A publication of Young Paite Association, Bungmual Unit

Bungmual Weekly News

Website:http://www.bungmualweekly.tk or http://www.bungmual.zogam.net E-mail : bungmual @ Yahoo.com

Uisa ne khinphet ka hi. Hon simmoh ken! Ppl Biakdong

SUAH NO. 20

NipiNi may 13, 2012

BUNGMUAL

THU TUamTUam
= BYF Bungmual in Year Plan a neih uh tawh kiton in May 10, 2012 in BYF G. Mualkoi te vehna va nei ua, kithuahkhawmna nei uhi. Hiai hun in Sawltak Goubiakmuan in Pathian thutak genna nei a, Bungmual leh G. Mualkoi BYF te akipan in lapawl ngaihkhiakna leng om tuak hi. Program nuamtak a zat zawh un BYF Bungmual in singpi leh sang a puak kikhop tawh in dawn in nekhawm ua, kipaktak in kikhen uhi. = Khankhual Tunglut s/o Pa Nengpau of New lane in leng Pathianni paisa nitakin Lanva apan a damsung tulpih dingin Lia Lunniang hon tuahtou giahgiah. Koppih nuamsa hong hi un. = Tangval suanhuai K Siamkhum Clv leng typhoid natna ziakin lupna ngakin om zek man a, tu in hoihlam nawt in auto hekpeih ta mah leh passenger te gas buuk adop khiakpihna lam ah a khe sukha na kha nawn nemnum hi. Nu Ngaihpi w/o Pa Raymond Slv leng typhoid natna ziakin nitak 2 lupna ngak man. Pa Khamzathuam Tonsing Clv leng damlou halh siang thei taktak lou in lupna ngak in omlai. Pa Kamnou Lnv leng damdawi inn ah etkol in om lel lai. = Pa Thangkhopau Ngaihte IAS (Retd) leng damlou lupna ngak in om a, Imphal ah kal a suang operation in om chih thu kiza. Nu Chinkhanvung w/o Pa Thongkhothang LLv leng damlouhna ziakin Lamka damdawi inn ah etkol hilel hi. Damlou tengteng i thumna uah phawk tek ni hang aw. = Ppl Evan T Munsong Asst Manager NABARD leng hun bangtanhiam Aizawl a a posting nungin Dimapur ah kisuan a, May 1, 2012 in va join ta chih thu kiza. = Ppl Jimmy Ginbiakthang Nl leh a lawinu Ngainunmawi te kallui in Delhi ah honey moon zangkawm dingin lengsuk uhi. A nu Mawi ahihleh Delhi government nuai a hospital minthang mahmah Deen Dayal Upadaya Hospital (DDU) a staff nurse semlel ahi hi. = Sir Damkhangin @ Gigin Hauzel in leng belta buh nedingin kallui in innpi apan Laiveng a Pa Nengkhokam inn ah a saannem toh a ana ki move tou uh. = BWN Ex-Editor Ppl Jammuanthang in leng belta buh mah lunggulh ziakin New Lane a Angles place kiim ah a tenna ding innlam panta. = Ppl Nungkhanpau leh a sannem leng belta buh ne dingin Hausa veng apan Pu PC Parte campus,SLV ah hong kisuansuk uhi. = Lamka mipin mit doctor i neihsun uh chih theihphial Pa Dr NC Khup in hun bangtanhiam suty hong zat nungin zanin a sepna mun Dehradun zuanin hon paisanta. A hong kik nawn pah i lamen!. Hibangkalah, Tangval suanhuai Thangmuanlian Nl in leng hih di poimawh tuamtuam neihziakin Shillong honna zotsan. Tukal sungin Bangalore leh Delhi zuanding student hunkhop om uh chih thusuak leng zak ahi ve. Hibangkalah, kal khat lel khawng hong ki charging zualdingin CRPF a Dy Commandant kaithak liklek pa Chin h/o Nu Douching Slv leng vangkhua hongtung. = Pa Siamnou Ngaihte DCIO, Singngat leng Delhi ah a ki transfer tawh kiton in Delhi phualpi ah va join khin thamta a, tunung sawtlou in a zi leh tate hong piding chih thu muanhuaitak apan kiza hi. = Lia Jamkhanniang d/o V Langzagin Zrv in zinghal Sepnawnni in Tangnuam ah Christian dansiang thou in pasal neiding hi. Nitaklam in Niang khakna leh thumsakna om ding. = T. Douchinkhup leh Khamzagin ten kallui kiginni in a upa tou uh Upa V Nengzathang of Zoar veng zahtak etsakna in sa gawhna (Tousa gohna) hong nei uh. Hiai hun ah tanau-laina tamtak paikhawm ua, Veteran Singer Nu Lianlunching, Tg V Hangpu, Lia Vungzamawi leh Lia Maman ten lasakna hong nei uhi. = EBC Bungmual Upa committee deihna bangin tulai in Biakinn nuai bawlna nasatak in pailel a, a biktakin a tuang (floor) nuam mahmah ta chih thu kiza hi. = All Manipur Football Association (AMFA) te inntekna in Pathianni paisa (May 6, 2012) in Imphal Khuman Lampak mun ah umpire/ referee tawh kisai exam-na thupitak om a, eikhua apan in leng Pa T Thangzasong (CDSA President i/c) makaihin hiai lam a lunglutna nei mi bangzahhiam vatel uh chih thu kiza hi.

Mi ettontak Kapgoulian Vualzong

V Langzagin of Zoar Veng, Bungmual tapa 3 na Kapgoulian Vualzong ettontak ahihdan saulou in i taklang ding. 1987 kum a piang Goulian ahihleh Delhi a om hi a, khalui a Assistant Grade (CSS) muthak liklek ahi. 2007 in Motilal Nehru College, Delhi University nuai ah Political Science (Honours) la a, huai kawm in mahni ki toudelh (support) in BPO (Call Center) ah night shift in sem hi. Inn a tungkik chiang in college kai din kuankhe zel a, huchia semkawm kaikawm himah leh attendance sam (short) ngeilou a, 90% plus hi gige hi. A class uah topper hi tou den zaw mah. 2010 in Political Science (Honours) 62% in zou a, amau department ah topper a pang in Topper Achievement Award mu hi. Tua ban ah, Andhra Bank & Corporation Bank ah leng Probationary Officer ana gelh ching hi. SSPP JHQ Delhi term thak (2012-14) a Education Secretary ahi a, a hihna toh leng etton tak lokhin pah ahi. Nitak a BPO a sem a sun a College kai, attendance 90% val ban ah Class Topper a pangzou chih thupi mahmah ahi. Ban ah, DU nuai ah Political Science a 60% val mu tawm mahmah lai hin gen uhi. Civil Services aspirant ahih man in Bank PO ana mu mahleh bank a nasep toh laisiam haksa ding chihman a Bank PO ana join lou ahi a, tua leng CSS a Assistant sem kawm a Civil Services petou dia kisa hilai ahi. Tulaia te kuamah hichibanga kuhkal taka pang om nawnlou ahi di ua aw chi a a upa zawte'n a gengen uh, amah, a kawm a, dai khiinkhian a naktaka ana pang a, hong lohching khia ahi a, upa te adia lungmuanna, khangthak te adia inspiration himai ahi. Siamsin mahni kitou delh, kuhkal leh tuailai te a dia etton tham ching khat ahi. Tun ah Munirka, New Delhi ah a khosa lel.

YPA diamond Jubilee month long celebration tentative program

YPA Bungmual Kum 60 chinna (Diamond Jubilee) kha khat sung (January 2013 sung) daih in zatn aneihdingin executive committee dated 11 May 2012 (nitak) in thupukna kibawl hi. Hiai program zatna ding detail kimtak a bawl hinaikei mah leh TERM PLAN 2011-13 sepsuah ding omlai te hiai hun ah sepsuah hidng hi. Highlights: 4th January -21 January 2013: Program launching & The Samaritan purse dawhna 12th January, 2013: Free health camp & voluntary blood donation 14th January, 2013: Khawsung hahsiang social work 21st January, 2013: Jubilee Day, YPA video album honna leh YPA magazine honna etc. -Information & Publicity deptt YPA Bungmual

KIPAHTHU GENNA
Kal paisa kiginni in EBC Bethany nuai a BYF ten fund drive na in blanket sawpna kinei a, huai tawh kisai a blanket sawp ding hon pekhawmte, a poimawh mahmah siklawng, gua, sing water pump leh pipe hon khelsakte banah blanket sawpna a tha le zung seng ahong kuan tengteng tung ah kipahthu committee sik le tangin kon gen hi. -Secretary , BYF Bethany EBCC

= YPA Bungmual in Kiginni May 5, 2012 nitakin mobile kiguksakna tawh kisai case khat a sainung un a gutu suikhia ua, hoihtak a thuhilhna aneihnung un deihsakna lianpi tawh khahkhia uhi. Maban ah guta-lata hihbeina dingin YPA in kalsuan tou zelding chi uhi. = EBC Bungmual nuai a missions committee ten missionary vakna tawh kisai nnasep paipih tou zel ua, apaisa May 8, 2012 in forest beat office, Bungmual ah missionary box khat va koih uhi. Missions committee ten ahihleh khawsung a sumbukte tungtawn in khateng in sum hunkhop kaikhawm ua, tualou in BUTDASA parking a box akoih uh tungtawn in leng hunkhop musek uh chih thu muanhuaitak apan kiza. = May 9 -11, 2012 sung Hiangtam Lamka Public Ground ah CCpur district sung a private leh government school om tengin sports tournament nei ua, eikhua apan in leng Foundation school te vatel uh chih thu kiza hi. = Bethany EBCC ten tulai zingkal tengin social work nei gige ua, biakinn thak tunding sawm in pan naktakin la lel uhi. Hiai tawh kisai in mi kiphal lam tuamtuam a kithuahpih ut peuhmah in kithuahpih theih gige chih thu kiza hi. = Pa H Vumzakham ZRV in Kiginni in a tanu pasal neisa Nu Ngaigou khakna nei a, huai ah tanau-laina mi tamtak paikhawm in nitaklam annkuang luina leh van gotna neingal uhi. = Zomite lak a nasep taima leh sing leh gam hau mahmah a chiamteh SSPP Gen Hqtrs award tanpha ana sang Pa S Jamdoupau @ JDP Lnv in ICAR te tungtawn in NABARD apan hamphatna ngah a, ama nget hilou in ICAR ten Mata a a gam leh ngakul etna va nei in, voknou 8 leh nga (fish) 2000 akhoiding in pe top uh chih thu kiza hi. Aman agenna ah, khaw lum mahmah ziakin nganou 2000 lakah 85 geih hon pawlum uh a vele chi. = Lamlian veng a om Pa H Thangzamuan @ Muana te Ui tal hoih mahmah Jerry kal masa in Hausa veng area apan gukmang in om chih thu kiza hi.

Ka Ui hong pekik un
Ka Ui uh a nu hoih mahmah khat meltheih mahmah ten kou phalna tel hetlou in nana la mawk ua, tua pan ni 2 sung a ka inn ua nong koih kik kei uleh heutute kiang ah a thu tut touh ahi ding hi. Hibang guktakna kuaman chiing tam nawnkei ni hang. Sd/- G Ginhang Nl

Amazing Grace ah huhna pia

Brig V.S. Ranade, Commander, 27-Sector/ Assam Rifles in May 10 zinglam dak 10:00 lak in Bungmual a naupang tagahte kepna mun Amazing Grace veh a, panpihna in singpite(tea leave), chini, bawngnoi (good life) , antang bag 1 leh sum bangzahhiam pia hi. Amazing Grace saituten Brig Ranade

leh Major Chinkhothang Tonsing tunga kipah latsakna in puandum 1 tuak pia uhi.

Amazing Grace ah tulelin naupang kum 5 nuai ngen mi 5 om uh hin kigen hi.

Editor kikheng phut zual

Bungmual Weekly News Editor Ppl Jammuanthang in mimal a buaina khenkhat aneih ziakin BWN editor ahihna apan ki awngsut a, thuthak om ma teng heutute ngetna bangin K K Valte in hiai mawhpuakna hon lentou zual phot ding hi. Tua ziakin thuthang, thuthak, suahtuak, khualzin leh hongtung, naunei, innthak nei, inntuan, damlou, CID report, kua ten bang gen leh adangdang khawsung vai a kipolhlimna kawma suahtheih om tengteng mel kimuh kherkher ngaituanlou in 9862733016 / 8794481264 / 8974151277 te ah SMS leh trengtreng theihding hi. Oval!
Simtute tengteng na vek un Editorial Board thakte'n annek lim ka honkhak uhi.

Thumna inn cabin 1 lam ding

Muanhuaitak apan thutut ki ngahdanin,Hornbill cable network neitu Pa Mangpu Tonsing Hiangtam Lamka in I vengsak a Jeremiah prayer mountain ah thumna inn cabin khat lamsawm chih thu kiza hi. Pethei leh semthei zel a I om pen vualzawlna thupitak ahihdan phawkthak ni hangh.

Theihsakna poimawh
Job card nasepna water tanky bul apan nula bawl thak ahih tawh kitonin huai lam apan a tui laten pipel lawng te nulla sung apaisak nawnlou dingin iki zasak uhi. May 14, 2012 apan in lakhe ngaldingin leng theihsakna kon bawl uhi. Noute tawh semkhawm Sd/ - (H Thangzamuan) Secretary Bungmual Village Authority

YOUNG PAITE ASSOCIATION

Bungmual, Lamka

Office of the

MIPITE KIANG A NGETNA

Sihni-manni leh program tuamtuam a YPA in a mamawh mahmah belpi khaap 7 bangzahhiam bek neih lunggulh huai mahmaha, kua hiam memorial dia thawh ut ahihkei leh mi kiphal hon donate ut zenzen a om leh YPA Bungmual kipak mahmah ding ahi chih iki zasak in ikingen ahi. Tuabanah, khawsung a lampi tuamtuam omte YPA theihpihna tellou a min phuah phal hetlou ahi a, tualou in lampi min kiphuaksa khenkhat sign board kitaak te ana lakhe theizel pawl a om man in YPA Bungmual in nuam kisa lou hi. Hibang chindan tawpsan dingin akisaipihte zaksak ahi. Sinlaite kum kim exam kipan dek petmah ahih tak ziakin, kuaman sun hun leh nitak hun a thawmngaihlua a omlou ding leh lampi dunga ki mawkkou chihte khawlsan phot dingin ngetna leh theihsak ahi. Sd/- (H Zemkhanthang) Secretary Sd/- (Singkhanmang Guite) President

Missionary Day thupitakin kizang zou

Manipur simbial (south district) ah apaisa May 7, 2012 (seppatni) in missionary te adia ni biik Missionary Day zatna thupitakin om a, Rev T Paukhanmang Field Suptd, Karbi Anglong in EBC Bungmual Biakinn ah thugenna nei a, Rev B Chinlamthang IEM in EBC New Lane ah thugenna nei hi. Heutunu Donzachiin @ Chiinpi Promotional Secretary FMPB Arunachal Pradesh in EBC Zion ah thugenna va nei a, Nu Nemlawmching in Mata EBC ah va nei hi. Upa T Langzathang Chairman EBCC New Lane in Pethuel EBC ah thugenna va nei hi. Bethany EBC ah Upa S Kamkhosiam in zing kikhop ah thugenna nei a, nitakin H Vungkhanpau in gen hi.

Chairman: Singkhanmang Guite Editor : K K Valte Jt. Editor : S. Muandoulian Ngaihte

Asst Editor : N. Lala l

Bureau Chief. VZ Pau

Cir. Manager : Kaizamang

BUNGmUaL

NipiNi may 13, 2012

uni thupi
Aw, na dan deih hi na tel ing e! nituma ka ngaihtuah nak tuh ahi. Sam 119: 97

INTELLIGENCE REPORT:
= Gintak bang ngei in chih ding hia, ahihkei leh gintak bangloutak in chih zawk ding hia, Pathianni paisa nitakin Imphal a Bhagyachandra Open Threatre (BOAT) ah United States apan hong kipan leh leitung pumpi a rock band minthang ban FIRE HOUSE ten concert hong nei ua, eikhua ah Lia 2 va hawh ua, lia 1 pen ahihleh Bungmual khawsuak himah leh vengdang a omta hidanin gen uhi. Amau hoh bel poikei. Ameherawhchu talpak tangval ten zinglam dak 3:30 vela inn tan hong khak ngeingei uh zingkal thoubaih khenkhat ana mukhate mitsip mahmah. Fire house in Bungmual kaangsak aitam maw!!!! = Silo-am veng apan Dorcas road/veng ah ketli lengsuk a, June kha vel a a hong gahsuah i gingta hi.

Laibu Thak Hong Ding

Tunitaklam dak 1 in Pa Ginvum Ngaihte tenna inn, Laiveng ah a laibu bawlthak liklek Suangpi bang kip thucham nihte leh kidouna na nung pen kichi honkhiakna om ding hi. Deacon H Gigin in laibu thak hong ding a, Pastor K Mangpu in Yahweh kiangah latna neiding hi. Pa Ginvum ahihleh ZEO (retd) ahihbanah lehkha bu sim peih mahmah hi a, aman laibu hunkhop ana bawlkhiak banah monthly magazine minthang thak Gamdai a Kikou aw chih leng ana bawl in hun sawtpi paisa apan Editor hihna lentou den hi.

9ua ten bang say ???

Tulai kichangkang lua, singtanglam a lou mun ding ente ngangawn inle a loumun etna uh a hoih leh hoihlouh a gen nawnlou in network a hoih hia, chita uhi. - Sawltak Goubiakmuan = Ka gam, ka leitang, ka hauhsakna theinuam leh mu nuam peuhmah in chiklai peuhmah in hong mu un, bangmah theilou a, kipilsak tak a khawlak a na pawng chiakchiak sangun. Pu H Thuamkhanmang Bungmual Hausa = Khaw min laklak a nalh kasak pen Chandel district sung a -Nu Chingmuankim Slv om SITA village ahi. = Missionary Day hong gin chiangin Salpha Kamzathang ka -Pa D. Chinthang Llv phawkthak zel. = Ahun lah nai hiaihiai, ki - om kinken theinawn kei ei. Tg Goutunlian Slv = Mobile no ka theihlouhte ka lakei. Hon theisiam un. Tg Malsawm Vualzong Nl = Paupu a kapta!
Pa Tualkhanpau Lnv

Nute Ni (Mothers Day)

- BC Nangpoo Na nu-le- pa te uh pahtawi un. Thuchiam tawh kipehkhawm thupiak masapen hiai ahi: Huchi in nou adingin ahoih ding a, leitung ah khantou nuamsa ding na hi uh. Chih ahi. Ephesa 6:2-3 Philadelphia, USA a teeng Anna Jarvis in a nu apahtawina dingin ni khat a honsehkhiak, thu hoih mahmah ahihziakin 1914 kum chiang in US President 28 na Pa Thomas Woodraw Wilson (18561924 ) in kum tengin May kha a Pathian Ni nihna pen Nute Ni a zatdingin hong tangkou hi. Huai hun akipan a thukizakna peuhah May kha Pathianni nihna Nute Ni in kizang hi. Leitung a mi minthang khenkhat te tanchin leh aminthan theihna ding ua, ana chiil Nu thupi tanchin genzual ni. A thupi nute : Damlouhna khawsik gim mahmah a a om lai in vuahzu daikainuai leh khawmial lakah a nun doctor pa va ensak kei leh DL George (1863- 1945) 1916 kum in England te Prime Minister hikhalou ding hi. A nun aneulai akipan LST simna leh thumna tawh na makaih kei leh thugen siampa kichi C H Spurgeon (1834-1892) min I zakha kei ding hi. Laphuahsiam John Newton (1725-1807) misa nete laka missionary Robert Moffat (1795-1883), China gam a missionary J H Taylor (1832-1905), Methodist saptuam phuankhia John Wesley (1703-1791) hiai te Nu khat gahsuah ngen ahi uhi. :

Nu pahtawi mithupite

Kipahthugenna
EBC Bungmual in May 5-7, 2012 a Missionary Day kizat hun ah thugentu Rev T Paukhanmang F/S Karbi Anglong, hon na zintun sak Rev Dr Luaichinthang leh Pa Khamgoulam tungah kipahthu kon gen uhi. -BC Nangpu Secretary/Mission committee Bungmual

Sir W Churchill (18741964) in Ka teacher thupipen ka nu ahi chi hi. D L Moody (1837-1899) in Tu-a a ka tunna chiang ka tuntheihna ziak ka nu tunga ka leiba ahi chi hi. US President 25 na W Mckinley (1843-1901) in a nu ngailua in chin Washington DC a kipan Canton ah a nu tawh kikhawm dingin kuan khawm gige uhi. A nu laikhak den hi. Anu tawh kihouna dingin special phone line zansak hi. Buffalo, NY ah Leon Czolosz kichi pan thau tawh anu suam hi. W Mackinley in bel a huu neihteng tawh, ka nu hon hilh, ka nu tawh ka zakkhop zel uh- Nang kon naihsem nuam hi chih la hon sakpih un chi in ngen hi. Anu kivuina gei ah ki vui hi. Tuni in Nute pahtawi chiat ni. LST sim ding: Exodus 2:9 I Samuel 1:24 I Kumpite 2:19

KIPAHPIHNA LEH DEIHSAKNA

CoHSEM leh BoSEM nuai a banah board tuamtuam tungtawna i khawmi tutung a pawl X leh XII zouthak tengteng kipahpihna thu kon puang ua, alawhsamte leng kon thuakpih mahmah uhi. Tuni Nute Ni (Mothers Day) ahih tawh kitonin Nu-te tengteng zahna chibai kon buuk ua, na khan kumkhua uh hong sawt leh chih ka thumna uleh deihsakna thu kon puak uhi. - EDITORIAL BOARD Bungmual Weekly News

= Paupu bangziak a kap angut di? -Tg Velthianlal @ Lalal Llv = Huai mi kahna nang buaipih ngailou, nang leng na kahna di -Lk VZP Lv zonglel le chin himai. = Ka gari thak umaw Auto (Alto) ahi, hilele pei 4 nei. -Nu Vung m/o Thianlal Hsv = Kal 1 sung auto hoihtak a hek charchar, ziten kisilna ding ana bawl uh. Tua zawh Sunday a sa lim deuh meh, chapawt pucca deuh tawh. Kuamah ki eng tuanlou la Ppl Paw Paul Lv aw. = K K Valte in editor len nawn hiven, ki tuang mun geet nalou di hia? -Ppl Thangmoi Nl = En le I en vengveng dia kap na chance I miss keidia hilel -Ppl Khupkhanthang Lv eivoi Moi = Pasal ten ka torch light zuakte enlah theipeuh mah nuchiai China bawl ahi. Maam henhan. -Nu Khanchiin Slv = Khangthak te lak zeitak a film shooting thei ding ka mukei a,poi kasa. Film star I tasam uh. Veteran Actor Thriamuan @ Inspector saap. = Huaisang in khangthakte lak ah chitak leh ginom tak a siik sou ngiatngiat theiding mi fel ka mu kei a, poi kasa zaw. - Ppl Khualpu @ Mechanics Slv

THEIHSAKNA POIMAWH

LEGAL AWARENESS PROGRAM -cumFELIITATION OF SUCCESSFUL STUDENTS

Bar council, CCpur area leh YPA Bungmual pangkhawmin tunung sawtlou in i khawsung ah Legal Awareness leh tutung a pawl X leh XII exam a lawhchinna ngahte kipahpihna program zat hiding hi. -Inf & Pub. Deptt YPA Bungmual

Tutung PDS antang kihawm chiangin mahni polling booth wise dan a hawm hiding hi. * 58/6 (A) T Thangkhansuan LLV * 58/7(B) Gouching LNV * 58/8(C) K Kamkhosiam ZRV * 58/9 (D) Niangbiakching NL

KIPAHPIHNA

Damlou vehna nei uh

YPA Bungmual Executive Committee member Pu Khamzathuam Tonsing damlou lupna ngak in om lel a, zan zingkal in YPA President makaihna Executive members te'n vehna va nei uhi.

Tutung Class X leh XII exam a lawhchinna ngah i khaw mi tengteng kipahpihthu i news deihthoh tak tungtawnin kon taklang ua, tua banah alawhsam te lungke mailou a hong hahkat zaw sem dingin kon ngen uhi. Private skul pute sik le tangin Sd/- BC Nangpu

Delhi a kai ut student te dia theihtuak

Kum paisate mah bangin tukum in leng Siamsinpawl Jt Headquarters, Delhi in student paithak freshers te kithuahpih sawm nawn uh chih thu kiza hi. SSPP JHQ Delhi in Delhi University nuaia registration bawl ut innlam apan hong kipante adingin hiai anuai abangin theihsakna masa bawl uhi. Delhi pai dite a dia theihtuak tampite lak a poimoh diak isakte i taklang ding uh. * Marksheet neiloute a ding in internet apat download a I college kaina Principal countersign bawlsak a, DC attestation lak a pilvan huai mahmah ding. * Nikum a mi tamtakte buaipih Tribe Certificate a Sl.No. leh Round Seal omlou ahi a, hoihtak a etchet poimoh ahi. * Fake certificate I lakkhak louhna din pilvang ni. * DU in tukum a SC/ST-te a dia decentralize maithei uh ahihman in DU a ki-register I sawmleh ngaihven a hoih ding .

YPA GENERAL HEADQUARTERS DIAMOND JUBILEE CELEBRATION COMMITTEE BAWLKHIAK HITA

Nisim 1st May 2012, YPA GHQ office a committee meeting thupukna bang in hiai anuai a min te YPA GHQ DIAMOND JUBILEE CELEBRATION COMMITTEE diing in namkip uhi. Chairman : Pu H. Mangchinkhup Vice Chairman : Pu S. Chinngaihpau Secretary : Pauzagin Tonsing Asst. Secretary : Pu Tunglut Thuamkhopau President YPA New Lamka Block (Member) : Pu K. Thangkhogin President YPA Imphal Block (Member) : Pu H. Thuamzathang President YPA Lamka Block (Member) : Pu T. Khamchinthang Vice President YPA GHQ (Member) : Pu K. Zamsiam Member CEC (Member) : Pu S. Kamsuanlun Asst.Secy. YPA Lamka Block (Member) : Pu Singnunsiam Ngaihte Joint Secretary YPA GHQ (Member) : Pu T. Pumzanang SSPP GHQ President (Member) : Pu Lianzapau Samte President PLS (Member) : Pu John K. Ngaihte President PTC GHQ (Member) : Pu L. Tualkhanhau SOCIAL & CULTURAL SUB-COMMITTEE : 1) Chairman : Pu L Tualpum 2) Vice Chairman : Pu Gouzamang Guite 3) Secretary : Pu H. Zatuan 4) Member : Pu V Tualzakhup (Zion Veng) 5) Member : Pu S Kamsuan (GCK Veng) 6) Member : Pu G Tuankholian 7) Member : Pu Khammuanlal JUBILEE STONE ERECTION SUB-COMMITTEE 1) Chairman : Pu Upa V. Vungzathang 2) Member : Pu V Khankhup Guite 3) Member : Pu J. C. Khuptong 4) Member : Pu K. Thangdin 5) Member : Pu Thangzason 6) Member : Pu S Manlian 7) Member : Pu S. Nengsuanmang MUSIC SUB-COMMITTEE 1) Chairman : Pu T. Pumkhothang 2) Secretary : Pu V. Nunlian GAMES & SPORTS 1) Lamka Block YPA SOUVENIR SUB-COMMITTEE 1) Singnunsiam Ngaihte 2) K K Valte FINANCE SUB-COMMITTEE 1) Chairman : Pu S Kamsuanlun 2) Member : Pu K Zamsiam 3) Member : Pu G Kamkhanzam 4) Member : Pu L T Zuan Tonsing 5) Member : Pu Rev. Khen P. Tombing 6) Member : Pu Hangshyanthang 7) Member : Pu Khenthang Hatlang INFORMATION & PUBLICITY DEPARTMENT 1) Chairman : Pu T. Pumzanang 2) Secretary : Pu Thangmuanlal 3) Fin. Secretary : Pu V. Chinkhenmung 4) Member : Hau Ginlian Tonsing 5) Member : Singkhanlal Guite 6) Member : Luaichinkhup Tonsing 7) Member : T Pauginlian

(Sab lua kichi kei le maw???) -KK Al-va-eta Sept. 22, 2030 ahi a, ka birthday ni leng ahi. New York apan hongtung phet ka tanu Hoihching IGI Airport, New Delhi ah sawt khawlpih manlou in zi zi tawh Imphal ka zotpih ngal uhi. Indian Airlines Boeing 737 sungah gen nop ahau mahmah a, Astronaut ahih ziak chauh hilou in Zomi nungak maimai himahleh a khuak leh theihna ten gamdangte khuak ban leh zou mahmah ahih ziaka zahtakna leh pahtawina a ngahthute gen in ka 3 in ka chhiak zen ua, Airhostess ten Sir, have your tea hon chih ubang ka mangngilh zezen hi. Imphal Tulihal airport ah anau Muangte leh Suan goumung ten Mercedes N-777 car vom henhan in honna dawn ua, paak kilawmtak tawikawm in Papa happy birthday honna chi ua, ka kiguih dek hial a, lehlam ah khasiat huai zezen in, kenleng thankyou chikawm in a tal uh ka tawpcheuh hi. Ka Pu H Mangchinkhup Honble Minister (Education, TD & YAS) official quarter, Babupara ah baanzual ka ut ziakun Airport apan ka tai vengveng ua, Pi Ching in voksa hou pok huan, ankam tui leh zawngtah sathu a fuhdeuh a huan honna nesak a, ka tai ngial ua, Astronaut in kum hiai tan nung a inn-

VISION BUNGMUAL 2030

lam meh nek a lim e maw papa hon chi a, ei a nene te adingin lim kholkei ve aw chiin ka kichiam nuih ua, inn lam kinawh ka hih ziakun Pi Ching in Strawberry Ice cream hon hawm ne in Cabinet meeting a om Pu Khup ngak manlou in pianna Bungtui vangkhua zuanin kong tai chercher uhi. Hoihching in Sielmat Hospital sawng 7 akibawl amuh in lamdangsa mahmah kawmin, ka pianna mun hilou maw hon chi a, a nun kintaka dawng kikin (numei chih mahtak) hiai pen ICI te a hi a, ei a ten tutan hospital genlouh a school neih sunsunte uleng mite etlah leh kingakna tham a koihnai lou uh eivoi a chi ngal hi. Tipaimukh road zui in kong taitou ua, IB road leh Tip road kisuktuahna bul CCpur govt college kong a lampi laitak a paak kilawmtak in a um kimvel Phungkhothang Guite statue leh traffic light te amuh in lamdang sa geet a, nidang a hiai mun hawktui luanluanna hilou maw hon chi a, kei chih mah takin khang kikhengta eivoi, MLA pu en ve chi lel in ka dawng a, Bungmual lut dong a dai dide a, bangteng ngaihtuah adiam chih bel ka thei kholkei a, kan leng ka kan bok kei. (aban next issue ah)

WOMENS HOSTEL :
Govt. of India, Ministry of Women & Child Development malakna in North East apan numei nasemte a ding biik women hostel bawlzouta uh. Hiai hostel ahih leh Jasola Vihar (opp. Apollo Hospital) New Delhi ah om a, mi 500 om theihna dia kibawl ahi. YWCA, Delhi etkaina nuai a Ministry of Women & Child Development leh DoNER pangkhawm a kibawl ahi. For details and admission, please contact the Gen. Secretary, YWCA of Delhi, Ashoka Road, New Delhi- 110001, Tel23362779 & 23382975, Fax:23745138

ZC in kipahpihna nei

Zomi Council (ZC) in zan in Manipur a Zosuan MLA chingthak teng leh MDC te kipahpihna nei ua, eikhua akipan bialtu MDC Pu H. Mangchinkhup, EM leng tel in thugenna hun va nei hi.

Bungtui Aw na join ta hia?

Leitung pumpi ah Gupshup tungtawn in mobile news kichi million 145 val om a, India ah lakh 17 vel om chih ahi. Huai lak a telpha leh subscriber a sanga sim nei Bungtui-Aw pen most informative broadcaster telkhiakna ah tel ban hi. Tuni a thiltung, zingchiang a thiltung ding tuamtuamte na theihnop leh na mobile message ah join bungtuiaw chih type inla, tua zawh chiangin 09219592195 ah khak ziau le chin na tutmun, na dailenna mun leh na pawtna mun peuh ah, Lamka leh asehvel banah thuthang tuamtuam midang theihma in na mobile ah hong lut hiau maiding hi. Na buai leh Bungtui-Aw Editor N Lalal @ 8974151277 ah thuzak in.

Exam kipandek: Thawm neikei ni

I khawsung a school om, Lalpuithuaii Foundation School leh Hermon English School ten kum kim examna pandek tuaktuak tau hi. LFS ten ahihleh May 31, 2012 in pan ding ua, June 8, 2012 in zou ding uhi. HES ten ahihleh May 29, 2012 in panding ua, June 7, 2012 in zouding uh chih thu kiza hi. Huai ziakin thawmngaihlua in kuamah omkei ni. Sinlai ten akum kim lou khoh uh gah kipahhuaitak hon lawh theihna ding un panpih chiat ni hangh.

Sapten hun awl leisure a chi ua, zi leh tate toh zatkhop nuam hina tel e maw... Hoih. - Ppl Thianlal @ Mi buai