Li Chili’ ut li Rax q’een

Junsut len ke’xtaw rib’ sa’ k’al li ch’ili’ rochb’een lix xrax q’een.
Ke’xk’e xsahileb’ sa’ xch’ool chi rib’ileb’ rib’ naq ke’ril rib’.
Xiikil ta wi’ xsahileb’ xseeraq’ naq ke’xtikib’ li aatinak.
Ab’anan li chili kiraj raj xk’utb’al li xseeb’al ut kixye:
-Laa’in li jwal chaab’il sa’ chi xjunil li ruuchi ch’och’.
Naru nakinpisk’ok chi xiikil xnajtil chawu laa’at.
Jun pisk’onk aj wi’ kixk’e re naq kihulak toj sa’ ru’uj li k’al.
Chi ch’a’ajk kach’in sa’ xch’ool lix xrax q’een, naq kixye:
-Ink’a’, awaaa’.
Laa’in li jwal seeb’in chi pisk’oook.
Jwal najt wi’ chik nipisk’ok chawu laa’aaat.

Ut jun aj wi’ li xnimla pisk’ kixk’e, tik kinume’k sa’ xb’een chi
xjunil li k’al.
Kich’a’ajko’k li chili’ ut kixye:
-Laa’at ink’a’ nakanaw pisk’ok, laa’at yal ixqat.
Ilin wan laa’in, ilin b’i’ wan laa’iiin.
K’e reetal xnajtil nakinpisk’ok chawil, laa’in teelomil chili’in.
Lix xrax q’een tik yalyo’k xaq xq’e chi pisk’ok, toj re naq
kinajto’k chi us.
Te’raj raj xk’utb’al chi ruheb’ chi rib’ileb’ rib’ naq chaab’il
nake’pisk’ok.
Toj re naq ink’a’ chik ke’ril rib’eb’ ut chi moko ke’rab’i ta chik rib’eb’.
Ut sa’ xk’utb’al jo’ najtil tz’aqal napisk’ok, li chili’ kit’ilk chaq sa’
jun xkemom x’am. Ut ki’ok japjo’q re chi xb’oqb’al lix xrax q’een.