Bahan Sermon 26 Juni 2022

Minggu : II dung Trinitatis

Tema minggu : Satia Mangihuthon Tuhan Jesus
Turpuk Epistel: Lukas 9:51-62

Patujolo
Damang Dainang dongan sahaporseaon, mansai ampit do turpuk epistel di hita sadari on tu lirik ni BE
698: 1, dia ma i: “sai ihuthononhu Jesus, sai ihuthononhu Jesus, salelenglelengna i”. Molo itarimangi hata ni
ende on, on ma sada ende na mangekspresihon komitmen hasatiaon, komitmen laho mangihuthon Tuhan Jesus.
Alai ndang na mura laho mandalani manang mangulahon manang manghangoluhon komitmen i ala dihatahon
do muse di ende i: “Nang godang haporsuhon, sai benget do ahu manaon”. Godang do hamaolon manang
parungkilon, jala borat do sitaonon na marragam di proses na mangihuthon Jesus i.
Turpuk sadarion patoranghon pardalanan ni Jesus hatiha di na borhat Ibana tu Jerusalem laho pasauthon
sangkap ni debata, i ma di pardalananNa na laho mangadopi hamateanNa. Ai ingkon di Jerusalem do Jesus
mangadopi hamateanNa (Luk 13:33). Boi idaonta di bagasan turpuk on na ditulak halak samaria Jesus, ndang
hinata i marningot parmusuon ni halak Jahudi dohit halak Samaria naung tung leleng masa paraloan di nasida.
Mula ni paraloan i boi idaonta sian padan na robi andorang ditaban Asiria halak jahudi. Ia halak samaria i ma
angka bangso na asing na disolukhon raja Assur sian Babel, sian Kuta dohot sian Awa dohot sian Hamat dohot
sian Separwaim gabe maringan di angka huta ni Samaria singkat ni halak Israel. Jala tarbarita do halak Samaria
ala ni parsombaonna tu debata Baal (2 Raj. 17:24-29). Dunghon i dietong halak Jahudi ma halak Samaria jolma
na ramun sian ugamona, houm dohot ras ni nasida. Hatiha diuluhon Serubabel halak Israel mulak sian
habuangan jala di na naeng pajongjonghon bagas joro di Jerusalem, ditulak halak Jahudi do pangurupion ni
halak Samaria laho pajongjonghon bagas joro i. Jadi digugai, dibahen halak samaria daukdauk tangan ni halak
Juda/Jahudi, laho manundatnundati halak Jahudi i di ulaonna na pajongjonghon bagas Joro ni Debata hatiha i
(Esra 4:1-10).

Hatorangan ni turpuk
Di roha ni si Jakobus dohot si Johannes asa olo Jesus mangaloas pangidoan nasida laho manurunhon api
sian ginjang tuhalak Samaria, ala i do di roha ni nasida na ummuli sipatupaon tu halak Samaria na so
manjangkon Jesus tu Jerusalem, Alai ndang dioloi Jesus pangidoan nasida i. Dipasingot Jesus do si Johannes
dohot si Jakobus na martahi patupahon na maralo tu Jesus i (Ay. 55, ninna ma: “Ndang diboto hamu hape,
manang tondi dia di hamu?”). Ala mangihuthon Jesus ndang ulaon ni sisean sisongon i. Ala diajari Jesus do
siseanNa manghaholongi musu (Luk 6: 27-36) jala ndang manguhumi dongan (Luk 6:37-42). Songon dia do na
niajarhon ni Jesus molo masa panulahion? Didok Jesus do, “ruar hamu sian huta sisongon i; pirpirhon hamu ma
orbuk i sian totmuna” (Luk 9:5; 10:10-12). Lapatanna i ndada marhite hajahaton manang ulaon panguhumon.
Ai ndada na mangalengsehon Tondi na sian Debata, alai naeng margogoihon dohot paluahon do.
Dung i borhat ma nasida manopot huta na asing laho manjou angka na giot mangihuthon dohot
manjanghon ibana. Sian ayat 57-62 on adong do tolu halak na gabe contoh ni jolma na so giot manang satia
mangihuthon Tuhan Jesus. Na parjolo i ma sahalak sibotosurat na mandok “sai ihuthononhu do ho manang tu
dia pe Ho laho”(ay. 57). Sada hata parsitutuon do on naeng mangihuthon Jesus, manghatahon haradeon
mangihuthon Jesus manang tudia pe laho. Pandohan i boi patuduhon bulus ni roha na naeng gabe sisean ni Jesus
na satia. Alai diboto jala ditanda Jesus do ibana, na manja do sisahalak on, ai na mangolu dibagasan
kenyamanan do nasida, jala ndang olo manoadahon dirina, gabe didok jesus ma: “na marliang do angka
antuasu, na marasar do pidong na martongatonga langit; alai anggo di Anak ni Jolma i ndang adong hapeahan
ni uluNa” (ay. 58). I ma hata ni Jesus manguji giot ni roha nasida laho mangihuthon Ibana. Dipabotohon Jesus
ai ndang na mura na mangihuthon jesus, ala ingkon do parjolo maninggalhon saluhut angka kenyamanan, olo
manoadahon diri, olo patutoruhon diri jala manghobasi di bagasan haserepon ni roha. Na paduahon, dilehon
Jesus do kehormatan, ala Jesus na manjou nasida, alai ndang bulus rohanasida ala ndang olo ibana manadinghon
natorasna laho manggohi joujou ni Tuhan Jesus. Molo mangihuthon buku ni si Musa dohot angka panurirang
taringot tu mananom angka na mate, gabe tihas do di dongan sajabu molo so mananom namate sian anggota
keluargai tarlumobi ama ni keluarga i, (2 Musa 20:12; 5 Musa 5:16; 5 Musa 28:26; Psalmen 79:2; Parjamita 6:3;
Jesaya 14:19; Jeremia 7:33; 16: 4; 25:33; 34:20;). I do umbahen didok nasida “...loas ahu jolo mananom
damang” (ay. 59) . Adong do parsoalan di hata ni nasida, i ma: tutu do na mate natorasna i? adong didok dua
pamingkirion mangantusi pandohan i.
Parjolo, tongon didok ibana hatana i, hatiha i mangurus natorasna do ulaonna, jala naeng rap dohot
natorasna i sahat tu ujung ni ngoluna. Dung pe mate asa bebas ibana, hombar tu ajaran ni si Musa naung binoto
nasida. Lapatanna naeng mandok dung mate ma natorasna asa digohi joujou ni Tuhan jesus. Paduahon, adong
na masa di halak Jahudi, uju mate sahalak natoras, jumolo disimpan di poti ni bangke manang piga ari, dung di
sada tingki dibuhul ma laho mananomsa. Dung ditanom ma asa ihuthononna Jesus.
Didok Jesus di ayat 60: “pasombu ma angka na mate mananom na matena...”, paboahon unang gabe na
mate manang na naeng mate manundati laho mangihuthon Jesus, ai Tuhan ni na mangolu dohot na mate do
Tuhan Jesus. Ingkon pinatujolohon harajaon ni Debata.
Dia do lapatan ni pandohan ni Jesus di ayat 62? Tontu maninggala i ma sada ulaon na borat jala ringkot
do disiplin mangulahonsa. Molo so tigor, sega do tano na tininggalaan i, gabe ndang denggan tano i laho
pangkeon laho manuan boni. Alani i ingkon boi fokus tu jolo huhut maniop tinggala i asa tigor, unang salah
jalur, unang marlegotlegot. I do lapatan ni paninggala na tigor, na tama, mangihuthon hata ni Tuhan Jesus, na
nidokna sisean na giot, na satia.

Sipahusorhusoron
Damang dainang, dia ma impola ni turpukta sian evangelium lukas on laho sipahusorhusoronta? Na
parjolo, di partingkian sinuaeng on, lam jotjot do jumpanganta na masa angka panggomgomi manang angka
parhuaso manguhumuhumi bangso gomgomanna, gariada nunga adong na baliksa, ima situan na torop
gomgoman i na manguhumuhumi manang mangatur pamarenta manang uluanna. Ndang holan di pamarentaon,
alai masa do i tong di tongatonga ni Huria. Boha do hita patuduhon na gabe sisean na giot jala satia hita marhite
ngolu dibagasan tondi na paluahon, ndada na manguhumi? Nunga itahangoluhon i? Na paduahon, ndada na
mura gabe siihuthon Jesus (Kristen), ala syarat na parjolo i ma mansoadahon diri, ndada na laho mangalului
pangomoan manang hagiot ni daging. Na gabe sungkunsungkun, songon dia do hita patuduhon ngolu na
mansoadahon diri? Sanggup do hita manghangoluhonsa? Na mangihut, ndang boi na ngernger manang
marlemba na mangihuthon Jesus. Boha do hita patuduhon giot ni rohanta manang hasatiaonta mangihuthon
Tuhan Jesus? Boi do tahangoluhon i? nunga tigor be hita maninggala manang olo dope hita mamereng tu
siamun manang tu hambirang manang tu pudi di pardalanan ni ngolunta sebagai Kristen? Amen.