GAGURITAN AJI PALAYON

PUPUH SINOM

1. Tatujon sang mautama, i panjak wantah

kardinin, tityang wantah jadma tuna, taler
meled maninutin, sakewanten doh wiakti, kadi
pamargan sang sadu, tityang puniki waluya,
kedis kapecit gumanti, cenik ipun, nanging
munyine makatah.

Gaguritan Aji Palayon 1

 2. Ring kahyangan kaucapang, genah sang atma
ne luwih, ne satata ngawe ledang, para
sametone sami, rawuh ring sawitra malih, pada
egar pada lulut, dening sampun mresidayang,
nepud ring sunyata luwih, sampun lebur, punika
i pacendria.

3. Napi anggen mangruatang, ngicalang wisaya

sakti, wantah aji kalepasan, aksare sane suci,
adasa kawilangin, SA BA TA A I punika, tur
malih NA MA SI WA YA, tri kayane mangda
suci, i sadripu, sapta timirane punah.

Gaguritan Aji Palayon 2

 4. Atma luwih dahat ledang, prasida malesat
mangkin, saking guwungnyane medal, sampun
suwe katekepin, kadi tirta sanjiwani, mawastu
wusan kablenggu, sang atma gaok manyingak,
nyingak barong manembenin, tur mabulu,
warnannyane selem denges.

5. Ri waune sapunika, atma luih eling malih,

marupa barong ragannya, tur kacingak sampun
ngendih, sang atma ngarepang gelis, nampekin
guwung puniku, sang sayang misaratang,
mangrumrum mangreremih, atur alus, dahat
alon turing dabdab.
Gaguritan Aji Palayon 3
 6. Nggih dewa guwungan tityang, genah malajah
ne rihin, linggih tityang nenten lian, tityang boya
pacang lali, ring tresnan dewane rihin, sane
mangkin sampun tutug, urip tityange pamekas,
tityang pacang ninggal mangkin, benjang
pungkur, madak katemu ring dewa.

7. Guwungan tityange dewa, mantuk i dewa ring

api, angine yeh miwah tanah, yasane pageh
apikin, tur medal saking pretiwi, ring bun-bune
dewa nyusup, saking muncuk edon buah, maka
miwah akah malih, dewa nyusup, rauh
katengahing garba.
Gaguritan Aji Palayon 4
 8. Saking garba kalanturang, manyusup kaangga
raris, yukti manados amreta, nging amreta
sanjiwani, ring angga sarira nunggil, dados
kabecikan bayu, ri kenjekan sapunika, madak
dewa temu malih, uduh-uduh, tityang jagi
ninggal dewa.

PUPUH GINANTI

9. I sang atma mapikayun, jagi mabawos ne

mangkin, ring tamyune ring sawitra, sang atma
bingung premangkin, duaning nenten prasida,
tatujone ne kaungsi.

Gaguritan Aji Palayon 5

 10. Teos malih mangkin katur, wenten jadma
berag akig, sakadi kirangan pangan, ipun sane
karangsukin, ri antuk ida sang atma, engsap
ngejer lima batis.

11. Jadma sane engsap iku, mabaos ring tamyu

sami, inggih jero tamyun tityang, sane ledang
mangrauhin, bawos tityange i nista, pirengang
ja apang pasti.

12. Yening wenten nenten manut, ampurayang

sane mangkin, yening wenten sane iwang,
Gaguritan Aji Palayon 6
 sampunang jerone salit, tityang lintang
kawewehan, nista pisan tuna kanti.

13. Daging tresna jero tamyu, nenten pisan

tityang lali, dumadak hyang widhi wasa, asung
kerta ngalugrahin, mapaica hurip panjang, arta
brana amerta malih.

14. Ne gumanti anggen nawur, indik daging

welas asih, rasa tan sida ngwalesang, tresnane
Gaguritan Aji Palayon 7
 ring sang kasiasih, madak jrone manggih genah,
inggih kantin tityang sami.

15. Sami pacang manggih lampus, sakatah sane

maurip, sami pacang manggih sirna, sakancan
wentene mangkin, nenten pisan dados palas,
indike punika sami.

16. Sampunang teleb mangugu, ring tutur ipian

malih, sane patut nyandang tulad, pradene
Gaguritan Aji Palayon 8
 wenten salit, sampunang nyesel ring raga, suka
duka malinder panggih.

17. Daging tuture puniku, kadi wantilan upami,

jadmane mendahan pisan, wenten tambet
wenten ririh, wenten nis wenten utama, wenten
daak wenten sugih.

18. Salamine papa pangguh, yan i belog

katuwutin, mawinan elingang pisan, darma
Gaguritan Aji Palayon 9
 patute gugonin, tur yatna kapining raga, tan
mamokak irihati.

19. Laksanan tityange dumun, yening wenten

sane salit, nika sami ampurayang, sampunang
banget minehin, solah anake mabraya, gebeh
cedok yan umpami

20. Dwaning mangkin sampun tutug, urip

tityange gumanti, mangkin tityang jagi ninggal,
ring jerone sareng sami, diastun tityang
mapasah, mugi pungkuran kapanggih.
PUPUH KUMAMBANG

Gaguritan Aji Palayon 10

 21. Jadma sane, kantun engsap matur malih,
ring ratu peranda, inggih ratu pranda luwih,
mogi batara sueca.

22. Nenten lali, ring kapitresnane mangkin, ri

kenjekan tityang, kalukat kadwijati, manah
tityang liwat galang.

23. Sadurunge, anggan iratu ngwedanin,

munggwing manah tityang, bes kaliwat peteng
paling, kadedetan tanpa sinar.

Gaguritan Aji Palayon 11

 24. Risampune, tityang puput kabersihin,
kasiratin tirta, antuk tirta sane suci, awak
tityang mrasa ingan.

25. Gelis tityang, jagi pamit sane mangkin,

dumugi rahajeng, miwah oka putu sami,
dwaning ratu lintang darma.

26. Ampurayang, daging upakara niki, tityang

manerima, sarin tarpanane mangkin,
kumkuman lan paresikan.

Gaguritan Aji Palayon 12

 27. Nika sami, matatujon mangda basmi, tur
suci nirmala, sadaging malane sami, ne neket
ring awak tityang.

28. Caritayang, anake engsap ne mangkin,

kocap sampun lebar, muannyane tanpa getih,
paliatne kadi kiap.

PUPUH GINADA
29. Ida pranda mawacana, dabdab alon
nyurnyur manis, luwir kadi madu drawa, nah
pyanak cucun sang lacur, gancangin ngaturang

Gaguritan Aji Palayon 13

 sembah, tambis-tambis, mamargi ida sang
atma.

30. Liyan mangkin kawarnayang, disisin layone

mangkin, akeh anake irika, manyembah dane
sang lampus, munyinnyane alus banban, ingih-
inggih, sembah pangubaktin tityang.

31. Kadi gedahe pantigang, remuk manah

tityang mangkin, sambeh tan sida pupulang,
kangen tityang ring iratu, pirengang san atur
tityang, ngasih-asih, katiben antuk kalaran.

Gaguritan Aji Palayon 14

 32. Nenten malih kaprasida, iratu pacang
kapanggih, dumugi kapungkur wekas, prasida
malih katemu, panrestiane ring jagat, ratu
malih, mamuponin sarin jagat.

33. Inggih duh ratu sang atma, kadi pasar yan

umpami, ragan iratu sang atma, sane
kakawonin ipun, i punyan bingin rob samah, ne
tan mari, pacang nandang kapanesan.

Gaguritan Aji Palayon 15

 34. Wantah ratu payung tityang, genah tityange
mangungsi, ngalih dayuh paimbonan, dija
mangkin genah ratu, cingak mangkin cucu
sanak, lara sami, iratu maka jalaran.

35. Kalintang arsa sang atma, mamirengang

mikayunin, uncaran pangastungkara, kaaduk
ban rasa sungsut, pitresnannyane kaliwat, ring
sang kari, sane subakti manyumbah.

Gaguritan Aji Palayon 16

 36. Mangkin mamargi sang atma, manuju
pamrajan suci, ngastawa batara tiga, aturnyane
ngetus kayun, inggih pangubaktin tityang, tiga
sakti, maraga lalangit tityang.

37. Wantah paduka batara, arsa mapica

pamargi, ngardi tityang dados atma, atma suci
tanpa letuh, swecan ratu langkung pisan, ngicen
margi, gumentos rawuh kaswargan.

Gaguritan Aji Palayon 17

 38. Wenten sapanyaman tityang, kantun hidup
sane mangkin, dumogi ratu suweca, ngicen
krahajengan ipun, mangedoh saking gagodan,
durus aksi, daging pangalungsur tityang.

39. Ratu paduka bhatara, tityang mangkin nunas

pamit, pungkuran malih kawitang, tityang
tangkil ring iratu, ring swecan ratu bhatara,
nenten lali, tityang ngaturang suksema.

PUPUH SEMARANDANA
Gaguritan Aji Palayon 18
 40. Bhatara kawitan gelis, manyawis atur sang
atma, dumadak idewa mangke, polih genah
swarga loka, mamuponin kabecikan, wantah
kadi sapunika, pangandikan hyang kawitan.

41. Sang atma gelis mapamit, duk punika

caritayang, sampun sumurup suryane, langit
pradesane peteng, dilangite ade bukal, kelap
kelip pakeburbur, ngungsi kayune mabuah.

Gaguritan Aji Palayon 19

 42. Tiyos caritayang malih, i clepuk mamunyi
sawat, mangawinang res manahe, anake sane
mangidam, ngidam sadurung masomah, jejeh
ktarang anak liyu, pedas dadi kakedekan.

43. Atmane malih manangkil, ring pura dalem

ucapang, wenten suara ring setrane, manyerit
waluya macan, sang atma sampun lumampah,
tatujone mangda pangguh, dewi durga nora lian.

44. Sang atma ngranjing ring kori, maring korin

pura dalem, hyang durga ucapang reke,

Gaguritan Aji Palayon 20

 katangkilin antuk panjak, butane sami
padampyak, anja-anja ne makumpul, raregek
miwah kalika.

45. Akeh yening kawilangin, sane ngiringang

hyang durga, pada pajerit butane, sami
ngarunyung sang atma, mabudi pacang
manadah, atma luwih pati kaplug, tangkejut jagi
katadah.

Gaguritan Aji Palayon 21

 46. Hyang durga ngandika raris, mangandika
dabdab banban, eda bapa jejeh mangke, teken
ikala bregala, manira suba pastika, bapa yukti
atma putus, betel ring kadiatmikan.

47. Sapunika ling batari, ngajum sang maraga

atma, mangda ledang manahnyane, sang atma
raris ngastawa, ring bukpadan sanghyang durga,
aturnyane manis alus, inggih ratu sang
sinembah.

Gaguritan Aji Palayon 22

 48. Wantah paduka batari, dewaning manusa
atma, sakatah setan raregek, papengkah miwah
kumangmang, munggwing pesengan paduka,
rikala ring bale agung, sanghyang bagawati
ngaran.

49. Hyang durga ngaran batari, ritatkala maring

setra, ngardinin atmane reke, rahayu
karahajengan, sanghyang berawi mangaran, yan
ring patunon malungguh, katah pesengan
paduka.

Gaguritan Aji Palayon 23

 50. Dewi putri hyang batari, ring gunung agung
malingga, ring muncuk gunung bature, dewi
danu ratu ngaran, ring pancoran miwah tlaga,
miwah sakancan puniku, dewi gayatri ngaran.

51. Kenjekan ratu batari, yan malinggih maring

tukad, sanghyang gangga puspatane, yan ring
carike malingga, dewi sri ngaran paduka, ngardi
hurip pang rahayu, sakatahing sarwa bawa.

Gaguritan Aji Palayon 24

 52. Inggih paduka batari, napi wenten upakaran,
mungguing nyaman tityange, sane kantun
maring lemah, sekar pajegan lan dupa, wantah
katur ring iratu, dumadak ratu suweca.

53. Parekan ratu batari, nunas pamit jagi mrika,

irika ring suwargane, sanghyang durga
mangandika, uduh uduh atma kita, madak ja
manggih rahayu, ring margine kasuwargan.

PUPUH ADRI JAGATKARANA

54. Kawinursita sang atma lumaku, saking kori
medal, bintang siange mangendih, macihna
Gaguritan Aji Palayon 25
 hyang surya metu, ngaja kanginang lumaku,
ngulangunin pisan-pisan, margine sane kajujur,
katah sekare mawarna, miyik ngalub ngardi
liang.

55. Sanghyang baskara dipati medal sampun,

sakadi sapuhang, indik punika i langit, bintang
bulane puniku, sami ical antuk ipun, akasane
sayan galang, kedise sawat makebyur, mamunyi
mabiyayuhan, wenten sane ngrereh buah.
56. Sewos malih wenten ring carang kayu,
mamunyi matinggah, ngawe egar ngulangunin,
kagambelang baan ipun, i kedis si kata iku,

Gaguritan Aji Palayon 26

 suarane kadi genta, ngardi ledang sang
mangrungu, sira ke tan pacang egar, rikalaning
mamirengang.

57. I punyan pandan kadi ida sang wiku,

donnyane punika, mangalenteng tiub angin, kadi
tangan ida sang wiku, rikanjekan ida sang wiku,
manguncarang daging weda, sekar sane aas
puniku, winaluya sekar ura, sarin sekar andus
dupa.
58. Swaran itambulilingan ngriyeng umung, kadi
pangastawan, ida sang wiku motami,
mangastawa hyang sinuhun, sanghyang giripati

Gaguritan Aji Palayon 27

 wuwus, ngastawayang sanghyang atma,
mangdene presida mangguh, manggih rahayu
rahajeng, irika ring swarga loka.

PUPUH DURMA
59. Tukad sarayu katuwut antuk sang atma,
toyan nyane liwat ening, wenten batu pilah, batu
putih ring sisinnya, don cempakane ngungkulin,
becik pisan, ngawe lila sang nyingakin.
60. Rikanjekan sang atma rawuh masiram, ring
tukade sane ening, saget wenten buaya, saking
toya ipun medal, bungut nyebak menyejehin,
gagelisan, sang buaya ngarepang mangkin.

Gaguritan Aji Palayon 28

 61. Mapikenoh pacang neda sang atma, sang
atma tambis-tambis, kacegut sang buaya, gelis
makecos sang atma, nah sang buaya ne te cai,
eda pesan, cai jani mangalangin.

62. Cai mula adin wakene pasaja, parupayan ari-

ari, manitis kalemah, ngaliwatin tukad, sapunika
bawos ida, ring sang buaya mamancanin,
maegolan, kadi pacang mituutin.
Gaguritan Aji Palayon 29
 63. Aduh adi-adi sang marupa buaya, gandong
ja beli jani, ngaliwatin tukad, apang sida
mangaliwat, saking tukade puniki, sang buaya,
prayatna ngarepang gelis.

64. Kaenjuhang tundunnyane ring sang kaka,

sang atma malinggih mangkin, ring tundun i
buaya, gelis rawuh maring tukad, ampurayang
beli adi, tur suksma, kapining pitresnan adi.

65. I buaya ikut ngegol maanggutan,

nyihnayang sampun katampi, babawos sang
Gaguritan Aji Palayon 30
 atma, raris sang atma mamarga, ngaler
kanginang mamargi, alas wayah, rejeng
madurgama panggih.

66. Akeh taru ageng-ageng tegeh pisan, teep

angsoka lan bingin, kresek celagi kepah, bunut
lan kepuh gintungan, sami punika kapanggih,
ring sang atma, mangkin lian kawilangin.

67. Curik crucuk bango-bango sikep merak,

kunahan crekuak kakelik, keker lan kokokan,
Gaguritan Aji Palayon 31
 ring carange mabyayuhan, kidang celeng alasan
malih, bojog ijah, rase lubak lutung klesih.

68. Sami pada macanda maliang-liang,

masliweran cagcag cigcig, wenten munyi banter,
kedis buron sami sambrag, tongose mengkeb
kaungsi, sami jejeh, pati luplup bingung paling.

PUPUH PANGKUR
69. Ring tengah margi sang atma, jeg kacadang,
i raksasi sirsa jail, nelik ngendih matan ipun,
Gaguritan Aji Palayon 32
 winaluya kadi surya, mabok selem, winaluya
kadi eduk, bungut ipune manyebak, gua linggah
yan upami.

70. Layah ipun kadi naga, maangkihan,

mangelinus kadi angin, lanying nyapnyap gigin
ipun, winaluya gigin boma, tur mamargi, saking
guane mangelur, raksasa lengar mangerak,
kaliwat banter piragi.

71. Bawosang mangkin sang atma, nenten jerih,

ngadeg sarwi mangarepin, masarana daging
atur, ngasih-asih dabdb pisan, uduh ibu, memen

Gaguritan Aji Palayon 33

 tityang yukti patut, mungguing pajalan tityang,
sampunang meme ngalangin.

72. Raksasi mangkin mapajar, eh eh ih ih,

pyanak meme mula jati, dumadak i dewa
mangguh, manggih swarga galang padang, reh
idewa, teleb maring daging tutur, aji palayon
utama, makawinan manggih becik.

73. Mangkin malih kalanturang, caritayang, sang

atma kalangkung luwih, margine sane kajujur,
rejeng bukit garembengan, tur katemu, i macan

Gaguritan Aji Palayon 34

 barak kacunduk, sang atma umatur ngejer, nah i
macan adin beli.

74. Beli gumanti muatang, swarga loka, eda adi

mangempetin, sujatine pang adi weruh, sedek
beli dadi atma, atma rare, di getih adi alungguh,
di getih meme tan lian, bareng lekad ngajak adi.

75. Macan barak makipekan, ikuhnyane, ngegol

tur gelis magedi, kadi matutang ipun, babawos
ida sang atma, sada alon, pakaad pajalan ipun,

Gaguritan Aji Palayon 35

 ledang sang atma mamarga, sinambi mangisep
sari.

76. Nenten suwe maring marga, makesiab,

kamemegan atma luwih, nyingak lalipine agung,
liwat ring arep sang atma, manawita, wenten
pamancana rawuh, sapunika bawos ida, sang
atma prayatna malih.

77. I cicing selem ngarepang, gede tegeh, panak

gunung yan upami, kasayubin gulem mubu, irika

Gaguritan Aji Palayon 36

 raris sang atma, gelis matur, ring i cicing selem
iku, adin beli cicing selem, eda adi mangalangin.

78. Dewa wantah panitisan, sane rihin, mawit

saking yeh nyom yukti, adi bareng-bareng
lawut, ngajak beli bareng lekad, nyamping adi,
eda adi ngawe santul, manyongkok i cicing
selem, nretes yeh matane ngeling.

79. Kasilapin tangan ida, ikuhnyane, mangegol

kutal kutil, inggih dewa atma ayu, mamargi
mangkin i dewa, dumadak ja, digelis i dewa

Gaguritan Aji Palayon 37

 rauh, rauh irika ring swarga, i cicing maninggal
raris.

PUPUH SINOM
80. Sunaran ida hyang surya, kadi api yan
upami, tambis tajeg sanghyang surya, sang
atma maraup mangkin, sisin bulakane ening,
manyurya sewana lawut, sang atma sampun
masila, kakelik ajer mamunyi, cirin ipun,
ngawangsitang wenten kala.

Gaguritan Aji Palayon 38

 81. Rikala asapunika, buta kalane parapti,
makuug pajingkrak-jingkrak, swarannyane
manyejehin, ah ah eh eh atma iki, lakar tadah
ingong seduk, uli telun twara mangan, sedeng
melaha buka jani, suba tepuk, ingong lakar
nadah atma.
82. Nenten ja takut sang atma, raris matur ajer
gelis, inggih sang maraja sela, sang bawal kalih
badmoti, miwah sang badpamyad malih,
sampunang jerone bendu, menggah piduka ring
tityang, duaning tityang puniki, tangan puyung,
rauh mriki tanpa sarana.

Gaguritan Aji Palayon 39

 83. Yan wantah jerone arsa, iring tityang sane
mangkin, ngarauhin umah tityang, irika sampun
kacawis, daging upakara sami, bubur piratane
katur, wantah sang bawal nerima, nasi tepeng
sang badmoti, ring sang jigrug, ulam bebeke
katrima.
84. Cegceg i bawa nerima, banten prajapati
nampi, i kradana nampi prangkat, pajegan i
budag asih, dewi durga nanggap jijih, i gridig
tuak aklukuh, i jajruman nampi jinah, taruna
nampi kakenyir, malih katur, berawa nampi
pasepan.

Gaguritan Aji Palayon 40

 85. Sekar urane katrima, sang mrajasela
muponin, panjang ilang sang badpamyad,
angkat-angkatan sang gridig, nasi katipate
malih, ring sang kreda wantah katur, gelis para
buta kala, miwah ganane mamargi, sampun
rauh, manadah caru inuman.

86. Atma anak sane prajnan, tur weruh ring

linging aji, tan baat makta labaan, tan santulan
maring margi, aji sastrane kasiwi, susatia darma
sadu, atma anak belog ika, mamondong labaan
bintit, pacang santul, ring margi kirang labaan.

Gaguritan Aji Palayon 41

 PUPUH DURMA

87. Kacarita mangkin ida sang atma, ngaja

kanginang mamargi, akeh gunung alas,
kalangkungin sawat pisan, maring marga telu
raris, masandekan, duaning lesu tan mari.
88. Rauh angin mangalinus baret pisan, malejeg
neked kalangit, kedise makejang suwud
mamunyi tur jejeh, nging sang atma tan
ajerih,dwaning ida, pageh tur maraga luwih.
89. Wus punika caritayang wenten kala, kalane
patpat digelis, raris mangarepang, rambut ipun

Gaguritan Aji Palayon 42

 magambahan, gelgel tapis duk upami, langkung
lumbang, jeleg ipun ngagaokin.
90. Tangan ipun kadi punyan kepuh leser, sarwi
angucap manyerit, ah ah atma kita, lakar tusuk
lakar amah, tumbak tebek pungsang pangsing,
mangarepang, jagi mamancana gelis.
91. I sang atma nuli matur syaga pisan, inggih
sang suratma beli, kalih belin tityang, sang jogor
manik tan lian, maha kala adin beli, dora kala,
sampunang dewa ngalangin
92. Sang suratma caritayang kedek ngakak,
liwat degag atma cai, mangaku manyama,

Gaguritan Aji Palayon 43

 makrana cai manyama, satwayang lautang jani,
yening lepas, ingong lakar manumbakin.
93. Atma luih raris gelis mangkin ngucap, kadi
tandruh ragan beli, sane dumun tityang, ngiring
beli sareng-sareng, ring garban i biang yukti,
duk punika, mungguing pesengan beli.
94. I lambana abra kered i sugian, pesengan beli
sujati, sasampune embas, raris magentos
pesengan, isalahir ijalahir, maka miwah,
imokahir isalabir.
95. Risampune pada duur mapesengan,
anggapati prajapati, banaspati miwah, saha

Gaguritan Aji Palayon 44

 banaspati raja, iriki ring swargan mangkin,
mapesengan sang suratma jogormanik.
96. Sang dorakala ping trini kabaosang,
mahakala iku malih, napi makawinan, lali
manyama ring tityang, sang suratma wawu
eling, kedek ngakak, saja beli engsap adi.
97. Jogormanik digelis mangkin atanya, sujatine
gawen adi, sang atma mananggap, tityang
wantah kasuarga, kocap tityang atma luwih,
mangkin ledang, ragan beli ngicen margi.
98. Nanging jani tonden dadi adi kema, mapan
adi tonden bersih, adi mawak leteh, apang ilang

Gaguritan Aji Palayon 45

 leteh mala, beli nyadya ngateh adi, mandus
kema, kapancaka tirta suci.
99. Inggih beli tityang wantah mangiringang,
kayun beli sane mangkin, sadurung kalukat,
ledang beli midartayang, panca tirtane puniki,
napi wantah, mustikane mangda uning.
100. Beli jani manuturang apang pedas, jadma
ane muat-mait, laksanane ala, kalukat tur
kabersihang, ring batari brahma yukti, di
daksina, ditlagane suci ening.
101. Di pascima druwen ida maha dewa, tirtane
mawarna kuning, jadma salah ulah, langgah

Gaguritan Aji Palayon 46

 teken muaninnya, agamya alpaka buwin, yan
kalukat, malannyane gempung bersih.
102. Di utara batara wisnu nruwenang, tirta
selem nanging suci, panglukatan leak, jadmane
mamanah corah, istri jalir maroasih, lan
mamitra, corahnyane sida bersih.
103. Tlaga purwa druwen ida sanghyang iswara,
tirtane mawarni putih, panglukatan jadma, adwa
teken ujar, bobab mauk minakadi, to makejang,
corahnyane dadi bersih.
104. Tlaga madya druwen ida sanghyang siwa,
tirta mancawarna yukti, panglukatan jadma,

Gaguritan Aji Palayon 47

 kasasar tur sakit ila, nanging yan pade siratin,
gempung corah, mala patakane basmi.
105. Keto adi suksman pancaka tirta, lautang adi
mabersih, sang atma lumampah, mangungsi
pancaka tirta, toyane mawarni-warni,
caritayang, anggan sang atmane bersih.
PUPUH SINOM
106. Mangkin kawinursitayang, batara siwa
ngesengin, ring wateking widyadara, miwah
apsarine sami, mangdene sang atma luih,
kapapagin tur katuntun, iring ring suarga loka,
duaning sang atma luih, satya sadu, sukerti
ngelarang darma.
Gaguritan Aji Palayon 48
 107. Para dewane ngarepang, mapagin sang atma
luih, mangandika banban pisan, uduh dewa
atma luih, sampunang jejeh ajerih, batara siwa
mangutus, gelis mamargi idewa, kasuargan
sane mangkin, ne katuju, muponin rasa utama.
108. I dewa maraga pradnyan, pageh mangastiti
widhi, hyang widhi kalintang sweca, ring idewa
kadi mangkin, pikolih sane puponin, ring gedong
mase malungguh, sang atma mangkin ucapang,
aturnyane nyurnyur manis, singgih ratu,
sampunang manyumbung tityang.

Gaguritan Aji Palayon 49

 109. Boya teleb manah tityang, ring daging tutur
utami, aji palayon punika, ratu tityang nenten
uning, durung midep rawuh mangkin,
sampunang banget manyumbung, para dewane
ngandika, yadiapin dewa tan uning, nanging
sampun, jati bakti melaksana.
PUPUH SEMARANDANA
110. Sapunika yukti becik, pangandikan para
dewa, sanghyang atma ledang mangke,
malinggih maring jempana, waluya kemplongan
emas, magelungan wastra alus, becik pisan
munggwing warna.

Gaguritan Aji Palayon 50

 111. Para dewane mamargi, kadi paksi ring
ambara, marerodan ring langite, raris tedun ring
jabayan, ring bale alite kocap, kasiramang atma
iku, oleh para resi dewa.

112. Risampun puput mabersih, sang atma raris

ngastawa, ring cokor para dewane, raris
ngaranjing irika, ring korine gedong mas,
mangureyeb manik banyu, kadi bintang ngendih
ngabar.

Gaguritan Aji Palayon 51

 113. Akeh pisan yan wilangin, mustikan daging
kayangan, lian mangkin babaose, ring
sapanyaman sang atma, makatah panggihin ida,
sinarengan raris ipun, mataken maring sang
atma.

114. Gelis sang atma manyawis, inggih nyama

nyaman tityang, miwah para atma kabeh, liwat
bagya manah tityang, duaning sampun kasidan,
ring sametone matemu, wit paswecan para
dewa.

Gaguritan Aji Palayon 52

 115. Uduh jero atma sami, ring dija purin hyang
smara, sane luwih mangurenyeb, durus
ndikayang ring tityang, mangda tityang
sauninga, sampun suwe tityang cumpu, ring
linggih ida hyang smara.

116. Inggih atma wawu prapti, purin ida hyang

semara, dasa nalika dohnyane, mengpeng
mangkin becik pisan, ida hyang jagat karana,
ida gelis pacang tedun, mretyaksayang daging
swargan.

Gaguritan Aji Palayon 53

 117. Atmane kagiat mangkin, macacingak ring
ambara, kacingakin jempanane, mangurenyeb
kadi surya, kadulurin gagitayan, jangih rempuh
banban alus, pamargine gelis pisan.

118. Tan wenten tios gumanti, wantah ida hyang

isana, malinggih ring jempanane, sapunika atur
atma, sami rumasa garjita, masarana dupa
harum, mangastawa hyang isana.

PUPUH SINOM

Gaguritan Aji Palayon 54

 119. Singgih paduka batara, sembah baktin
tityang aksi, maraga jagat karana, sami wantah
ngawiwitin, miwah tatujon sang urip, iratu
maraga tutuk, ngardi krahajengan jagat, sang
iswara kapesengin, duk iratu, ngamedalang
sunar petak.

120. Mapesengan hyang mesora, kala

ngamedalang warni, sinar dadu kamedalang,
sanghyang brahma kapesengin, sunar barak
medal warni, sanghyang rudra mangkin wuwus,
ngamedalang sunar jingga, mahadewa
kapesengin, duk iratu, mawarni kuning kinucap.
Gaguritan Aji Palayon 55
 121. Mapesengan hyang sangkara, rikala ratu
mawarni, ngamedalang sunar galang, hyang
wisnu baosang mangkin, rikala ratu mawarni,
sunar selem yukti patut, hyang sambu
kaucapang, kenjekan ratu mawarni, wantah
metu, ngamedalang sunar nila.
122. Duk iratu ngamedalang, sunar sane tan
manesin, sri danta kabaosang, sadawege
mapakardi, teja sane galang suci, mapesengan
sanghyang guru, maka siwaning sang prajnyan,
mawisesa betel jati, saksat iku, sakadi sunaran
surya.
Gaguritan Aji Palayon 56
 123. Kenjekan ratu batara, nglebur papa momo
budi, saluir angkara murka, hyang berawa
kapesengin, ring langite jenek linggih, tatiga
ratu macaksu, tangan paduka batara, wantah
patpat kawilangin, nika ratu, manyihnayang
kawisesan.
124. Linggih paduka batara, bongkul tunjung
hyang pertiwi, kabaosang daun sekar, akasane
miwah langit, betel tinggal suci bersih, daging
sarwa suka luput, caksu indrya granen indrya,
sroten indryane makadi, jangkep sampun,
kawisesan hyang batara.
Gaguritan Aji Palayon 57
 PUPUH GINANTI
125. Risampun sang atma puput, ngabakti
ngastawa elis, wus ngastawa majantosan, ring
batune lempeh putih, kuparengga sekar ratna,
tunjung bakung miwah mlati.

126. Ambunnyane miik ngalub, sekare mawarna

warni, mangilehin italaga, ngawe liang
ngulangunin, ikakupu masliweran, isadpada
inguh paling.
127. Kingkana isana rauh, ring genah atmane
luwih, atma luwih sami seneng, nenten

Gaguritan Aji Palayon 58

 caritayang malih, atma miwah para dewa, teos
caritayang mangkin.
128. Merune ring swarga alus, meru slaka
kawastanin, genah ipun maring wetan,
kobernyane warna putih, genah atma sane
pageh, ring tapa brata samadi.
129. Meru tembaga kawuwus, ring badelod genah
linggih, kobernyane warna barak, genah atma
wanen luwih, tur utama maring jagat, suka
wirya kapupunin.
130. Meru mas sane badauh, kobernyane warna
kuning, genah para atma pageh, mayoga

Gaguritan Aji Palayon 59

 mayasa kerti, pageh ngwangun pitra yadnya,
kadi munggah maring gurit.
131. Meru besi kaping catur, maring kaler polih
linggih, kobernyane warni selem, genah atma
ratu luwih, sane utama ring jagat, asta brata
kanggen kanti.
132. Meru manik mangkin katur, kobernyane
manca warna, sane magenah ring madya, genah
atma wiku luwih, pageh mabrata ring jagat,
catur weda teleb yukti.
133. Atma sane ngulah laku, sane bobab nilun
kuping, maring tegal penangsaran, genahe sane

Gaguritan Aji Palayon 60

 kaungsi, ring pungkur meru selaka, tegal
linggah ngaresresin.
134. Genah para atma iku, sane jail himsa karmi,
mademang wong tanpa dosa, kawah naraka
kaungsi, ring pungkur meru tembaga, genah
kawahe kacawis.

135. Atmane alpaka guru, langgah maring biang

aji, maring pungkur meru emas, kagantung ring
punyan tiying, beten ipun wenten jurang, titi
gonggang ugal-agil.

Gaguritan Aji Palayon 61

 136. Atma sane nyetik ngracun, miwah ngleak tur
manesti, kocap ring taru curiga, kagenahang
kasakitin, ring wateking cikrabala, maring
ungkur meru besi.

PUPUH KUMAMBANG
137. Maring samping, palangkane kocap mangkin,
irika sang atma, ring batara matur gelis, singgih
ratu hyang batara.
138. Napi tityang, polih genah sane becik, iriki
ring swargan, saantukan sane rihin, pangabenan
tityang alit.
Gaguritan Aji Palayon 62
 139. Pangandikan, hyang batara nyurnyur manis,
uduh kita atma, pangabenan agung alit, nora
janten mangguh swarga.
140. Ne utama, tuwah pakardine becik, bakti ring
kawitan, astiti bhakti ring widhi, mapaweweh
dana punya.
141. Sapanyaman, sang atma kalih atiti,
aturnyane banban, nyurnyur ring atmane suci,
inggih atma utama.
142. Mogi ratu, mamanggihin genah becik, ring
suarga loka, tatujone sami luwih, panggih ratu
ring sunyata.

Gaguritan Aji Palayon 63

 PUPUH SINOM
143. Gitane puput sinurat, ring rahina siwaratri,
sukra paing uku matal, tanggal patbelas prewani,
warsa isaka wilangin, siyu sanga patlikur, warsa
masehi ucapang, kalih tali lintang trini, duk puniku,
payogan ida hyang siwa.
PUPUH GINANTI

1. Sanghyang atma ne kawuwus, wenten ring

sajroning hurip, ida dahat mautama, kadi
suksman sanghyang widhi, tan kahanan panca
baya, ida wantah mraga lewih.

Gaguritan Aji Palayon 64

 2. Emban antuk budi sadu, kahyun suci dahat
hening, i tri kaya parisudha, maka jalarane
lewih, anggen bekel sanghyang atma, mantuke
kajagat suci.

PUPUH ADRI

1. Maka bekel sang hyang atma tuhu,

Sarin pagawene,
Ento sangu bekel mulih,
Boya ja i pangan kinum,
Miwah panganggene murub,
Nto tuah sangu dilemah,
Makejang sing milu nutug,

Gaguritan Aji Palayon 65

 Disuban cening matinggal,
Kasugihan kecag jumah.

2. Pyanak somah nyama braya liyu,

Ngateh kasemane,
Pada mekelin ban eling,
Disubane pada mantuk,
Cening lawut pati entul,
Twara tepun ban margane,
Angen-angen ngelah liyu,
Sane jati tan pasaja,
Bas banget ban ngamomotang.

Gaguritan Aji Palayon 66

 3. Dwaning keto jalan jani ruruh,
Dabdabang bekele,
Ane utama kardinin,
Kotaman bekele mantuk
Ngawe kasukan satuwuk,
Da bas ngulah sekalane,
Sekala niskala ruruh,
Dasarin ban kanirmalan,
Kadi lingning hyang agama.

Gaguritan Aji Palayon 67