BAHAN SERMON EPISTEL MINGGU, 2 OKTOBER 2022

XVI DUNG TRINITATIS

2 Timoteus 1:1-14

“NDANG MARPANSOHOTAN ASI NI ROHA DI TUHAN I”

I. Patujolo
Surat paduahon na tinongos ni Apostel Paulus on ditujuhon do tu si Timoteus, ima
sahalak Uluan Huria di Epesus hatihai (1 Timoteus 1:3). Tardok di haposoon dope si
Timoteus gabe parbarita na uli. Jala didok do Timoteus sebagai Inakhon ni si Timoteus
manang didok “Anak Rohani” do ibana secara iman (Ay.2). Dipasahat Paulus do surat na on
tu si Timoteus hatiha dibagasan hurungan do ibana. Alai ndang mansohot ibana lao
pasahathon suratna on tu si Timoteus ala memang mansai godang do tantangan na niadopan
ni si Timoteus ima na godang angka parbarita na lipe manang parpoda haliluon (1 Tim. 4).
Alani secara umur mansai mura dope ibana terombang ambing Alani hamaolon i. Ido
umbahen asa dipasahat ibana muse suratna na paduahon on asa tongtong togu haporseaon ni
ibana tarlumobi lam margogo ibana pasahathon barita nauli i di Huria Epesus.
II. Hatorangan Ni Turpuk
Ay.1-2, Dibonai do surat 2 Timoteus on marhite sada hatorangan na mansai tangkas: Surat
tinongos ni si Paulus, Apostel ni Kristus Jesus, marhite sian tahi ni Debata. Marhiteon di
ondolhon Paulus do taringot tu status haapostelonna marhite otoritas na sian Debata, ndada sian
tahitahi ni hajolmaon. Debata do mamillit jala “manangkup” ibana gabe Apostel laho
mamaritahon barita nauli i ima bagabaga hangoluan na dibagasan Kristus Jesus (bnd.Ulaon
Apostel 9). Jala di ayat 2 didok Paulus do tu Haojahan ni surat na on tangkas do dipasahat tu si
Timoteus (ay.2). Bahkan pola didok ibana “Anakhonhu na hinaholongan” patuduhon Solhot do
relasi Paulus dohot si Timoteus di bagasan asi ni roha ni Debata. Asa sasintongna boi do
dohonon poda ni Paulus do on tu si Timoteus asa diingot ibana Alani asi ni roha do na mian di
ibana songoni tu si Timoteus umbahen didok ibana: “Asi ni roha, talup ni roha,…du.

Ay. 3-5. Adong do pandohan ni halak batak na mandok:”Ndang dao tubis sian Bonana” na
marlapatan : pangalaho ni natoras cenderung juga jatuh kepada anaknya. Ido umbahen di ayat 5
tangkas do diboto Paulus haporseaon ni si Timoteus bahwa nunga di memehon/diwariskan
Ompungna si Lois dohot inang na si Oinike tu ibana haporseaon na mananda Kristus i marhite
hata ni Debata (bnd. Ulaon Apostel 16). Alani ido, marhite on umbahen mansai las do roha ni Si
Paulus sasintongna marnida Timoteus bahkan di ayat 4 didok masihol do ahu marnida ho,
manrningot iluilumi, ala memang mansai denggan do parsaoran nasida di na rap marbarita nauli
nasida. Jala Di ayat 3, boasa mandok mauliate si Paulus? Ala dihilala Paulus do na didongani asi
ni roha ni Debata do ibana nang pe dibagasan hurungan ibana Alani manghatindanghon Kristus i
(Ulaon Apostel 23). Sian Pengalaman ni Paulus on ma tau tiruan di hita jolma dia masih mampu
mandok mauliate nang pe di sitaonon ibana. Ala memang disi do ingkon dihatindanghon ibana
ndang mansohot asi ni roha ni Kristus i. arta boi do mansohot, hamoraon, hasangapon dohot na
asing. Alai ianggo asi ni roha ni Debata manontong do ro di salelenglelengna.

Ayat 6-14. Marhite turpuk on di bahen Paulus do Poda na ingkon ingoton jala ulahonon ni si
Timoteus, dia ma i:
1. Ay.6 Di paingot Paulus do asa diparatarata ibana silehonlehon ni Debata tu ibana”. Jala
sileholehon (di hata Gorik artina:”Karisma/karunia). Aha do silehonlehon ima :Dipasahat
Debata do tu si Timoteus na mansai arga ima na gabe dohot ibana marbaita na uli i. Alani
pangkeon ni ibana ma i laho tongtong marbarita na uli na hombar tu lomo ni roha ni
Tuhan i. laos ido dipaingot nang hita jolma, ragam do silehonlehon ni Tuhan i dihita
Alani tapangke ma i manghatindnaghon Tuhan i. unang tapasuasehon tarlumobi ma
 diangka Tohonanta ganup. Ingkon rajumanta do Debata do silehon i tu hita dalan
basabasa berarti pangkeonta ma i tu ulaon nadenggan na sian Tuhan i.

2. Tondi ni Debata do na mangula marhite ngolu ni Timoteus jala goar ni Debata ma na

marmulia marhite panghobasionna. Di ayat 7, dipaboa disi ai margogo do naposoNai
marbarita na uli ala: dilehon Debata do hita tondi hagogoon, tondi haholongon, tondi
pangarajaion diri, ndada tondi hatahuton. Tondi ni Debata do na mangula di ulaon
marbarita na uli marhite naposoNa i. Dipargogoi do naposoNai asa unang tahutan
manang ganggu rohanasida mansoarahon hataNa i. Alai, hatahuton manang ganggu ni
roha somalna gabe manundati jolma mangulahon ulaon na denggan. Hatahuton sipata
mambahen gabe lam mabiar jolma dipardalanan ni ngoluna. Mabiar ndang mangan,
mabiar ndang dapotan pangomoan, mabiar ndang jadi na ni ula, tunga rarat na ingkon ni
habiaran di portibi on. Laos i do umbahen na olo jolma i mangulahon na so tama di
adopan ni Debata. Sipata, angka ruas ni huria pe mabiar manghantindanghon hasintongan
hata ni Debata. Songon halak na porsea, unang be hita dihuphupi biar ni roha. Nunga
ditaluhon Debata hatahuton na balga sian jolma i ma hamatean. Nunga hehe Tuhanta
Jesus Kristus sian hamatean ni dosa i, asa monang jala mangolu hita. Asa marhite
haheheonNa i, dipargogi do hita saluhutna mangulahon na hombar dilomo ni rohaNa.
Didok hata ni Debata di Jesaya 40 : 10 “Unang ho mabiar, ai Ahu do donganmu! Unang
biahaton ho, ai Ahu do Debatam: Ahu margogoihon ho huhut mangurupi ho, huhut
maniopi ho marhitehite siamun ni hatigoranHu”.
3. Ayat 8-14. Dipaingot si Paulus do si Timoteus asa unang maila ibana manghatindanghon
(di hata Gorik:Marturion, artina: Bersaksi tentang Tuhan). Jala olo menderita Alani barita
na uli i. ido umbahen pola di dok ibana di ay. 11: Tusi do ahu dipabangkit. Di ajarhon
Paulus do asa Manahan ibana ala sasintongna nunga parjolo ibana marsitaonon Alani
barita na uli i umbahen tarhurung ibana. Alani unang ma maila hita manghatindanghon
ibana, ala na tahatindanghon ima marguru tut ahi ni Tuhan i do ndada sian jolma. Alani
molo didok manghatindanghon na di hata Indonesia bersaksi. Apa yang kita saksikan,
ima taringot tu Tuhan i ma ndada dirinta. Ala tangkas do didok do di Mtateus 10:32-33,
mandok:”Ai ganup na manghatindanghon Ahu di jolo ni jolma, ido hatindanghononHu
di jolo ni Damang na di banua ginjang i. Alai ganup na mansoadahon Ahu di jolo ni
jolma, laos soadahononHu do i di jolo ni Damang na di banua ginjang i”.

III. Panimpuli
1. Marhite Konfessita HKBP tahun 1996 bindu 9 taringot tu “Parhalado ni Huria” Ganup
halak na porsea tarjou do gabe sitindangi ni Kristus Jesus di portibion . Alani unang maila
hita manghatindanghon Ibana manang didia pe hita jala unang tahutan ai di urupi Tuhan i
do hita marhite Tondi Hagogoon asa tung tau hita pasahathon barita na uli i.
2. Marhite aha do hita manghatindanghon ibana? Ima marhite ragam ni silehonlehon ni
Tuhan i tu hita (ay.6). molo Timoteus gabe parbarita nauli, boi do hita manghatindanghon
ibana marhite ragam ni talenta dan kemampuanta.
3. Dihita halak batak ala tahangoluhon do Filosopi 3H i: Ima Hagabeon, hamoraon, dohot
hasangapon, Sai jotjot do na tawarishon hanya harta dan sebagainya. Alani i marhite
turpuk on diajari do hita unang holan arta warisan na tawariskan kepada ianakhon, alai
podahon ma haporseaon manang pangajarion taringot hat ani Debata asa dihangoluhon
dimasa dung magodang ibana songon na pinatupa ni ompung dohot dainang ni si
Timoteus i.
4. Didok Topik ni minggunta: “Ndang mar pansohotan asi ni roha ni Tuhan i”.
dihatindanghon Paulus do na sai tongtong do mian asi ni roha ni Debata di ibana
umbahen sai margogo ibana manghatindanghon Kristus i. songoni do tutu dingolunta on,
ndang mansohot asi ni rohaNa na paihutihut hita di ragam ni hamaolon i, nang pe sipata
madabu hita tu hadosaon. Alani tapangke ma ngolunta manghamauliatehon asi ni roha ni
Tuhan i marhite ulaon na denggan jala tongtong marhaporseaon tu Debata. AMEN