk siam ding lungtang hong pia in! Na pawlpi le Nang a, ahi khempeuh Na itna a phawk siam ding lungtang Hong pia in! A mangthangte Na itna bang itna a tam zaw Hong pia in! Leitung anlak ding na lunggulh bang lunggulhna hong pia in! Na gam khanto nading an duh tui duh bangin ka duh nading uh hong huh in! Aw Topa, thunget zia Hong hilh in! Topa, thunget zia hong hilh in! Ka lungtang uh, Na lunggulna, na deihna tawh Hong kidim sak in! Ka mitte uh Na khituite tawh Hong kidim sak in! Ka lungsim, ka kha uh mawhna huatna tawh Hong kidim sak in! Thungetna ah Dawimangpa ka khaam zawk nang uh ka deihna, ka lunggulhnate uh Na thahatna tawh Hong kidim sak in! Nang tawh ahih zong, Nang ading ahih zong, a siangtho zawhna le thahat thuumna ka sep thei nang in ka kha, ka lungsim uh Na Khasiangtho vangletna tawh hong kidim sak in! Khatvei a thak in, kong ki-ap uh hi. Hong sang in! Ka vek un Hong sang in! Hong la in la Na Kha tawh Hong kidim sak in! Tua hi leh, ko hi lo, ko sungah Nang nong teng dinga, ko itna hi lo, Kote tungtawn in Na itna kibua khia dinga, kote vangletna hi lo, a thahat Na vangletna in Hong lencip in kote sungah kote tungtawn in na Nong sem ding hi. Kote sungah Hong kidim in! Tua hi leh, thungen pen ko ka hi kei ding uh a, thahatna le upna tawh kote tungtawn in Khasiangtho in thuum ahi ding hi. A siangtho le a vanglian thuumna tawh thunget nang Hong huh in! Kote Nong sawl ciangin thungetna van, ka puak nang Hong huh in! Khasiangtho ii a thahat thunget kibuanna ka kibuan zawk nang Hong huh in! Van tokhum ah a thahat Hong thuum sak Pa aw, kote in thungen galhangte cih ding ka kilawm kei uh hi. Ahih hang thunget galdona ah thuak keeikaai, Topa tang in galzo in mainawt nang Hong huh in!

Satan ngiimna le hong do nate a kizawh mateng, Satan mat a thuakte a kikhah khiat mateng, zawhthawh bawl in Satan in a laak gamte Nang ading a kilak kik zawk mateng Hong huh in! Satan nungkiin in galte kulh khat khit khat a kilak mateng Hong huh in! Khukdinh sa in a tawntung mailam mainawt nang Hong huh in! Na min ii a siangtho thuneina, Na singlamteh ii zawhna, le Na sisan ii vangletna ka zat nang uh Hong huh in! Topa Jesu aw, kiphut kilawmna mal khat them khat zong ka nei vet kei uh hi. Ka kicing kei uh a, ko thu in bangmah ka hih thei uh a om kei hi. Hih mah ta leh, Na minthan nang Hong zangh in! Na lungtang ading lungnopna Hong hi sak in la, Na min ading pahtawina Hong hi sak in! Kote hong nget thei, kote nget ngei, kote ngaisut thei khempeuh sangin a lian zaw, ciangtan nei lo Nang na hih thei hi. Kong um uh hi. Kong nget uh te ko aa hi zo ci in ka um uh hi. Nang deihna bang piang ta hen! Kote thumanhna le thungetna hangin Nang ading zawhna hi ta hen! Ka lungsim ii ot-khiat-na le kote lunggulhna tangtung in Amen kici ta hen! Kote Topa Jesu Na min siangtho tawh kong ngen uh hi. Amen. Wesley Duewel ii Prevailing Prayer pan in Pastor Kenneth H. Suanzanang tei ahi hi.