Sneigvalba

Sem dien, medsu idpet ghim ed sneigvflockens fiell waurntos kam wong, sem rayn sess claus un
fenster samt un cosin ex sword ebon ed syuhsit. Ed menxu eet syuhnd ed spehcend oisnigves, ia
stohng sien fingher med sieno nadh ed tri ghutts cruor fiell do sneigv. Ed id rudh eet tem bell visu
ep id albh sneigvo quem ia sib sieyg : « Oh ! Ke magho habe un purtu tem albh quem sneigv, tem
rudh quem cruor, ed tem sword quem id dreu tos cosin ! ». Pau pos, ia gohn un lytil dugter qua eet
tem albh quem sneigv, tem rudh quem cruor ed tem kayssword quem ebon, ed bi tod sababo buit
ia kalt Sneigvalba. Ed kun ia purt gnahsit, ia rayna mohr.

Oino yar serter, is roy wohd alyu esor. Eet un bell gwen, yed mynder ed marhour, ed ia khiek tehle
an semqua udbeauteitiet iam. Ia hieb uno magic specule, quan ia eestaht ant id ed eedyeit-se in id,
ia ee-sayct :

Specule, specule, te sprehgo

Est semqua beller quem ego ?

Ed id specule eejawapt :

Potnia, ste bellst in tod land

Tun ia eet sakwn, iaghi wois id specule sieyg ver.

Lakin Sneigvalba crohsc ed bihsit stets beller ; quan eet septat, eet tem bell quem diewo ed beller
quem ia-pet rayn. Ed unte sem dien kun sa sprohg id specule :

Specule, specule, te sprehgo

Est semqua beller quem ego ?

Id antwohrd :

Potnia, ste her meist jamile

Yed Sneigvalba est beller mils

Tun bibieyit ia rayn ed bihsit gehlb ed glend ob jalousia. Tuntos, quan eedyehrct Sneigvalba, ays
kerd eeaghnuet, tantghi ia haiss iam magv. Ed aysa jalousia ed gurur nacrohsceer kam wayzd,
yoitkwe ia neti rahiet neter diens ni nocts. Tun ia dugh ad se un sayad ed sieygit ei : « Abduc tam
magv do id forest, neti volo habe iam ant mien okwi. Neicsies iam ed mi bringhsies tsay ays
lyekwrnt ed lyungs ka pruv. »

Is sayad obedihsit ed abduxit iam, bet quan is hieb exkardkaschen sien khandjar ed bieurskwit
Sneigvalbas innocent kerd, ia biplieng ed sieyg : « Sell sayad, sine me gwive, mwaungsousiem do
shienrlin ed naiweti gwirlaysiem. » Ed dat ia eet tem jamile, is sayad rahimiet ed sieyg : « Todrah
ghi, orm magv » « Gvers proe-praeddsient iam » mohn is, ed ne dehlge nices iam meg rohm iom.
Ed dat un porkiko priklieup kyom, is zabiekh iom, ghens eysa lyungs ed lyekwrnt, ed brigh ia tsay
ay rayn ka pruv. Is cokwo dohlgit pehkwe ia med sald, ed ia khiter gwen ess ia ed credihsit eddus
Sneigvalbas lyungs ed lyekwrnt.

Taiper, ia orm magv eet mon in widu ed tem meg biey quem ia spohc vasya druwaraks ed ne wois
quo kwehre. Tun ia bidrahsit ep kaghels ed per brimbels, ed gvers priklieup ay, yed ne hierm iam.
Ia drahsit tem diu quem aysa jambs ghohd behre iam, tiel noctgumt, tun ia vis un liew ed entrit id
kay rahate. In id eet hol smulk, yed tem kawayi ed tem kiest quem moliet dahe un dayi de to. Eet
uno smulk meja covohrno med un albh skatert samt sept smulk talers, ielga con idso smulko guar,
dind sept smulka knivs ed ghabels ed sept smulk bicairs. Sept smulka licts lyohg nieb mutu claus
id mur, ed eent oistect med sneigvalb charsafs. Sneigvalba, qua hieb maung hungher ed teurst,
mejit lyt sabzi ed dvan ex ielg smulk taler ed pohsit oin ghutt vin ex ielg smulk bicair, iaghi ne
ghendskwit hol ex id sam. Dind, ia buit tem malalt quem ia lyohg do uno smulko lict, bet neid
dohbh iam, oin eet pior long, alter pior cort, bad id septim correspons ays mege ; ia mien ter, mohld
ad Div ed nierc ter.

Quan hieb alnos nohkwt, gwirlieyeer ies demspotis ; eent ies septa dwerghs quoy orbiet in ghyors,
grabhend ed cazmend kay extrage tetos charp. Ies diegh ir sept smulk kandels ed yant kwiter in id
dom, ies vis od semanghen hieb gwohmen, holghi neti eet in id aurdhen quer ies hieb likwn id. Is
presto sieyg : « Quel hat sedden ep mien smulk stol ? » Is dwot : « Quel hat edden ex mien smulk
taler ? » Is trit : « Quel hat ghenden ex mien smulk khlayb ? » Is quart : « Quel hat edden sems
mienen smulk opsten ? » Is penkt : « Quel hat stohngen med mien smulk ghabel ? » Is sixt :
« Quel hat sec' med mien smulk kniv ? » Is septim : « Quel hat pohn ex mien smulk bicair ? » Dind
is presto spohc ambh se, vid un dener in sieno smulk lict ed scricit : « Quel hat entret mien smulk
lict ? » Alters addrahr ed scrier : « Semanghen hat lyohgen in mienschi ! » Bet, spehcend-ye kye
sien lict, is septim dyohrc Sneigvalba qua lyohg ter ed swohp. Tun is kiel alters quoy se precipiteer
ed emisseer surprise cries, vien ir sept smulk kandels ed beluc Sneigvalba. « Yallah, scrier ies,
kamghi bell est sa magv ! ». Ed ir joy buit tem megil quem ies ne protiebud iam, sontern sis iam
swehpe in ayso smulko lict. Is de septim dwergh lyohgit con sien sokwis, ein hor con ielg, ed id
noct vipassit.

Gwohmen id aghyern, Sneigvalba gohr ed vidend-ye iens septa dwerghs, ia buit lambhen ab paur.
Bet ies bevis lutf ed iam sprohg : « Quod est tien nam ? - Mien nam est Sneigvalba », antwohrd ia.
« Quosmed has tu gwohm' do nies hem ? » Tun ia ibs lohg od aysa stepmater hieb nicihskwt iam,
bet od is sayad hieb iam likwn gwiv, ed od ia hieb draht unte id hol dien, hin ia hieb vitrohft ir liew.
Ies dwerghs sieyg ay : « Sei vols puwnes, cokwe, sternes ia licts, lave, syuhe ed mehsge, poitts
mane in nies hem, ausies neid. - Ya, antwohrd Sneigvalba, io accepte khalal », ed ia mien bi iens.
Ia tin id dom in aurdhen. Aghyerns ies eegwahnt ia ghyors quer eepaurskent charp ed gold,
vespers ies eegwirlaynt ed tun ir chifan dohlg bihe preparen. Ia meirka eet mon unte id hol dien,
ies sell dwerghs riedh ay tadbir ed sieyg : « War tien stepmater, woidsiet mox od es her, bilhassa
mae sine anghen entre. »

Bet ia rayn, credeihnd eddus Sneigvalbas lyekwrnt ed lyungs, ne dwoyit ses iter ia prest ed ia
bellst, ia stahsit ant sien specule ed sieyg :

Specule, specule, te sprehgo

Est semqua beller quem ego ?

Tun antwohrd id specule :

Potnia Rayn, ste her jamile

Bet Sneigvalba trans id gabehrg
Bi iens septa dwerghs
Est dar beller mils !

Tun kyowngbu lambh iam, iaghi wois id specule ne sieyg leugh, ia ghieb od is sayad hieb drught
iam ed od Sneigvalba dar gwivit. Ed tun ia sib exmohn iter un zariya kay nices iam, ar esta esiet ia
bellst ios holios land, jalousia ne ay likwit rahat. Ed quan ia hieb vitrohven un wassila, ia
maquiyagit sien lige, mutavohs do veut mercerin ed buit alnos irrecognible. Also gwahsit ia id hem
iom septa Dwerghs trans ia septa ghyors, stus id dwer ed cricit : « Pehrno bell wares ! Bell
wares ! » Sneigvalba spohc per id fenster ed sieyg : « Sellamat Potnia, quod habte yu ad pehrne ?
- Bell wares, bell wares, antwohrd ia, schnurs vasyen colors ! » ed ia swohng oin, quod eet ex
pelupoik plextis : « Magho gairn sines tam anua endo », sib iey Sneigvalba, ia traxit id perchin
ghyant ed kurihsit id jamile schnur. « Magv, ieyit ia anua, kam dusarranget es tu! Gwehm ghi, ke io
te lace dohbro ! » Sneigvalba ne mistrus, ia stahsit ant iam ed sib dehihsit id nov schnur. Bet ia
anua lacit iam tem oku ed sohr iam tant quem Sneigvalba lus ob to annem ed fiell kam mortu.
« Nun, ieyit ia anua, has stopen ses ia bellst ! » ed ia abdrahsit.
Pau pos, ye dinnersaat, ies septa dwerghs gwirliey, bet kam mier buit ir kyowngbu quan ies vis ir
dorgv Sneigvalba lyehgend ghomi ; ed ia sroht ni movit meis quem una mortu. Ies oistohl iam ub,
ed, anstehgend ia eet pior sohrn, segeer id schnur. Tun ia biann lyt ed se gwiwit lyt ed lyt. Quan ies
dwerghs math quo hieb wakyet, sieygeer : « Ia veut mercerin eet nia alya quem sa kafir rayn. Sdi
nastraj, ed mae sine anghen entre quan ne smos hemi. »

Yant gwirlayvs, lakin, ia kokona gwahsit ant sien specule ed sprohg :

Specule, specule, te sprehgo

Est semqua beller quem ego ?

Tun id antwohrd kam akhirs :

Potnia Rayn, ste her jamile

Bet Sneigvalba trans id gabehrg
Bi iens septa dwerghs
Est dar beller mils !

Aurvs ta werds, ia buit tem dekhschaten quem ayso sehrgo comsru do ays kerd, iaghi ghieb od iter
Sneigvalba hieb nohsen. « Bet nun, ieyit ia, vahm invente semjec' quod vaht nices te ! », ed med ia
janters ia gnohsit, ia miekh un poisonen pecten. Dind ia desguisit ed emsit id forme alyias anua. Ia
gwahsit id hem iom septa dwerghs trans ia sept ghyors, stus id dwer ed cricit : « Pehrno bell
wares ! Bell wares ! » Sneigvalba spohc extro ed sieyg : « Naghancte, ne poitto sines anghen
endo. - Yed poitts spehce », ieyit ia anua, ia salgihsit id poisonen pecten ed swohng id ub. Id plaisit
tant iam magvu quem ia se sis tente ed ghyien id dwer. Kun samstohmeer de id pris, ia anua sieyg
ay : « Taiper, vahm kehme te dohbro. » Ia orma Sneigvalba, qua mistrus neid, sis iam anua
kwehre, bet sa hiebit payn dehn id pecten do ayso kays kun id poison effecit ed ia meirka
bayaldissit. « O beauteitskyudos, ieyit ia khiter gwen, nun es khatem ! » ed ia abgwahsit. Noroc-ye
mox eet id saat ye quod ies septa dwerghs eegwirlaynt. Quando viseer Sneigvalba lyehgend
ghomi kam mortu, suspexeer fauran iam stepmater, pieursk ed trohv id poisonen pecten, ed just
kun ies hieb stract id disbayaldissit Sneigvalba ed lohg ibs quo ay hieb wakyen. Tun ies ay riedh
iter ses nastraj ed mae ghyane id dwer qualkwe.

Gwirlayvs, ia rayn stahsit ant sien specule ed sib sieyg :

Specule, specule, te sprehgo,

Est semqua beller quem ego ?

Tun id antwohrd kam prever :

Potnia Rayn, ste her jamile

Bet Sneigvalba trans id gabehrg
Bi iens septa dwerghs
Est dar beller mils !

Aurvs id specule bahe it, ia trohs ed tremblit ob grassab : « Sneigvalba dehlct mehre, hatta sei
dehlgo payghe to med mien gwit ! » Poskwo ia gwahsit un secret khalwachamber quetro nimen
aiw entrit, ed ia miekh un poisont apel. Extos id kwohk bell, albh samt rudha gians, tem maung-ye
quem id wehnih quelkwe vis id, bet quel ess ex id dohlg mehre. Quan id apel buit makhen, ia
maquiyagit sien lige ed mutavohs do nowngminu, dind gwahsit id hem iom septa dwerghs trans ia
sept ghyors. Ia stus id dwer, Sneigvalba xyieng per id fenster ed sieyg : « Ne poitto sines anghen
entre, ies sep' dwerghs mi han' forbohden to ! - Sayang, ieyit ia nowngmina, gweupsiem mien
apels. Tia, vahm tib dahe oin – No, iey Sneigvalba, ne poitto accepte ject. - Bayies tu poison ? Ieyit
ia anua, spehc, sego id apel in dwo, tu eddsies id rudh gian ed ego id albh gian. » Bet id apel eet
makhen tem mahir-ye quem tik id rudh gon eet poisont. Id bell apel wehnih Sneigvalba ed quan ia
vis iam nowngminu edde ex id, ia khiek resiste diuter, rexit sien hand ed ghens id poisonto dwidel.
Bet payn-ye hieb ia sorben un bukat ex id kun ia fiell mortu. Tun ia rayna dyi iam med keapay
spects, iliey ed sieyg : « Albh kam sneigv, rudh kam cruor, sword kam ebon ! Ye tod ker ies
dwerghs khacsient sbudes te ! » Ed kun gwirlayvsa ia sprohg sien specule :

Specule, specule, te sprehgo

Est semqua beller quem ego ?

Id bad antwohrd :

Potnia Rayn, ste bellst in holo land

Tun buit ayso jalous kerd, sei aiw un jalous kerd ghehdti trehve rahat.

Men ye vesper, ies gwirlayndi dwerghs trohv Sneigvalba lyehgend ghomi, ed neti annem sielg ayso
stohm, ia eet mortu. Ies oistohl iam ub, pieursk an trehvient semject poisonen, dislaceer iam, kohm
ayso kays, liev iam med wed ed vin, bet to hol buit inutil : ia dorgv magv eet mortu ed remien ithan.
Ies lyig iam ep un bertel, quanti sept sess bay, riud iam unte tri diens. Dind begriebhskweer iam,
bet ia eet dar tem fresch quem un gwiv anghen, ed hieb dar sien bell rudha gians. Sieygeer : « Ne
poittmos dehe iam do kyehrsen ghom », ed miekheer un saurk ex transparent glas, kay ia ghohd
bihe viden bachimien, dind ies lyig iam endo ed scripseer uper id ays namo med golden buksteivs,
ed od ia eet roysdugter. Poskwo ies bohr id saurk ep id ghyor ed oin ex iens mien semper bei kay
guarde id. Ed ischi animals gwohm ad riudes Sneigvalba, preter un bufma, dind un crauv, bad una
smulka columbh.

Ed Sneigvalba mien diu in id saurk, ed ia ne myohrk, ia tengicit swehpe, iaghi remien semper Albh
kam sneigv, rudh kam cruor ed swordkays kam abnus. Api sme wehst un royson kjiawxieng in id
forest ed gwaht id dwerghendom kay upernocte ter. Ep id ghyor, visit id saurk ed iam jamile
Sneigvalba lyehgend eni, ed lis quo eet scriben uper id med golden buksteivs. Tun sieygit ibs
dwerghs : « Linkwte mi tod saurk, vos dahsiem quodlibt po id. » Bet ies dwerghs antwohrd :
« Niemos cedde id vos po id gold ios mund ! » Is iey : «  Sonst dahte id mi ka hadia, khako ghi
gwive aun vide Sneigvalba, id dyeisiem ed keulsiem ka mien dorgvst wesu. » Aurvs iom bahe it,
ies sell dwerghs rahimiet iom ed ei dahr id saurk. Is prince wohl sien slougs tobehre id ep ir omsa.
Tun tyohc od ies kwohlp protiev un busk ed, sekwos id scuss, id cochan os poisonen apel ex-yod
Sneigvalba hieb dohnct sielg ays berug. Ed moxu ghyien ia sien okwi, ieyr id capak os sien saurk
ed sess ub, scrisct. « Yallah, quer som io ? » scricit ia. Joyplen, is prince sieyg ay : « Es con me »,
is lohg ay quo hieb wakyet ed iey : « Te lieubho meis quem hol in id mund ; gwehm con me do id
castell miens pater, sessies mien esor. » Tunkye Sneigvalba liubh ed sohkwit iom, ed ir nuptia buit
preparen samt megil pomp ed magnificence.

Bet buit invitet ei fest iaschi khiter stepmater as Sneigvalba. Quando ia hieb dun bell povestis,
gwahsit ant sien specule ed sieyg :

Specule, specule, te sprehgo

Est semqua beller quem ego ?

Id specule antwohrd :

Potnia Rayn, ste her meist jamile

Bet ia yun rayn est beller mils

Tun ia khiter gwen rughiet ed buit dekhschaten, tem dekhschaten quem ia ne wois quo kwehre.
Preter, ia nel-ye gwahskwit id nuptia. Bet curiositat ne ay likwit mukhlat, ia tohrb abgwahe visum
iam yun rayn. Entrevs, ia recognih Sneigvalba, ed ob angst ed dekhschat ia stahsit still ed khiek
move. Bet ja hieb ja isern chinelas bihn reudherihna med geuls, buir brighen med tangs ed dehn
ant iam. Tun ia dohlg uwnes ta kandihn schous ed danse tiel nehc.