ANJUN JULI: PENGERUSAK RAMPA MENUA NGEMEDISKA MENSIA

ANJUN GA ANJUN JULI

BALAT GA BEBALAT,
ULAH SEKEDA NADAI BERADAT,
BEBUAIKA SAMPAH NYAU BETAKAT,
ENDA NGIRA NYA TUTU LALAT
TONG BEKULAT ENDA BERESI,
ANJUN GA ANJUN JULI.

TUSAH GA TETUSAH
ATI NGENANG DUNYA UDU BAH
KETEGAL MENSIA BALAT BERULAH
NADAI BESEKAT BEBUAI SAMPAH
PARIT PENUH KERUBUNG MEE LEE FAH
SUNGAI KAMAH ENDA PEDULI
ANJUN GA ANJUN JULI.

ANJUN GA ANJUN JULI,

CHUKUP SINU GA DALAM ATI,
NGENANG PENGERUSAK TI NADAI GANTI,
AI PASANG NIKI DINI HARI
NGAMPUHKA RUMAH AI TUNTUN KAKI,
NABANKA RETA NYA DIKENANGI
ANJUN GA ANJUN JULI.
RIGANG RERIGANG GA SIDA BUJANG
TUMU PAGI BETUGUNG MAGANG
NURUN BERIKAN HARI AGI PETANG
NGERACHUN SUNGAI NGIGA CHARA MUNTANG
AI LANGKANG IKAN MAYUH MATI
ANJUN GA ANJUN JULI.

RAGAK GA RERAGAK,
MUNYI LURI TI NGANGKUT BALAK
NENGAH DARAT MANSA UJUNG SETAK
KAYU DITEBANG NADAI BETATAK
MENUA RUSAK ENDA DIPERATI
ANJUN GA ANJUN JULI.

MALU SEMALU ASAI ATI AKU

MEDA ULAH TI ENDA MENUKU,
TIAP LEMAI BAGAS BENDAR NUNU,
NGELEPASKA ASAP TI NGASUH NGELU
BESEBUN RIBUT ENDA BERESI
ANJUN GA ANJUN JULI.

ARAM KITAI GA SAMA-SAMA

NYAGA MENUA LIKUN BELAMA
ARI ULAH TI ENDA MENYANA
TI ENDA NEMU SINUKA DUNYA
AWAKKA KITAI LANTANG BERARI.
ANJUN GA ANJUN JULI.