ANG MABUTING BALITA Juan 12: 20 – 33
Ika-Limang Linggo ng Kuwaresma
May ilang Griegong dumalo sa pista upang sumamba. Lumapit sila
kay Felipe na taga-Bethsaida, sa Galilea, at nakiusap, Ginoo, nais po
naming makita si Jesus.
Ito'y sinabi ni Felipe kay Andres, at magkasama silang lumapit kay
Jesus at ipinaalam ang kahilingan ng mga iyon. Sumagot si Jesus,
Dumating na ang oras upang parangalan ang Anak ng Tao.
Pakatandaan ninyo: hangga't hindi nahuhulog sa lupa ang butil ng
trigo at mamatay, mananatili itong nag-iisa. Ngunit kung ito'y
mamatay, mamumunga ito nang sagana. Ang taong nagpapahalaga
sa kanyang sarili lamang ay siyang mawawalan nito, ngunit ang taong
hindi nagpapahalaga sa kanyang buhay sa daigdig na ito ay siyang
magkakaroon ng buhay na walang hanggan. Ang naghahangad na
maglingkod sa akin ay dapat sumunod sa akin, at saanman ako
naroroon ay pumaparoon din siya. Pararangalan ng Ama ang
sinumang naglilingkod sa akin.
Ako'y nababagabag ngayon. Sasabihin ko bang, Ama, iligtas mo ako
sa oras na ito? Hindi! Sapagkat ito ang dahilan kung bakit ako
naparito. Ama, parangalan mo ang iyong pangalan.
Isang tinig mula sa langit ang nagsabi, Pinarangalan ko na ito, at muli
kong pararangalan.
Narinig iyon ng mga taong naroon kaya't sinabi nila, Kumulog! Sabi
naman ng iba, Nagsalita sa kanya ang isang anghel!
Sinabi sa kanila ni Jesus, Ang tinig na iyon ay ipinarinig para sa inyo at
hindi para sa akin. Panahon na upang hatulan ang mundong ito.
Panahon na rin upang hatulan ang pinuno ng mundong ito. At kung
ako'y maitaas na, ilalapit ko sa akin ang lahat ng tao. Sinabi niya ito
upang ipahiwatig kung paano siya mamamatay.
Iglesia Filipina Independiente
Diyosesis ng Rizal at Pampanga
Marso 17, 2024 (Taon B)
DIWANG-PANALANGIN:
Makapangyarihang Diyos, sa pamamagitan ng iyong Bugtong na Anak
ay pinatawad Mo ang aming mga kasalanan: Ipagkaloob Mo sa amin
ang Iyong biyaya at pag-ibig upang magampanan namin ang
tungkuling iniatas Mo sa bawat isa sa amin, nang sa gayon sa Kanyang
paghatol sa sanlibutan ay maging bahagi kami sa Kanyang karangalan;
sa pamamagitan ni Hesukristo na aming Panginoon, na nabubuhay at
naghaharing kasama Mo at ng Espiritu Santo, iisang Diyos, ngayon at
magpasawalang-hanggan. Amen.
UNANG PAGBASA Jeremias 31:31-34
(Isang bagong tipan ang ipinahayag ng Diyos na si Yahweh, kasunduang kikilala
sa kautusan at kalooban ng D iyos.)
Pagbasa mula sa aklat ni Propeta Jeremias, Ika – 31 Kabanata,
nagsisimula sa Ika – 31 talata.
Sinasabi ni Yahweh, "Darating ang panahon na gagawa ako ng
bagong tipan sa Israel at sa Juda. Ito'y hindi tulad ng kasunduang
ginawa ko sa kanilang mga ninuno, nang ilabas ko sila sa Egipto.
Bagama't para akong isang asawa sa kanila, sinira nila ang
kasunduang ito. Ganito ang gagawin kong kasunduan sa bayan ng
Israel pagdating ng panahon: Itatanim ko sa kanilang kalooban ang
aking kautusan; isusulat ko ito sa kanilang mga puso. Ako ang
kanilang magiging Diyos at sila ang aking magiging bayan. Hindi na
nila kailangang turuan ang isa't isa at sabihing, 'Kilalanin mo si
Yahweh'; sapagkat ako'y makikilala nilang lahat, mula sa pinakaaba
hanggang sa pinakadakila, sapagkat patatawarin ko sila sa kanilang
kasalanan at kalilimutan ko na ang kanilang kasamaan."
ITO ANG SALITA NG PANGINOON !
SALMO RESPONSORIO Awit 119: 9-16

TUGON: Ang Banal Mong kautusan ay aking iingatan
At sasambahin Ka’t paglilingkuran
1 Paano mapapanatiling malinis ang pamumuhay ng sinumang
tao, sa kanilang kabataan?
Sa pamamagitan ng pagsunod sa banal mong kautusan.
Buong puso ang hangad kong sambahin ka't paglingkuran,
huwag mo akong hahayaang sa utos mo ay sumuway.
TUGON
2 Ang banal mong kautusa'y sa puso ko iingatan,
upang hindi magkasala laban sa iyo kailanman.
Pupurihin kita, Yahweh, ika'y aking pupurihin;
ang lahat ng tuntunin mo ay ituro po sa akin.
TUGON
3 Ang lahat mong mga utos na sa aki'y ibinigay,
palagi kong babanggitin, malakas kong isisigaw.
Nagagalak na susundin ko ang iyong kautusan,
higit pa sa kagalakang dulot nitong kayamanan.
TUGON
4 Ako'y laging mag-aaral sa lahat ng tuntunin mo,
nang aking maunawaan, pagbubulay-bulayan ko.
Sa bigay mong kautusa'y lubos akong nalulugod,
iingatan sa puso ko upang iyo'y di malimot.
TUGON
IKALAWANG PAGBASA Hebreo 5: 5 – 10
(Dahil sa pagpapakumbaba ni Kristo, siya’y ginawang Pinakapunong Saserdote
ayon sa pagkapari ni Melquisedec.)
Pagbasa mula sa sulat sa mga Hebreo, Ika – 5 Kabanata, nagsisimula
sa ika – 5 talata..
Gayundin naman, hindi itinaas ni Cristo ang kanyang sarili upang
maging Pinakapunong Pari. Siya'y pinili ng Diyos na nagsabi sa kanya,
"Ikaw ang aking Anak, mula ngayo'y ako na ang iyong Ama."
Sinabi rin niya sa ibang bahagi ng kasulatan,
"Ikaw ay pari magpakailanman, ayon sa pagkapari ni Melquisedec."
Noong si Jesus ay namumuhay pa rito sa lupa, siya'y
nanalangin at lumuluhang nakiusap sa Diyos na makakapagligtas sa
kanya sa kamatayan. At dininig siya ng Diyos dahil lubusan siyang
nagpakumbaba. 8 Kahit na siya'y Anak ng Diyos, natutuhan niya ang
tunay na kahulugan ng pagsunod sa pamamagitan ng pagtitiis. At
nang siya'y maging ganap, siya'y naging walang hanggang
Tagapagligtas ng lahat ng mga sumusunod sa kanyang kalooban.
Minarapat ng Diyos na siya'y gawing Pinakapunong Pari ayon sa
pagkapari ni Melquisedec.
Dito natatapos ang pagbasa.