GEGURITAN KARMA PHALA

(Jogor Manik Midanda Atma)

PUPUH SINOM
1. Jogor manik ne kocapang,
sedek ida ketangkilin,
watek bala pekan  ida,
sang suratma wikrama tangkil,
sang utpata tumut malih,
jogor  manik ne mawuwus,
suratma miwah wikrama,
sang utpata ne malih, 
atma rauh,
ebek tegal penangsaran.
 
2. Ngiring jani kena danda,
manut karmanya duk urip,
sang suratma  raris nimbal,
inggih ratu dewa gusti,
tityang sampun syaga sami, 
midanda kancan atma rauh,
jalan jani tigtig tur oros,
pulang  maring kawah geni,
wus puniku,
atmane raris mangjadma.
 
3. Bhuta-bhuti pada girang,
nenten madue manah asih,
tan piolas ring  sang atma,
ngantonang atmane sedih,
wenten ne pajerit ngeling, 
wenten sane nunas tulung,
manyambatang meme bapa,
ada sane  mamisuhin,
uduh ratu,
nguda nraka pangguh tityang.

Geguritan Karma Phala 61

4. Bhuta kala raris ngucap,
ih atma-atma tahenang jani,
larane ring  yamaloka,
kaden suargan aluh ngalih,
yan cai mekita molih, 
resepang sadaging tutur,
mentik manah nirmala,
sarirane patut  bersihin,
eda ngacuh,
eda iri nyama braya.

PUPUH GINADA
1. Atma sami kapunduhang,
nyesel raga sambil ngeling,
manulame meme  bapa,
tan dumade gajah rauh,
miwah jaran sada nguber,
ada paksi, 
rauh mangkin saha nyander.

2. Atma jejeh mengatonang,

raris melaib pati sili,
sengal-sengal  angkihannya,
watek buta kala mesaur,
ih cai atma makejang,
mai  dini,
ngetis batan kayu curiga.
 
3. Atma-atma pada girang,
padrudut masayuban ngetis,
ring batan  kayu curiga,
atmane maembon ditu,
sampun lega maembonan,
kagejor  raris,
wastu donnya pada aas.  

Geguritan Karma Phala 62

4. Donnya marupa kadutan,
nepen atma sedek ngetis,
ring beten taru  punika,
ngandika sang buta siu,
ih cai atma makejang,
mai dini,
di  selagan batune negak.
 
5. Raris batu kajengkepang,
sami atma ne ka jepit,
makraik ipun  kesakitan,
melodlod matanya pesu,
pati jalmut mesambatan,
naenang  sakit,
pati grepe tangannya.
  
6. Sang buta sin malih ngucap,
siu tiban mapejepit,
wireh cai stata  mialang,
tatujon timpal ne rahayu,
buta simbar mangkin ngucap, 
atma sami,
yaning cai dot ka suargan.

7. Ingong misadia mangajak,

nah mai cai enggalin,
ene ada titi  gonggang,
melahang pisan cai nuut,
atma-atma pada girang,
nuut  titi,
alon-alon ia memarga.

Geguritan Karma Phala 63

8. Raris ditu ia matolihan,
ngetor batis atma mangkin,
ring sor titi  kekatonang,
geni ngabar lintang kebus,
masungga lanying pisan, 
ditu raris,
titi gonggange kaungitang.
 
9. Ulung atmane makejang,
nyerit tebek sungga lanying,
sang buta  simbar ngucap,
makelonya kutus tahun,
cai nandang kasengsaran, 
memati-mati,
duk cai urip ring lemah.

PUPUH DURMA

1. Sang jogor manik malih ne ngandika,

uduh atma muani prapti,
apa  krana padem,
enggalang orahin nira,
i sang atma matur aris, 
tityang padem,
sakit tan sida nambanin.
 
2. Karyan tityang maring lemah merancaban,
demen ngemademang  jatmi,
asing kanikayang,
olih ida sang prabu nata,
tityang nenten  manureksain,
patut iwang,
asing titah kalaksanain. 

Geguritan Karma Phala 64

3. Sang jogor manik malih ida atanya,
ih atma suba melukat cai,
ring  ida pandita,
berat pesan lakar trima,
ulung dasa tiban lami,
cai  kasiksa,
buta kadompo kang name.
 
4. Malih wenten atma muani tangkil prapta,
tur atanya sang jogor  manik,
taen cai mapunia,
taen ke cai meyadnya,
ngaturang odalan  lan mekiis,
nyanggar tawang,
pitra lan buta yadnya sai.
 
5. Yaning suba taen macihna cai nawang,
tutur agama ne sujati,
eda  mripitang arta,
yaning cai ngelah yadnya,
undang nyama braya  sami,
nyawis banban,
ampura sang jogor manik.
 
6. Duke tityang kari urip maring lemah,
mayadya tityang tan naenin, 
Jogor manik ngerak,
nirdon pesan idup iba,
tutur agama tuara  uning,
belog iba,
tuara nawang beneh pelih.

Geguritan Karma Phala 65

7. Yan anake sugih ngelah pipis emas,
apang ada kapakidih,
teken  nyama braya,
patut medana punia,
laksanane stata sripit,
demit  pisan,
pang tan telah branan cai.
 
8. Jani nira pacang midanda kita sang atma,
duang tiban ring kawah  geni,
yaning suba pragat,
numitis ke mayapada,
dadi jadma berag  aking,
panebusnya,
caru buta preta name.

PUPUH SEMARANDANA

1. Malih prapta atma istri,

sang jogor manik angucap,
uduh atma wau  prapteng,
kenken jalaran nyai padem,
apa wisayan di madyapada, 
sang atma gelis matur,
singgih ratu nunas lugra.

2. Tityang padem duke nguni,

sangkaning tityang mepangenan,
sedih  mangenang pianake,
pianak tityang ne mekatah,
maka sami pada  padem,
pianak alit-alit ratu,
ne sedihang peteng lemah.

Geguritan Karma Phala 66

3. Jogor manik ngandika malih,
sisip nyai teteh bantang,
ne gada jani  jemak,
sang atma tuara tulak,
raris jemak gada punika, 
angkihannya mengangsur,
raris nylempoh teteh gada.

4. Sang buta nerit ngwastonin,

sia tiba nandang sengsara,
yaning  puput sasengkere,
ditu malih kapandikayang,
pang numadi ring  panyaman,
dadi anak istri ayu,
truna-truna keh ngedotang.

5. Keh wong lanang ngrebutin,

wastu ipun mauyutan,
sareng roang roang ipune,
baan ayu ne mekada,
anak istri kapademang,
maring  setra gandamayu,
bulak balik manjadma.

PUPUH PANGKUR

1. Jogor manik malih nyingak,

ada atma wong istri ne prapti mangkin, 
kapandika apa wisayanmu,
apa jalarannya padem,
tumuli sang atma  raris matur halu,
ampura ratu bhatara,
padem tityang nandang  gering.

Geguritan Karma Phala 67

2. Nesti neluh nerangjana,
sapunika geginan tityange duke urip, 
mademang anak limang atus,
sangkan tityang mawisesa,
kapaicain  dewi durga ring gandamayu,
jogor manik menggah pisan,
yan keto  wisayanmu nguni.

3. Jani nira mastu iba,

pacang kasengker tanpa awak ne jani, 
mekelonya kutus tahun,
wus punika nyai mangjadma,
maring lemah  dadi uled siu tahun,
dadi jlati satak tiban,
yan enu nyai masolah  weci.

4. Malih atma istri prapta,

pejalannya lemuh megeloran gati,
tumuli  ketakenin ditu,
apa jalaran nyai padem,
miwah apa geginan nyai  duke idup,
atmane umatur banban,
ngulurin indria nemu pati.

PUPUH GINANTI

1. Tityang wantah jatma bekung,

mekenyem sang jogor manik,
yan nyai  edot ngelah pianak,
nira ngicen pianak jani,
ne wenten pianak  dadua,
melahang pisan manyonyoin.

Geguritan Karma Phala 68

2. Atmane malih umatur,
ratu sang jogor manik,
yan dadi tityang  nunas,
icen tityang pianak istri,
ne listu ayu warninya,
ngame  pianak saking rihin.

3. Sang suratma raris rauh,

makta rare anak istri,
gelis kapica ring  sang atma,
dahat lega tan sinipi,
mangkin sida ngelah pianak,
atma  bekung manyonyoin. 

PUPUH GINADA

1. Rarene manadi bijal,

ngisep nyonyo mangulanting,
i bekung raris  ngatabtab,
ditu ia nemah mamisuh,
pajerit ngeling kesakitan,
suud  gusti,
tan sida antuk nahenang.

2. Raris ditu kapandika,

ih sang atma bekung nyai,
jani nyai pulang  ring kawah,
melablab duang tiban ditu,
wus punika nyai manjatma, 
kesakitin,
i buta rare kang nama.

Geguritan Karma Phala 69

3. Ada atma wawu prapta,
ya mangojog bale manik,
ida sang sri  bhagawan,
tityang brahmana putus,
kija laku jani titiyang, 
ngungsi linggih,
manut ring ida sang pandhita.

PUPUH SINOM

1. Ih kita wiku dadakan,

kasepan sepan mabersih,
mangulah nampi  daksina,
tong nawang upeti stiti,
sangkan mai teka paling,
twara  nawang kangin kauh,
mangulah enggal majalan,
asing genah  kejagjagin,
mapi weruh,
sujati tong nawang paran.
 
2. Yaning cai keneh nawang,
swargane wekasing luih,
twara gampang  nagih nawang,
tanpa yasa nagih luwih,
budi enggal mapikolih, 
sangkan mula takut tuyuh,
idupe mangawi dosa karma,
jani  karmapala tampi,
patut ingsun,
maweh upah ne dikawah.

Geguritan Karma Phala 70

3. Kene san lacur katemuang,
tan sida ban ngrasanin,
antuk laksanane  timpang,
momone baang mamurti,
sangkan jani mapikolih,
tata  laksanane dumun,
demen nguluk nguluk timpal,
saking istri  mangajakin,
sangkan payu,
ninggal swarga nglih kawah.
 
4. Wenten malih ne ungkuran,
cihnane wong jati luih,
sekatahing  cikra bala,
tan wani pada manolih,
wireh tejane ngulapin, 
pamargane juwa manyujur,
ngungsi swarga siwaloka,
apsara apsari  sami,
ne ka utus,
mendakin baan joli mas. 
  
PUPUH DURMA

1. Kocap malih wenten atma buyut prapta,

raris atanya jogor manik  napi kawisannya,
atma buyut matur sembah,
kawisayan titiang duk  urip,
peteng lemah,
tuah memacul ring carik 

Geguritan Karma Phala 71

2. Yaning lemah tityang ngebet kladi ring tegal,
nyaga biu yaning  wengi,
maling reke katah,
tatanduran tiang katah,
kacang jagung  sela ubi,
undis tabya,
padi gaga jagung jail.

3. Isen cekuh kunyit kasuna lan bawang,

muang enyuh base gading, 
icen tityang swarga,
jaga kapulain tityang,
yaning ratu tan  nyuecanin,
tityang sadia,
dyastu menumbas sairing.
 

PUPUH SINOM

1. Sang jogor manik angucap,

atma buyut wau prapti,
matiang apa ta  ika,
muwah kawisayanmu nguni,
i buyut ature banban aris,
tityang  padem ulian labuh,
ngarit maring pangkung dalem,
wus matekap  maring carik,
saget ditu,
sampin tityang nagih amahan.
 

Geguritan Karma Phala 72

2. Atma gede badeng prapta,
atanya mangkin jogor manik,
ih kita atma  wang gede,
paran matyang apa iki,
sang atma bangras nyawis, 
tityang wantah tukang pukul,
yan dot tityang ngalih pangan,
maak  megal lan mamaling,
tityang dumun,
matin tityang rebut desa.

*** Puput ***

Geguritan Karma Phala 73