LIBERDADI D’IXPRESÃU TEN, SIN SINHÔR!

By Dr. Azágua

Liberdadi d’ixpresãu ê un direitu konstitusional garantidu a tudu sidadãu

kabuverdianu. El sta ben klaru na Constituição da República , CAPÍTULO I DOS
DIREITOS, LIBERDADES E GARANTIAS INDIVIDUAIS - Artigu 28º (Direito à
liberdade):

“1. É inviolável o direito à liberdade.

2. São garantidas as liberdades pessoal, de pensamento, expressão e informação, de

associação, de religião, de culto, de criação intelectual, artística e cultural, de
manifestação e as demais consagradas na Constituição, nas leis e no Direito
Internacional geral ou convencional recebido na ordem jurídica interna.”
http://www.stj.cv/constituicao.html

Purtantu, sima nu ôdja, tudu kês k’ê dirijentis, ó ki stâ ligadu a asuntus públiku debe
ten kuidadu nas sés primêru prinsípiu, es y ku es-mé, izerse direitu di liberdadi
d’ixpresãu.

Ê di dirêtu natural, nos ser umanu ten aptidãu di ser livri. Purtantu, liberdadi ê
kondisionadu a puzisãu en ki ómi ten na sosiedadi, na família y na trabadju.

Nos tudu nase livri, na alma, na pensamentu, y na sentimentu. Nu kria y nu fika

ligadu a sentimentu y ôtu korasãu, só pamódi nos ê livri. Y pamódi nos é livri, nu ta
renunsia y nu t’abdika a tudu kêl ki pode ameasa kuzas ki ta nporta-nu.

Y pamódi nos ê livri nu ta luta pa liberdadi; pa liberdadi risponsável. Pa asãu

konsienti ki ta spresa liberdadi, y ta difende izersísiu y konsikuênsia di liberdadi.

Na Mensájen di Diretor-Jeral di UNESCO, Koichiro Matsuura, p’okaziãu di Dia Mundial

di Liberdadi d’Inprensa 2006 - 3 di Maio, el flâ:

“No Dia Mundial da Liberdade de Imprensa, lembramos ao mundo a importância de

proteger os direitos de liberdade de expressão e de liberdade de imprensa
consagrados no Artigo 19 da Declaração Universal dos Direitos Humanos. Liberdade
de expressão e liberdade de imprensa são elementos centrais para a construção de
democracias sólidas, promoção da cidadania e do estado de direito e um estímulo ao
desenvolvimento e segurança individuais.”

Sin. Kualker ser umanu ten liberdadi d’ixpresa. T’izisti obviamenti regras ki debe sér
kunpridu, má liberdadi d’ixpresãu ê un valor inpurtanti y inpresindível na jixtãu di un
país. Ê klaru ki ten limitis legal y moral. Nu ka debe kunfundi liberdadi d’ixpresãu ku
liberdadi pa difamasãu ó agresãu. Ka nu skese ma nos liberdadi ta termina undi di
ôtus kumesa.

Liberdadi d’ixpresãu ka ta dâ ningen direitu di ofende ôtus ó di ridikulariza pai ó mãi

di ôtus. Liberdadi ka pode sér kunfundidu. N pode dâ ku sôku na ar à vontadi, má
desdi ki-n ka tinji naris di nha irmãu. Prega liberdadi d’ixpresãu sen ruspêta direitus
d’ôtus ê sima dipravasãu intelektual y selvajaria.

Liberdadi d’ixpresãu ê un direitu fundamental, má ê ka absulutu, y el ka pode sér

uzadu pa justifika violênsia, intimidasãu, difamasãu, kalúnia, insuburdinasãu,
distruisãu, rivolta, ó obsinidadi.

Prinsipais funsons di dimokrasia kabuverdiana ê proteje direitus umanus

fundamentais sima liberdadi d’ixpresãu y rilijiãu; direitu a prutesãu legal igual; y
oportunidadi di organiza y partisipa plenamenti na vida pulítika, ikunómika sosial y
kultural di nos sosiedadi.

Nu ka ten dúvida di kelâ; y nu ten ki dâ dimokrasia oportunidadi di funsiona. Ku

kalma, ku tenpu, tudu kuza ta midjôra. Azágua ta dâ, tud’algen ta panha na txon;
tud’algen!