MISSION VENG KOHHRAN

Sacrament Department Zirlai

Zirlai 41 Na

ZANRIAH HNUHNUNG-TUMKAU NI
Kawhhmuh tum : Lal Isua inpekna hlutzia hriattir
Chhiar tur : Mt 26:20-26; Mk 14:17-25; Lk 22:14-23; 1 Kor 11:17-34

Vawiinah hian hian Lal Isua leh a zirtirten zanriah hnuhnung an kil thu kan zir dawn a. Isua chu
khawvel sual tlan turin kraws-ah an kheng bet dawn tep tawh a, a zirtirte a kalsan dawn a. A dam laia chaw
an ei hnuhnung ber tur a nih avangin Zanriah Hnuhnung tih a ni. Vawiinah hian Zanriah hnuhnung
chungchang hi kawng thumin kan zir dawn a ni.

1. Pindan chungnung zau tak : Lal Isua chu khawvel sual tlannan an khenbeh hun a thlen dawn
hnaih Kalhlen Kut hmanga tura Jerusalem an kalin zanriah hnuhnung buatsaihna tur Petera leh Johana
te chu Jerusalem-ah a tir a. Tihdan tur engkim a hrilh lawk vek a. Isua hrilhlawk ang ngei chuan mipa
bela tui pu an hmuh chu an zui a, ani chuan pindan chungnung zau tak bungrua engkim awmsa chu Isua
leh a zirtirte tan a buatsaih sak a ni. Juda zingah hian a hausa deuh chuan pindan pahnih an nei deuh zel
a. Pindan te deuh zawk chu a lian zawk chungah a awm thin a, chuvang chuan Pindan Chungnung tiin
an vuah thin. Kalhlen Kut lai reng reng hian mikhual ten riahna man engmah an chawi ngai lo a ni.
Pindan chungnung zawk hi Rabbi ten zirtirna leh inhmuhkhawmna atan an hmang thin a. Isua pawhin a
zirtirte nena zanriah hnuhnung kil nan a duh zawk a ni.

2. Hei hi ka taksa, in aia pek tura chu a ni : Kalhlen Kut lai hian Juda te chuan beram an talh a, a
thisen, a kawchhung leh a thau chu an sual thawi nan Jerusalem Temple-ah an hlan a, a sa chu thuthlung
inthawinan ruai atan an ei ho thin. Hetiang hi sual tlan nan ti mahsela sual tlanna a tling zo lo. Isua
chuan ama taksa ngei chu thuthlunga inthawi nan a pe dawn a. Kalhlen kut laia thuthlung inthawina ruai
an kil ho thin angin a zirtirte nen inpawlna ruai hnuhnung an kil ho va. He thuthlung thar ruai atan hian
ama taksa chu a hlan a, chumi entirna atan chuan chhang a la a, lawm thu a sawi zawhin a phel a, a
zirtirte hnenah, “ Hei hi ka taksa, in aia pek tur chu a ni; mi hriatreng nan hei hi ti rawh u,” a ti a ni.
Lal Isuan taksa ngeia a tawrhna chu suala tlute tan damna a ni tih entir a duh a. Chhang hi
Juda te chaw rinpui ber, an nunna a nih angin Isua taksa chu an thlarau tan chaw tak leh nunna a ni tih
entir turin chhang chu a hmang a ni.

3. Hei hi ka thisen.... mi tam tak tana... chhuak tur thuthlunna chu a ni : Lal Isua thisen chu
khawvel sual tlan nan a chhuak dawn a. Chumi entir tur leh hriat reng nan zanriah hnuhnungah hian
uain no chu a la a, “He no hi ka thisena thuthlung thar chu a ni, in aia chhuak tura chu” a ti a. Thuthlung
Hlui hunah ni tinin ran thisen chu Pathian hnenah an hlan thin a, mahse chu chuan suala tleng fai zo lo.
Isua erawh chuan ama thisen ngei chu khawvel sual silfai nan a hlan dawn a, chu chu a thisena
Thuthlung Thar, sualte ngaihdam nana mi tam tak tana chhuak tur thuthluna chu a ni.

Hei hi Lalpa Zanriah Sakramen kan hman zui tak zel lo chhuahna bul a ni a, ringtu zawng
zawng tan a pawimawh hla. Lalpa Zanriah hi kan taksa leh thlarau tan damna leh kaihruaina tha takah
Thlarau Thianghlim hian a hmang thin. A remchanna apiangah Lalpa Zanriah hi chan ve zel kan tum
dawn nia.

Thuvawn : 1 Korinth 11:24-25 – ‘Hei hi ka taksa in aia pek tura chu a ni, mi hriat reng
nan hei hi ti thin rawg u a tih kha. Chutiang bawka zanriah ei zawha no pawh chu a lak a,”He no hi
ka thisena thuthlung thar chu a ni, in in apiangin mi hriat reng nan hei hi ti thin rawh u,’ a tih kha.

Zawhna
a. Isua leh a zirtirten eng tikah nge zanrriah hnuhnung an kil kha?
b. Isuan Thuthlung Thar ruai atan eng nge a hlan?
c. Uain novin eng nge a entir?